ଯାଜପୁର: ଯାଜପୁର ଜିଲ୍ଲା ର ଯାଜପୁରରୋଡ଼ ଥାନା ସୋବରା ପ୍ରଶାନ୍ତି ବିହାରର ଅଂଚଳ ରେ ଜଣ ଙ୍କ ଘରୁ ଚୋରି ଘଟଣାରେ ଯାଜପୁରରୋଡ଼ ପୋଲିସକୁ ବଡ଼ ଧରଣର ସଫଳତା ମିଳିଛି | ଉକ୍ତ ଚୋରିରେ ସମ୍ପୃକ୍ତ ଥିବା ୩ଜଣ ପୁରୁଷ ଓ ୩ ଜଣ ମହିଳାଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ପ୍ରାୟ ୪୫0 ଗ୍ରାମ ସୁନା ଏବଂ ରୁପା ଅଳଙ୍କାର ଯାହାର ମୂଲ୍ୟ ୬0ରୁ ୭0ଲକ୍ଷ ଟଙ୍କା, ଗୋଟିଏ ନୋକିଆ ମୋବାଇଲ ଫୋନ ଉଦ୍ଧାର କରିବା ସହ ଚୋରିରେ ବ୍ୟବହୃତ ଯନ୍ତ୍ରପାତି ଏବଂ ୨ ଟି ବାଇକକୁ ପୋଲିସ ଜବତ କରିଛି | ଅଭିଯୁକ୍ତ ମାନେ ହେଲେ ଏହି ଥାନା ବ୍ୟାସନଗର ସହର ସପଗାଡ଼ିଆ ଅଞ୍ଚଳର ପପି ଆଲିଆସ ସୁରେଶ ପାତ୍ର (୩୪), ଲକ୍ଷ୍ମୀନଗର ହୁଡ଼ିସାହିର ପପୁ ଆଲିଆସ ଚଗଲା ପାତ୍ର (୪୫), ପପୁର ପ୍ରଥମ ସ୍ତ୍ରୀ କେତକୀ(୨୮) ଓ ଦ୍ୱିତୀୟ ସ୍ତ୍ରୀ ସନ୍ଧ୍ୟା ପାତ୍ର (୨୭), ସୁରେଶ ର ସ୍ତ୍ରୀ ହୀନ ପାତ୍ର(୩0) ଏବଂ ଉକ୍ତ ଚୋରି ସୁନା କିଣିଥିବା କୁଆଖିଆ ଥାନା ବାଉଁଶକଣ୍ଟା ଗ୍ରାମର ଗହଣା ଦୋକାନୀ ପ୍ରତାପ ଦାସ | ଏନେଇ ମଙ୍ଗଳବାର ଅପରାହ୍ନରେ ଯାଜପୁର ଏସପି ୟଶପ୍ରତାପ ଶ୍ରୀମଲ ଯାଜପୁରରୋଡ଼ ଥାନା ପରିସରରେ ଏକ ଖବରଦାତା ସମ୍ମିଳନୀରେ ଚୋରି ଘଟଣାର ପର୍ଦାଫାସ କରିଛନ୍ତି | ଏସପିଙ୍କ ସୂଚନା ଅନୁଯାୟୀ ଗତ ମାସ ୧୮ ତାରିଖରେ ସୋବରା ପ୍ରଶାନ୍ତି ବିହାର ଚନ୍ଦ୍ରମଣି କର ନାମକ ବ୍ୟକ୍ତି ଘରେ କେହି ନଥିବା ଅବସ୍ଥାରେ ସମ୍ପୃକ୍ତ ଚୋରାମାନେ ଏହାର ସୁଯୋଗନେଇ ଲୁହ ରଡ଼ ଏବଂ ସ୍ଲାଏ ରେଞ୍ଚି ସାହାଯ୍ୟରେ କବାଟ ଭାଙ୍ଗି ଘରେ ପସି କଳାକାନ ବୁଲାଇଥିଲେ | ଏହି ଚୋରିରେ ମହିଳା ତିନିଜଣ ସହଯୋଗ କରିଥିଲେ | ଏ ସମ୍ପର୍କରେ ଯାଜପୁରରୋଡ଼ ଥାନାରେ ଗତ ୧୮ ତାରିଖରେ ଘର ମାଲିକ ଅଭିଯୋଗ କରିଥିଲେ | ପୋଲିସ ଘଟଣା ସ୍ଥଳରେ ପହଂଚି ଘରର ସିସି ଟିଭି ଫୁଟେଜକୁ ଆଧାରକାରୀ ତଦନ୍ତ ଜାରି ରଖିଥିଲା | ଯାଜପୁର ଏସପି ଶ୍ରୀମମଲ ତତ୍ୱାବଧାନରେ ଏକ ଟିମ ଗଠନ କରି ତଦନ୍ତ ଜାରି ରଖିଥିଲେ | ପୋଲିସ ସିସି ଟିଭି ଫୁଟେଜକୁ ଆଧାର କରି ସେମାନଙ୍କ ମୋବାଇଲ ଟ୍ରାକ କରି ଚୋରମାନଙ୍କ ସନ୍ଧାନ ପାଇଥିଲେ |
ମଙ୍ଗଳବାର ଭୋର ୫ ଘଟିକା ସମୟରେ ସାପଗାଡ଼ିଆ ଓ ଲକ୍ଷ୍ମୀନଗର ଅଞ୍ଚଳରେ ସେମାନଙ୍କ ଘରେ ଚଢ଼ାଉ କରି ଗିରଫ କରିଥିଲେ | ପପୁ ଏବଂ ପପିକୁ ପୋଲିସ ଗିରଫ କରିବା ପରେ ସେମାନେ ଚୋରି କରିଥିବା ପୋଲିସ ନିକଟରେ ସ୍ୱୀକାର କରିଥିଲେ | ଉକ୍ତ ଚୋରି ଗହଣା କିଣିଥିବା ଯାଜପୁରରୋଡ଼ ସହର ନିଉ ମାର୍କେଟରେ ସୁନାଦୋକାନ କରିଥିବା ପ୍ରତାପ ଦାସକୁ ପୋଲିସ ଗିରଫ କରିବା ସହ ଚୋରି ଅଳଙ୍କାରକୁ ଉଦ୍ଧାର କରିଥିଲା | ଚନ୍ଦ୍ରମଣିଙ୍କ ଘରେ ପୂର୍ବରୁ କାମ କରୁଥିବା ପପୁର ୨ ସ୍ତ୍ରୀ କେତକୀ ଓ ସନ୍ଧ୍ୟା ଏବଂ ପପିର ସ୍ତ୍ରୀ ହୀନା ଘରର ଆସବା ପତ୍ର ବିଷୟରେ ଓ ଚୋରି ଦିନ ଘରଲୋକ ବାହାରକୁ ଯାଇଥିବା ଓ କେହି ନଥିବା ସମ୍ପର୍କରେ ସହଯୋଗ କରିଥିଲେ | ସୁରେଶ ପାତ୍ର (ପପି) ନାମରେ ଯାଜପୁରରୋଡ଼, କୋରେଇ, କଳିଙ୍ଗନଗର ଓ ଯଖପୁରା ଥାନାରେ ବିଭିନ୍ନ ମାମଲାରେ ୩0ଟି ମୋକଦମା ରୁଜୁ ହୋଇଥିବା ବେଳେ ଚଗଲା ପାତ୍ର(ପପୁ ) ନାମରେ ଯାଜପୁରରୋଡ଼, ଘସିପୁରା ଓ ଜଗତପୁର ଥାନାରେ ୨0 ଟି ମାମଲା ପୂର୍ବରୁ ରହିଛି | ଚଗଲା (ପପୁ) ଚୌଦ୍ୱାର ଜେଲରୁ ଗତ ୮ ତାରିଖରେ ବେଲେର ଆସି ଏହି କାଣ୍ଡ ଘଟାଇଥିବା ଏସପି ସୂଚନା ଦେଇଛନ୍ତି | ଯାଜପୁରରୋଡ଼ ଥାନା କେସ ନଂ ୧୫୮/ ୨୫ ରେ ଏକ ମାମଲା ୠଜୁକରି ଆସମୀ ମାନଙ୍କୁ ଯାଜପୁରରୋଡ଼ କୋର୍ଟ ଚାଲାଣ କରିଛନ୍ତି | ସେଠାରେ ଜାମିନ ନାମଞ୍ଜୁର ହେବାରୁ ରଗଡି ଜେଲକୁ ପଠାଯାଇଛି | ଆସମୀ ମାନଙ୍କୁ ରିମାଣ୍ଡରେ ଆଣି ଆହୁରି ଅଧିକ ତଦନ୍ତ କରାଯିବ ବୋଲି ଏସପି ଗଣମାଧ୍ୟମକୁ ସୂଚନା ଦେଇଛନ୍ତି |ଯାଜପୁରରୋଡ଼ ସହରେ ଥିବା ବିଭିନ୍ନ ସୁନାଦୋକାନି ଚୋରି ସୁନା କିଣୁଥିବା ଏବଂ ସେମାନଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ହେଉନଥିବା ସମ୍ପର୍କରେ ଏସପିଙ୍କୁ ପ୍ରଶ୍ନ କରିବାରୁ ସେ ପୋଲିସ ସେଥିପ୍ରତି ନଜର ରଖିଥିବା ଏବଂ ପ୍ରମାଣ ମିଳିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ଦେଇଥିଲେ |
