ଖୋର୍ଦ୍ଧା: ପୋଲିସ ବାବୁଙ୍କୁ ମହଙ୍ଗା ପଡିଲା ପରକୀୟା ପ୍ରୀତି । ବିବାହିତା ମହିଳାଙ୍କ ଘରେ ପଶି ଥିବାବେଳେ ରେଡ୍ ହ୍ୟାଣ୍ଡେଡ ଧରିଲେ ମହିଳାଙ୍କ ସ୍ୱାମୀ । ଉଭୟଙ୍କୁ ବାହାର ପଟୁ ତାଲା ପକାଇ ପୋଲିସକୁ ଡାକି ଆଣିଲେ । ପୋଲିସ ପହଞ୍ଚି ବିବାହିତା ମହିଳାଙ୍କ ସହିତ ସମ୍ପୃକ୍ତ ପୋଲିସ ବାବୁଙ୍କୁ ବନ୍ଦ ଘରୁ ଉଦ୍ଧାର କରି ଥାନାରେ ଅଟକ ରଖିଛି । ଏହି ଘଟଣା ହେଉଛି ଖୋର୍ଦ୍ଧା ଜିଲ୍ଲା ବୋଲଗଡ ଥାନା ଅଞ୍ଚଳର । ଉକ୍ତ ପୋଲିସ ବାବୁ ଜଣକ ଅନିଲ କୁମାର ଦାସ ଏବଂ ସେ ଖୋର୍ଦ୍ଧା ବିଧାୟକଙ୍କ ପିଏସଓ ଭାବେ କାର୍ଯ୍ୟରତ ଥିବା ଜଣାପଡିଛି । ଗତ ସୋମବାର ବିଳମ୍ବିତ ରାତିରେ ରସିକ ପୋଲିସ କର୍ମଚାରୀ ନିଜ ଗାଁକୁ ଆସିଥିଲେ । ତାଙ୍କ ଘର ସାମ୍ନାରେ ଥିବା ବିବାହିତା ମହିଳାଙ୍କ ଘରେ କେହି ନଥିବାର ସୁଯୋଗ ନେଇ ଘରେ ପଶିଥିଲେ । ସେହି ମହିଳାଙ୍କ ସହ ତାଙ୍କର ପୂର୍ବରୁ ଅନୈତିକ ସମ୍ପର୍କ ରହିଥିଲା ।
ଦୁହିଁଙ୍କ ପରକୀୟା ପ୍ରୀତି ଚାଲିଥିବାବେଳେ ଏତିକି ବେଳେ ହଠାତ୍ ଘରେ ପହଞ୍ଚି ଯାଇଥିଲେ ମହିଳାଙ୍କ ସ୍ୱାମୀ । ସମ୍ପୃକ୍ତ ପୋଲିସ ବାବୁଙ୍କ ସହ ନିଜ ସ୍ତ୍ରୀକୁ ଅସଞ୍ଜତ ଅବସ୍ଥାରେ ଦେଖି ବାହାରପଟୁ ତାଲା ପକାଇ ଦେଇଥିଲେ । ଏହାପରେ ବୋଲଗଡ଼ ଥାନାରେ ପହଞ୍ଚି ଅଭିଯୋଗ କରିଥିଲେ । ଏହାପରେ ବୋଲଗଡ ପୋଲିସ ଘଟଣାସ୍ଥଳରେ ପହଞ୍ଚି ତାଲା ଖୋଲି ପୋଲିସ କର୍ମଚାରୀ ସହ ବିବାହିତା ମହିଳାଙ୍କୁ ଉଦ୍ଧାର କରି ଥାନାକୁ ନେଇଥିଲା । ଦୁହିଁଙ୍କୁ ଥାନାରେ ଅଟକ ରଖି ଅଧିକ ତଦନ୍ତ କରାଯାଉଛି । ସେପଟେ ଏହି ଘଟଣାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି । ବୋଲଗଡ଼ ଥାନା ଅଧିକାରୀ ସିଗ୍ଧାମୟୀ ବରାଳ କହିଛନ୍ତି, ‘ଦୁଇ ପକ୍ଷର ଅଭିଯୋଗକ୍ରମେ ଦୁଇଟି ମାମଲା ରୁଜୁ ହୋଇଛି । ଅନିଲ ଦାସ ଉଧାର ଟଙ୍କା ମାଗିବାକୁ ଯାଇଥିବାବେଳେ ଜୋରଜବରଦସ୍ତ ତାଙ୍କୁ ଘରେ ପୁରାଇ ବନ୍ଦ କରିଦେଇଥିବା ଏବଂ ଜାତିଆଣ ଆକ୍ଷେପ କରିଥିବା ଅଭିଯୋଗ କରିଛନ୍ତି । ମହିଳା ଜଣକ ତାଙ୍କ ଯୌନ ନିର୍ଯାତନା ଅଭିଯୋଗ ଆଣିଛନ୍ତି ।
