ଭାରତର ୱାଟର ଷ୍ଟ୍ରାଇକ୍‌ରେ ଛାନିଆ ପାକିସ୍ତାନ

ନୂଆଦିଲ୍ଲୀ: ଭାରତର ୱାଟର ଷ୍ଟ୍ରାଇକ୍‌ରେ ଛାନିଆ ପାକିସ୍ତାନ । ପାକିସ୍ତାନ ଅଭିଯୋଗ କରିଛି, ଭାରତ ଚେନାବ ନଦୀର ଜଳପ୍ରବାହକୁ ଅବରୋଧ କରି ପ୍ରାରମ୍ଭିକ ଖରିଫ ଫସଲ ଋତୁକୁ ବିପଦରେ ପକାଇଛି । ପାକିସ୍ତାନର ଇଣ୍ଡସ ରିଭର ସିଷ୍ଟମ୍‌ ଅଥରିଟି ଚେନାବ ନଦୀର ମାରାଲା ହେଡଓ୍ୱାର୍କସରେ ଜଳପ୍ରବାହରେ ହଠାତ୍ ହ୍ରାସ ନେଇ ଗଭୀର ଚିନ୍ତା ପ୍ରକାଶ କରିଛି । ରବିବାର ୩୫ ହଜାର ୬୦୦ କ୍ୟୁସେକ୍‌ ଥିବା ଜଳସ୍ତର ସୋମବାର ସକାଳେ ୩ ହଜାର ୧୭୭ କ୍ୟୁସେକ୍‌କୁ ଖସି ଆସିଛି, ଯାହା ପ୍ରାୟ ୯୦% ହ୍ରାସ ଦର୍ଶାଉଛି । ଏହା ପାକିସ୍ତାନର ପଞ୍ଜାବରେ କୃଷି ଉପରେ ଗୁରୁତର ପ୍ରଭାବ ପକାଇବ, ଯାହା ଚେନାବରୁ ନିର୍ଭରଶୀଳ । ଭାରତ ପହଲଗାମ୍‌ ଆତଙ୍କବାଦୀ ଆକ୍ରମଣ ପରେ ଇଣ୍ଡସ ଓ୍ୱାଟର ଚୁକ୍ତିକୁ ସ୍ଥଗିତ ରଖି ଜମ୍ମୁର ବାଗଲିହାର ଓ ସାଲାଲ ଡ୍ୟାମ୍‌ର ଗେଟ୍ ବନ୍ଦ କରିଦେଇଛି । ଆଇଆର୍‌ଏସ୍‌ଏ ଅନୁଯାୟୀ, ଏହା ପ୍ରାରମ୍ଭିକ ଖରିଫ୍‌ ଋତୁରେ ୨୧% ଜଳ ଅଭାବ ସୃଷ୍ଟି କରିପାରେ, ଯାହା ପାକିସ୍ତାନର କୃଷି ଉପରେ ବିପର୍ଯ୍ୟୟ ଆଣିବ । ଖରିଫ୍‌ ଫସଲ ଯଥା: ଧାନ, ମକା ଓ କପା ଉପରେ ଏହାର ପ୍ରଭାବ ପଡ଼ିବ, ଯାହା ଆଗରୁ ହିଁ ୨୧% ଅଭାବର ସମ୍ମୁଖୀନ ହେଉଛି ।