ବାରାଣସୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବାସୀଙ୍କୁ ଚାରୋଟି ନୂତନ ବନ୍ଦେ ଭାରତ ଟ୍ରେନର ଉପହାର ପ୍ରଦାନ କରିଛନ୍ତି।ଶନିବାର ବନାରସ ରେଳ ଷ୍ଟେସନରେ ଚାରୋଟି ବନ୍ଦେ ଭାରତ ଟ୍ରେନ୍କୁ ପତାକା ଦେଖାଇ ଶୁଭାରମ୍ଭ କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ବାରାଣସୀ-ଖଜୁରାହୋ, ଲକ୍ଷ୍ନୌ-ସହାରନପୁର, ଫିରୋଜପୁର-ଦିଲ୍ଲୀ ଏବଂ ଏର୍ଣ୍ଣାକୁଲମ-ବେଙ୍ଗାଲୁରୁ ରୁଟରେ ଚାଲିବା ସମୟରେ ପ୍ରଧାନମନ୍ତ୍ରୀ ମୋଦି ବ୍ୟକ୍ତିଗତ ଭାବରେ ଏହି ଟ୍ରେନଗୁଡ଼ିକୁ ପତାକା ଦେଖାଇ ଶୁଭାରମ୍ଭ କରିଛନ୍ତି। ପାତାକା ଦେଖାଇବା ପରେ ପ୍ରଧାନମନ୍ତ୍ରୀ ତାଙ୍କ ଭାଷଣରେ ବାରଣାସୀର ବିକାଶ ପାଇଁ କରାଯାଉଥିବା ବିଭିନ୍ନ କାର୍ଯ୍ୟ ବିଷୟରେ ବିସ୍ତୃତ ଭାବରେ ଉଲ୍ଲେଖ କରିଛନ୍ତି। ‘ବିକଶିତ କାଶୀରୁ ବିକଶିତ ଭାରତ’ ମନ୍ତ୍ରକୁ ସାକାର କରିବା ଲକ୍ଷ୍ୟ ରହିଛି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ।
ସେ କହିଛନ୍ତି, “‘ବିକଶିତ କାଶୀରୁ ବିକଶିତ ଭାରତ’ ମନ୍ତ୍ରକୁ ସାକାର କରିବା ପାଇଁ, ଆମେ ଏଠାରେ ବିଭିନ୍ନ ଭିତ୍ତିଭୂମି ପ୍ରକଳ୍ପ ଉପରେ ନିରନ୍ତର କାର୍ଯ୍ୟ କରୁଛୁ। ଆଜି, କାଶୀରେ ଭଲ ହସ୍ପିଟାଲ, ଭଲ ରାସ୍ତା, ଗ୍ୟାସ ପାଇପଲାଇନ ଠାରୁ ଆରମ୍ଭ କରି ଇଣ୍ଟରନେଟ ସଂଯୋଗ ପର୍ଯ୍ୟନ୍ତ ସୁବିଧାଗୁଡ଼ିକୁ ନିରନ୍ତର ବିସ୍ତାର କରାଯାଉଛି। ବିକାଶ ହେଉଛି ଏବଂ ଗୁଣାତ୍ମକ ଉନ୍ନତି ମଧ୍ୟ ହେଉଛି। ରୋପୱେ ଉପରେ କାମ ଦ୍ରୁତ ଗତିରେ ଚାଲିଛି। ଆମେ ଏବେ ଗଞ୍ଜାରୀ ଏବଂ ସିଗ୍ରା ଷ୍ଟାଡିୟମ ଭଳି କ୍ରୀଡା ଭିତ୍ତିଭୂମି ମଧ୍ୟ ପାଇଛୁ।”
ପ୍ରଧାନମନ୍ତ୍ରୀ କହିଛନ୍ତି, “ଆମ ସରକାରଙ୍କ ପ୍ରୟାସ ହେଉଛି କାଶୀରେ ସ୍ୱାସ୍ଥ୍ୟ ସେବାକୁ ନିରନ୍ତର ଉନ୍ନତ କରିବା। ୧୦ ରୁ ୧୧ ବର୍ଷ ପୂର୍ବେ ପରିସ୍ଥିତି ଏପରି ଥିଲା ଯେ ଯଦି ଲୋକଙ୍କୁ କୌଣସି ଗମ୍ଭୀର ରୋଗର ଚିକିତ୍ସାର ଆବଶ୍ୟକତା ପଡ଼େ, ତେବେ ସେମାନଙ୍କ ପାଖରେ କେବଳ ବିଏଚୟୁ(ବନାରସ ହିନ୍ଦୁ ବିଶ୍ୱବିଦ୍ୟାଳୟ) ବିକଳ୍ପ ଥିଲା। ରୋଗୀଙ୍କ ସଂଖ୍ୟା ଏତେ ଅଧିକ ଥିଲା ଯେ ସାରା ରାତି ଅପେକ୍ଷା କରିବା ପରେ ମଧ୍ୟ ସେମାନେ ଚିକିତ୍ସା ପାଇପାରୁ ନଥିଲେ। କର୍କଟ ରୋଗ ଭଳି ଗମ୍ଭୀର ରୋଗ ପାଇଁ ଲୋକମାନେ ନିଜର ଜମି ଏବଂ ଚାଷଜମି ବିକ୍ରି କରି ଚିକିତ୍ସା ପାଇଁ ମୁମ୍ବାଇ ଯାଉଥିଲେ। ଆଜି, ଆମ ସରକାର କାଶୀବାସୀଙ୍କ ଏହି ସମସ୍ତ ଚିନ୍ତାକୁ ଦୂର କରିବା ପାଇଁ କାମ କରିଛି।”
ପ୍ରଧାନମନ୍ତ୍ରୀ କହିଛନ୍ତି, “କର୍କଟ ରୋଗ ପାଇଁ ମହାମନା କର୍କଟ ହସ୍ପିଟାଲ, ଚକ୍ଷୁ ଚିକିତ୍ସା ପାଇଁ ଶଙ୍କର ନେତ୍ରାଳୟ, ବିଏଚୟୁରେ ଅତ୍ୟାଧୁନିକ ଟ୍ରମା ସେଣ୍ଟର ଏବଂ ଶତାବ୍ଦୀ ହସ୍ପିଟାଲ, ଏବଂ ପାଣ୍ଡେପୁରର ଡିଭିଜନାଲ ହସ୍ପିଟାଲ ଏହି ସମସ୍ତ ହସ୍ପିଟାଲ କାଶୀ ଏବଂ ପୂର୍ବାଞ୍ଚଳ ସହିତ ଆଖପାଖ ରାଜ୍ୟ ପାଇଁ ଏକ ବରଦାନ ପାଲଟିଛି। ଏହି ହସ୍ପିଟାଲଗୁଡ଼ିକରେ ଆୟୁଷ୍ମାନ ଭାରତ ଏବଂ ଜନ ଔଷଧି କେନ୍ଦ୍ର ଯୋଗୁଁ ଗରିବ ଲୋକମାନେ ଲକ୍ଷ ଲକ୍ଷ କୋଟି ଟଙ୍କା ସଞ୍ଚୟ କରୁଛନ୍ତି। ଗୋଟିଏ ପଟେ ଲୋକଙ୍କ ଚିନ୍ତା ଶେଷ ହୋଇଛି। ଅନ୍ୟପଟେ, କାଶୀ ଏହି ସମଗ୍ର ଅଞ୍ଚଳର ‘ସ୍ୱାସ୍ଥ୍ୟ ରାଜଧାନୀ’ ଭାବରେ ପରିଚିତ ହୋଇଛି।” ପ୍ରଧାନମନ୍ତ୍ରୀ ଗୁରୁତ୍ୱାରୋପ କରି କହିଥିଲେ, “ଆମକୁ କାଶୀର ବିକାଶର ଏହି ଗତି ଏବଂ ଶକ୍ତିକୁ ବଜାୟ ରଖିବାକୁ ପଡିବ ଯାହା ଦ୍ଵାରା ମହାନ କାଶୀ ମଧ୍ୟ ଦ୍ରୁତ ଗତିରେ ଏକ ସମୃଦ୍ଧ କାଶୀରେ ପରିଣତ ହେବ ଏବଂ ସାରା ବିଶ୍ୱରୁ କାଶୀକୁ ଆସୁଥିବା ବ୍ୟକ୍ତି ବାବା ବିଶ୍ୱନାଥଙ୍କ ଏହି ନଗରୀରେ ଏକ ଭିନ୍ନ ଶକ୍ତି, ଏକ ଭିନ୍ନ ଉତ୍ସାହ ଏବଂ ଏକ ଭିନ୍ନ ଆନନ୍ଦ ପାଇପାରିବେ।”
