ଜମି ବିବାଦ ନେଇ ବୃଦ୍ଧଙ୍କୁ ହତ୍ୟା

ଅନୁଗୁଳ: ଅନୁଗୁଳ ସଦର ଥାନା ଅନ୍ତର୍ଗତ ଛେଳିଆପଡ଼ା ଗାଁରେ ଜମିବାଡ଼ି ବିବାଦକୁ ନେଇ ଜଣେ ବୃଦ୍ଧଙ୍କୁ ହତ୍ୟା କରାଯାଇଛି । ସୂଚନା ଯେ, ଗାଁର ଯୁଧିଷ୍ଠିର ପ୍ରଧାନ(୬୦)ଙ୍କ ପଡ଼ୋଶୀ ରସାନନ୍ଦ ପ୍ରଧାନଙ୍କ ପରିବାର ସହ ଜମିଜମାକୁ ନେଇ ପୂର୍ବରୁ ଶତ୍ରୁତା ଲାଗିରହିଥିଲା । ରବିବାର ସକାଳେ ଏହି କଥାକୁ ନେଇ ଯୁଧିଷ୍ଠିର ଓ ପଡ଼ୋଶୀ ରସାନନ୍ଦଙ୍କ ପୁଅ ଜିତୁ ପ୍ରଧାନ(୨୫), ସ୍ତ୍ରୀ ଦ୍ରୌପଦୀ ପ୍ରଧାନ(୬୦) ଓ ଉପମି ପ୍ରଧାନଙ୍କ ମଧ୍ୟରେ ଝଗଡ଼ା ହୋଇଥିଲା । ଝଗଡ଼ା ବଢ଼ିବାରୁ ଜିତୁ ଏକ ଠେଙ୍ଗାରେ ଯୁଧିଷ୍ଠିରଙ୍କ ମୁଣ୍ଡକୁ ପିଟିଦେବାରୁ ତାଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା । ଏନେଇ ଯୁଧିଷ୍ଠିରଙ୍କ ପୁଅ କ୍ଷୀରୋଦ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପାଇ ପୁଲିସ ଏକ ହତ୍ୟା ମାମଲା ରୁଜୁ କରି ଶବ ବ୍ୟବଚ୍ଛେଦ ପାଇଁ ପଠାଇଛି । ୩ ଅଭିଯୁକ୍ତଙ୍କୁ ଥାନାରେ ଅଟକ ରଖି ପଚରାଉଚରା କରୁଛି ।