ନୂଆଦିଲ୍ଲୀ: ଭେଲୋରର ସରକାରୀ ମେଡିକାଲ କଲେଜ ହସ୍ପିଟାଲରୁ ଏକ ଅଭାବନୀୟ ଘଟଣା ସାମ୍ନାକୁ ଆସିଛି । ଜଣେ ୪୦ ବର୍ଷୀୟ ଷ୍ଟାଫ୍ ନର୍ସ ଏକ ନବଜାତ ଶିଶୁର ଡାହାଣ ବୁଢ଼ା ଆଙ୍ଗୁଠିର ଅଗ୍ରଭାଗ ଭୁଲବଶତଃ କାଟି ଦେଇଥିବା ଜଣାପଡିଛି । ଏହି ଘଟଣା ମେ ୩୦ ତାରିଖର ହୋଇଥିବା ବେଳେ ଫୋନରେ କଥା ହୋଇ ଭୁଲ ବଶତଃ ଆଙ୍ଗୁଳି କାଟିଦେଇଥିବା ଜଣାପଡ଼ିଛି । ଶନିବାର ଭେଲୋର ତାଲୁକ ପୋଲିସ ତାଙ୍କ ବିରୁଦ୍ଧରେ ମାମଲା ରୁଜୁ କରିଛି । ସେ ଶିଶୁଟିର ହାତରୁ କାନୁଲା ବାହାର କରୁଥିବା ସମୟରେ ଏହା ଘଟିଥିଲା। ପୋଲିସ କହିଛି ଯେ ଷ୍ଟାଫ୍ ନର୍ସ ଜଣକ ହେଉଛନ୍ତି ଏସ୍. ଅରୁଣା ଦେବୀ । ସେ ଭେଲୋରର ସରକାରୀ ହସ୍ପିଟାଲ ନିକଟବର୍ତ୍ତୀ ଆଡୁକମ୍ପରାଇ ଗାଁର ବାସିନ୍ଦା। ସେ ଗତ ସାତ ବର୍ଷ ଧରି ହସ୍ପିଟାଲରେ କାର୍ଯ୍ୟ କରୁଛନ୍ତି ।
ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ ଭି. ନିବେଥା (୨୪) ମେ ୨୪ ତାରିଖରେ ହସ୍ପିଟାଲରେ ଏକ ପୁତ୍ର ସନ୍ତାନକୁ ଜନ୍ମ ଦେଇଥିଲେ। ସେବେଠାରୁ, ମା’ ଏବଂ ଶିଶୁ ସରକାରୀ ହସ୍ପିଟାଲର ପ୍ରସବ ୱାର୍ଡରେ ଥିଲେ । ଶୁକ୍ରବାର ଦିନ, ଯେତେବେଳେ ଦେବୀ ଶିଶୁଟି ଉପରେ ଲାଗିଥିବା ମେଡିକାଲ୍ ଟେପ୍ ବାହାର କରିବାକୁ ଚେଷ୍ଟା କରିଥିଲେ, ସେ ଭୁଲବଶତଃ କଇଁଚି ବ୍ୟବହାର କରିଥିଲେ। ଟେପ୍ କାଟିବା ପରିବର୍ତ୍ତେ, ସେ ଶିଶୁଟିର ଡାହାଣ ବୁଢ଼ା ଆଙ୍ଗୁଠିର ଅଗ୍ରଭାଗ କାଟି ଦେଇଥିବା ଅଭିଯୋଗ ହୋଇଛି। ଘଟଣାଟି ସକାଳ ପ୍ରାୟ ୧୦ଟା ସମୟରେ ଘଟିଥିଲା, ପୋଲିସ କହିଛି। ତା’ପରେ ଶିଶୁଟିକୁ ଚେନ୍ନାଇର ସରକାରୀ ଷ୍ଟାନଲି ହସ୍ପିଟାଲକୁ ନିଆଯାଇଥିଲା ଯେଉଁଠାରେ ଡାକ୍ତରମାନେ ଅସ୍ତ୍ରୋପଚାର କରିଥିଲେ । ଶିଶୁଟିର ଜେଜେମାଆ ଭି. ପୁଷ୍ପା (୫୦)ଙ୍କ ଅଭିଯୋଗ ଆଧାରରେ, ଭେଲୋର ତାଲୁକ ପୋଲିସ ଭାରତୀୟ ନ୍ୟାୟ ସଂହିତା ଅଧୀନରେ ଦେବୀଙ୍କ ବିରୁଦ୍ଧରେ ଅବହେଳା ପାଇଁ ଏକ ମାମଲା ରୁଜୁ କରିଛି ।
