ମୁମ୍ବାଇ : ମୁମ୍ବାଇଠାରେ ସୋମବାର ଖେଳାଯାଇଥିବା ଆଇପିଏଲର ଏକ ଲିଗ୍ ମ୍ୟାଚରେ କୋଲକାତାକୁ ୮ ୱିକେଟରେ ପରାସ୍ତ କରିଛି ମୁମ୍ବାଇ । କୋଲକାତା ଦ୍ୱାରା ରଖାଯାଇଥିବା ୧୧୭ ରନର ଲକ୍ଷ୍ୟକୁ ମୁମ୍ବାଇ ୧୨.୫ ଓଭରରେ ୨ ୱିକେଟ ହରାଇ ହାସଲ କରିନେଇଥିଲା । ଦଳପକ୍ଷରୁ ରିୟାନ ରିକଲଟନ ୬୨ରନ କରିଥିବାବେଳେ ରୋହିତ ଶର୍ମା ୧୩ ଓ ସୂର୍ଯ୍ୟକୁମାର ଯାଦବ ୨୭ ରନ କରିଥିଲେ ।
ଏହି ମ୍ୟାଚରେ ମୁମ୍ବାଇ ଇଣ୍ଡିଆନ୍ସ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା । କୋଲକାତା ଦଳ ଆରମ୍ଭରୁ ହିଁ ଦୁଇଟି ୱିକେଟ ହରାଇ ସଂକଟରେ ପଡ଼ିଯାଇଥିଲା ଓ ଶେଷ ପର୍ଯ୍ୟନ୍ତ ସେଥିରୁ ଉଧୁରି ପାରିନଥିଲା । ଦଳର ସ୍କୋର ମାତ୍ର ୨ ରନ ଥିବାବେଳେ ଦୁଇଜଣ ବ୍ୟାଟ୍ସମ୍ୟାନ କ୍ୱିଣ୍ଟନ ଡିକକ୍ ଓ ସୁନୀଲ ନାରିନ ପାଭିଲିୟନ ଫେରିଥିଲେ । ଏହା ପରେ ବି ମଧ୍ୟକ୍ରମ ବ୍ୟାଟ୍ସମ୍ୟାନମାନେ ଅଧିକ ସମୟ ତିଷ୍ଠି ପାରିନଥିଲେ ଓ ଦଳ ନିୟମିତ ବ୍ୟବଧାନରେ ୱିକେଟ ହରାଇଚାଲିଥିଲା । ଦଳ ପକ୍ଷରୁ ଅଗ୍ରିସ ରଘୁବଂଶୀ ୨୬ ରନ କରିଥିବାବେଳେ ରମଣଦୀପ ସିଂ ୨୨ ରନ କରିଥିଲେ । ସେହିପରି ମନୀଷ ପାଣ୍ଡେ ୧୯ ରନ ଓ ରିଙ୍କୁ ସିଂ ୧୭ ରନ କରିଥିଲେ । ମୁମ୍ବାଇ ପକ୍ଷରୁ ଅଶ୍ୱୀନୀ କୁମାର ୪ଟି ୱିକେଟ ନେଇଥିବାବଳେ ଦିପକ ଚହର ୨ଟି ୱିକେଟ ନେଇଥିଲେ । ଟ୍ରେଣ୍ଟ ବୋଲଟ୍, ହାର୍ଦ୍ଦିକ ପାଣ୍ଡ୍ୟା, ବିଗ୍ନେଶ ପୁଥୁର, ମିଚେଲ ସାଣ୍ଟନର ଗୋଟିଏ ଲେଖାଏଁ ୱିକେଟ ନେଇଥିଲେ ।