ଅହମଦାବାଦ: ଗୁଜରାଟର ଅହମଦାବାଦରେ କଂଗ୍ରେସ ଦଳର ୮୪ତମ ଅଧିବେଶନ ଚାଲିଛି। ଏହି ଅବସରରେ, ଦେଶ ସାରାରୁ ୧୭୦୦ରୁ ଅଧିକ କଂଗ୍ରେସ ପ୍ରତିନିଧି ଅଂଶଗ୍ରହଣ କରୁଛନ୍ତି। ଅଧିବେଶନର ଦ୍ୱିତୀୟ ଦିନରେ, କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେ କେନ୍ଦ୍ରର ମୋଦି ସରକାରଙ୍କ ଉପରେ କଡା ଭାଷାରେ ସମାଲୋଚନା କରିଥିଲେ। ସେ କହିଛନ୍ତି ଯେ ସଦ୍ୟ ସମାପ୍ତ ସଂସଦର ବଜେଟ ଅଧିବେଶନରେ ସରକାର ମନମୁଖୀ କାର୍ଯ୍ୟ କରିଛନ୍ତି। ଖର୍ଗେ ଲୋକସଭା ବାଚସ୍ପତିଙ୍କ ଭୂମିକା ଉପରେ ପ୍ରଶ୍ନ ଉଠାଇ କହିଛନ୍ତି ଯେ ରାହୁଲ ଗାନ୍ଧୀଙ୍କୁ କହିବାକୁ ଦିଆଯାଇନାହିଁ, ଯାହା ଗଣତନ୍ତ୍ର ପାଇଁ ଅତ୍ୟନ୍ତ ଲଜ୍ଜାର ବିଷୟ।
ମଲ୍ଲିକାର୍ଜୁନ ଖଡ଼ଗେ ମୋଦୀ ସରକାରଙ୍କୁ କଡା ଟାର୍ଗେଟ କରିଛନ୍ତି। ସେ କହିଥିଲେ, “ସକାଳ ୫ଟା ପର୍ଯ୍ୟନ୍ତ ସଂସଦ ଅଧିବେଶନ ଚାଲିଥିଲା, କିନ୍ତୁ ସରକାରଙ୍କ ପାଖରେ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା କରିବା ପାଇଁ ସମୟ ନଥିଲା। ଏହା ଦର୍ଶାଉଛି ଯେ ଏହି ଲୋକମାନେ ଗଣତନ୍ତ୍ରକୁ କେତେ ଗମ୍ଭୀରତାର ସହିତ ନିଅନ୍ତି।” ଖଡ଼ଗେ କହିଛନ୍ତି ଯେ ଆମେରିକା ଭାରତ ଉପରେ ୨୬ ପ୍ରତିଶତ ଶୁଳ୍କ ଲଗାଇଥିଲା, କିନ୍ତୁ ଏହାକୁ ସଂସଦରେ ଆଲୋଚନା କରିବାକୁ ଦିଆଯାଇ ନଥିଲା। ସେ ଏହା ମଧ୍ୟ ଅଭିଯୋଗ କରିଛନ୍ତି ଯେ ଦେଶର ସରକାରୀ ସମ୍ପତ୍ତି ଧୀରେ ଧୀରେ ଘରୋଇ କମ୍ପାନୀଗୁଡ଼ିକୁ ବିକ୍ରି କରାଯାଉଛି।
ନିଜର କଥାକୁ ଆହୁରି ଆଗକୁ ବଢାଇ ଖଡ଼ଗେ କହିଛନ୍ତି, “ଯଦି ଏହି ପରିସ୍ଥିତି ଜାରି ରହେ, ତେବେ ଏପରି ଏକ ଦିନ ଆସିବ ଯେତେବେଳେ ମୋଦି ସରକାର ଏବଂ ନିଜେ ମୋଦି ଜୀ ଦେଶର ସମ୍ପତ୍ତି ବିକ୍ରି କରି ଚାଲିଯିବେ। ମୁଁ ଏହା ସ୍ପଷ୍ଟ ଭାବରେ କହୁଛି।” କଂଗ୍ରେସ ଅଧ୍ୟକ୍ଷ ଆହୁରି କହିଛନ୍ତି, “ଏହା ବିମାନବନ୍ଦର ହେଉ, ଖଣି ହେଉ, ମିଡିଆ ହାଉସ୍ ହେଉ କିମ୍ବା ଟେଲିକମ୍ ହେଉ, ଏହି ସରକାର ଏହାକୁ ଏହାର ଶିଳ୍ପପତି ବନ୍ଧୁମାନଙ୍କୁ ଦେଉଛି, ଯାହା ଆମର ଜାତୀୟ ସୁରକ୍ଷା ପାଇଁ ମଧ୍ୟ ବିପଦ।”
ସେ ଆହୁରି କହିଛନ୍ତି, “ସେମାନେ କଂଗ୍ରେସକୁ ଗାଳି ଦେବା ବ୍ୟତୀତ ଆଉ କିଛି କରନ୍ତି ନାହିଁ। ନିର୍ବାଚନ ସଂସ୍ଥାଗୁଡ଼ିକ ମଧ୍ୟ ସେମାନଙ୍କ ନିୟନ୍ତ୍ରଣରେ ଅଛନ୍ତି। ନିର୍ବାଚନରେ ଘୋଟାଲା ହେଉଛି। ବିଶ୍ୱର ବିକଶିତ ଦେଶଗୁଡ଼ିକ ଇଭିଏମ୍ ପରିତ୍ୟାଗ କରି ବାଲଟ୍ ପେପର୍ ଆଡକୁ ମୁହାଁଇଛନ୍ତି। କିନ୍ତୁ ଆମେ ଇଭିଏମ୍ ଉପରେ ଚଳୁଛୁ। ଏହା ସବୁ ଠକେଇ, ମୁଁ ଏହା କହିବି। ଆପଣ ଏପରି ଏକ ପ୍ରଯୁକ୍ତିବିଦ୍ୟା ସୃଷ୍ଟି କରିଛନ୍ତି ଯାହା କେବଳ ଆପଣଙ୍କ ପାଇଁ ଲାଭଦାୟକ। ଯଦି ଆପଣ ଏପରି ପ୍ରଯୁକ୍ତିବିଦ୍ୟା ସୃଷ୍ଟି କରି ବିରୋଧୀଙ୍କୁ ଦମନ କରିବାକୁ ଚାହାଁନ୍ତି, ତେବେ କାଲି ଦେଶର ଯୁବପିଢ଼ି ଉଠି କହିବେ ଯେ ଆମେ ବାଲଟ୍ ପେପର୍ ଚାହୁଁ, ଇଭିଏମ୍ ନୁହେଁ।”
ଖଡ଼ଗେ ଆହୁରି କହିଛନ୍ତି, “୧୧ ବର୍ଷ ମଧ୍ୟରେ ବିରୋଧୀ ରାଜ୍ୟଗୁଡ଼ିକ ସହିତ ସାବତ ମା’ ଭଳି ବ୍ୟବହାର କରିଛନ୍ତି ମୋଦି ସରକାର। କେନ୍ଦ୍ର-ରାଜ୍ୟ ସମ୍ପର୍କ ଏତେ ଭଲ ଥିଲା ଯେ ଯେକେହି ଆସି କିଛି ମାଗିପାରୁଥିଲେ। ମୋଦୀଜୀଙ୍କ ସରକାରର ସତ୍ୟ ହେଉଛି, ବଜେଟରେ ଯାହା ଘୋଷଣା କରାଯାଇଛି, ମୋଦୀ ତାହା ମଧ୍ୟ କେବେ ଦିଅନ୍ତି ନାହିଁ। ଆମର ମୁଖ୍ୟମନ୍ତ୍ରୀମାନେ ନରେଗା ପାଇଁ ପାଣ୍ଠି ପାଇଁ ଆଗ୍ରହୀ, କିନ୍ତୁ ମୋଦୀ ସରକାର ସେଥିପ୍ରତି ଧ୍ୟାନ ଦିଅନ୍ତି ନାହିଁ କାରଣ ସେମାନଙ୍କର ବନ୍ଧୁମାନେ ଧନୀ। ଯିଏ ଧନୀଙ୍କ ବନ୍ଧୁ, ସେ ଗରିବଙ୍କ ବନ୍ଧୁ ହୋଇପାରିବ ନାହିଁ।”
ବିଜେପି ୧୫୦ଟି ଆସନରେ ପ୍ରତିଦ୍ୱନ୍ଦ୍ୱିତା କରିଛି, ୧୩୮ଟି ଆସନରେ ବିଜୟୀ ହୋଇଛି। ମହାରାଷ୍ଟ୍ରରେ ଯେଉଁ ଠକେଇ ହୋଇଥିଲା ତାହା ଗଣତନ୍ତ୍ରକୁ ନଷ୍ଟ କରିବା ପାଇଁ କରାଯାଇଥିଲା। ଆମର ଓକିଲ ଏବଂ ନେତାମାନେ ଭୋଟର ତାଲିକାରେ ହୋଇଥିବା ତ୍ରୁଟି ଉପରେ କାମ କରିଥିଲେ। ଚୋରି କରୁଥିବା ଚୋର କେବେ ନା କେବେ ଧରାପଡ଼େ। ଆଜି ୧୫ ଲକ୍ଷ ଲୋକ ବିଦେଶରେ ବସବାସ କରିଛନ୍ତି। ଚାକିରି ପାଇଁ ବିଦେଶ ଯାଇଥିବା ଯୁବକମାନଙ୍କୁ ଆମେରିକାରୁ ଶିକୁଳିରେ ବାନ୍ଧି ଭାରତକୁ ଫେରାଇ ଦିଆଯାଉଛି। କିନ୍ତୁ ଆମର ପ୍ରଧାନମନ୍ତ୍ରୀ ନୀରବ ରହିଛନ୍ତି। ଯେତେବେଳେ ଲୋକଙ୍କ ପ୍ରତି ଅନ୍ୟାୟ ହୁଏ, ପ୍ରଧାନମନ୍ତ୍ରୀ ଚୁପ୍ ହୋଇଯାଆନ୍ତି। ଶାସକ ଦଳ ବାରମ୍ବାର କହିବାକୁ ଚେଷ୍ଟା କରୁଛି ଯେ ଭାରତର ବିକାଶ ୨୦୧୪ ପରେ ହୋଇଛି। ଚଣ୍ଡିଗଡ଼ ପରେ ଦେଶର ସବୁଠାରୁ ଆଧୁନିକ ସହର ଗାନ୍ଧୀନଗର କଂଗ୍ରେସ ଯୁଗରେ ନିର୍ମିତ ହୋଇଥିଲା।
“ଆପଣ ୧୧ ବର୍ଷ ଧରି ପ୍ରଧାନମନ୍ତ୍ରୀ, ୧୩ ବର୍ଷ ଧରି ମୁଖ୍ୟମନ୍ତ୍ରୀ ରହି ଆପଣ କ’ଣ ଏଠାରେ ଦାରିଦ୍ର୍ୟ ଦୂର କରିଥିଲେ? ଜଣେ ଦଳିତ ବ୍ୟକ୍ତି, ଯିଏ ତାଙ୍କ ସମୟରେ ରାମନବମୀରେ ମନ୍ଦିର ଯାଇଥିଲେ, ସେ ବାହାରିକୁ ଆସିବା ପରେ, ସେହି ସ୍ଥାନକୁ ଗଙ୍ଗା ଜଳରେ ସୁଦ୍ଧ କରିଥିଲେ। ଯେଉଁମାନେ ଦଳିତ ସେମାନେ ମଧ୍ୟ ହିନ୍ଦୁ”, କହି ପ୍ରଧାନମନ୍ତ୍ରୀ ମୋଦୀଙ୍କୁ କଟାକ୍ଷ କରିଥିଲେ ଖଡ଼ଗେ।
