ଭୁବନେଶ୍ୱର : ଗୃହ ନିର୍ମାଣ ଏବଂ ନଗର ଉନ୍ନୟନ ମନ୍ତ୍ରୀ ଡକ୍ଟର କୃଷ୍ଣ ଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ସହରାଞ୍ଚଳରେ ପରିମଳ ଉନ୍ନତି ପାଇଁ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଥିଲା। ପାଞ୍ଚଟି ନଗର ନିଗମ, ପୁରୀ-କୋଣାର୍କ କ୍ଲଷ୍ଟର ଏବଂ ବୌଦ୍ଧଗଡ଼-ସୋନପୁର କ୍ଲଷ୍ଟରରେ ସିବିଜି ପ୍ଲାଣ୍ଟ ପ୍ରତିଷ୍ଠାର ସ୍ଥିତି ସମୀକ୍ଷା କରାଯାଇଥିଲା। ମନ୍ତ୍ରୀ ଡକ୍ଟର ମହାପାତ୍ର ଅଧିକାରୀମାନଙ୍କୁ ଏହି ପ୍ରକ୍ରିୟାକୁ ତ୍ୱରାନ୍ୱିତ କରିବାକୁ ପରାମର୍ଶ ଦେଇଛନ୍ତି i ପୌର ନିଗମ ଏବଂ ମନୋନୀତ ପୌରପାଳିକାରେ ସମନ୍ୱିତ ବର୍ଜ୍ୟବସ୍ତୁ ପ୍ରକ୍ରିୟାକରଣ କମ୍ପ୍ଲେକ୍ସ ସ୍ଥାପନ କରିବାକୁ ପରାମର୍ଶ ଦେଇଥିଲେ। ପରିବହନ ଏବଂ ଭିତ୍ତିଭୂମି ଖର୍ଚ୍ଚ ହ୍ରାସ କରିବା ପାଇଁ ଏହି କମ୍ପ୍ଲେକ୍ସଗୁଡ଼ିକରେ ସିବିଜି ପ୍ଲାଣ୍ଟ ସହିତ ସମସ୍ତ ପ୍ରକାରର ପ୍ରକ୍ରିୟାକରଣ ପ୍ଲାଣ୍ଟ ଅନ୍ତର୍ଭୁକ୍ତ ହେବା ଉଚିତ।
ମହାପାତ୍ର ପ୍ରାଥମିକତାରେ ଭୁବନେଶ୍ୱର ମହାନଗର ନିଗମ ଅଧୀନରେ ସମସ୍ତ ଅଚଳ ପୁରୁଣା ଶୌଚାଳୟ ଏବଂ ଇ-ଶୌଚାଳୟଗୁଡ଼ିକର ନବୀକରଣ ଏବଂ ପୁନଃନିର୍ମାଣ ପାଇଁ ନିର୍ଦ୍ଦେଶ ଦେଇଥିଲେ। ଭୁବନେଶ୍ୱରର ସୈନିକ ସ୍କୁଲ ନିକଟସ୍ଥ TTS ରେ ଜମା ହୋଇଥିବା ଅଳିଆ ପ୍ରକ୍ରିୟାକରଣକୁ ତ୍ୱରାନ୍ୱିତ କରିବା ଏବଂ ପଳାସୁଣିରେ ମେଗା ବର୍ଜ୍ୟବସ୍ତୁ ପ୍ରକ୍ରିୟାକରଣ କେନ୍ଦ୍ରକୁ ତୁରନ୍ତ କାର୍ଯ୍ୟକ୍ଷମ କରିବା ପାଇଁ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଥିଲା। ମନ୍ତ୍ରୀ ସମସ୍ତ ମହାନଗର ନିଗମ ଏବଂ ଚୟନିତ ପୌରପାଳିକାରେ ପରିମଳ ମନିଟରିଂ ପାଇଁ ଏକ ଡିଜିଟାଲ ଆପ୍ଲିକେସନ ବିକଶିତ କରିବାକୁ ପରାମର୍ଶ ଦେଇଥିଲେ, ଯାହା ବର୍ତ୍ତମାନର ଭୁବନେଶ୍ୱର ମହାନଗର ନିଗମ ଦ୍ଵାରା ବ୍ଯବହ୍ରୁତ ଆପ୍ ପରି। ସେ ଡିଜିଟାଲ ଆପକୁ ଗୃହ ଏବଂ ନଗର ଉନ୍ନୟନ (H&UD) ବିଭାଗର SUJOG ପୋର୍ଟାଲରେ ସଂହତ କରିବାକୁ ମଧ୍ୟ ପରାମର୍ଶ ଦେଇଥିଲେ ।
ଗୃହ ଏବଂ ନଗର ଉନ୍ନୟନ ବିଭାଗ ପ୍ରମୁଖ ସଚିବ ଶ୍ରୀମତୀ ଉଷା ପାଢୀ ସାର୍ବଜନୀନ ଶୌଚାଳୟର ପରିଚାଳନା ଏବଂ ରକ୍ଷଣାବେକ୍ଷଣ ଏବଂ ସହରାଞ୍ଚଳ ସେବାକୁ ସହଜ କରିବା ପାଇଁ ଦାୟୀ ସ୍ୱୟଂ ସହାୟକ ଗୋଷ୍ଠୀ (SHG) ସହିତ କାର୍ଯ୍ୟାନ୍ୱୟନକୁ ସହଜ କରିବା ପାଇଁ ସହରାଞ୍ଚଳ ସ୍ଥାନୀୟ ସଂସ୍ଥା (ULB) ସହିତ ଏକ ମଡେଲ ଚୁକ୍ତିନାମା ସେୟାର କରାଯିବା ଉଚିତ ବୋଲି ପରାମର୍ଶ ଦେଇଥିଲେ । ସମସ୍ତ ULB ରେ ପରିମଳ ଉନ୍ନତି ପ୍ରୟାସରେ ସମ୍ପ୍ରଦାୟର ସମ୍ପୃକ୍ତିକୁ ବୃଦ୍ଧି କରିବାକୁ ନିଷ୍ପତ୍ତି ନିଆଯାଇଥିଲା। ଖାରବେଳ ଭବନର ତୃତୀୟ ମହଲା ସମ୍ମିଳନୀ କକ୍ଷରେ ଅନୁଷ୍ଠିତ ବୈଠକରେ ପୌର ପ୍ରଶାସନ ନିର୍ଦ୍ଦେଶକ ଅରିନ୍ଦମ ଡାକୁଆ, ଅତିରିକ୍ତ ସଚିବ ବିନୟ ଦାଶ, କମିଶନର CMC, ସିଟି ଇଞ୍ଜିନିୟର BMC, ଅନ୍ୟାନ୍ୟ ସମ୍ପୃକ୍ତ ଅଧିକାରୀ ଏବଂ ବିକାଶ ଅଂଶୀଦାରମାନେ ଉପସ୍ଥିତ ଥିଲେ।
