ନୂଆଦିଲ୍ଲୀ: ବିଶ୍ୱବ୍ୟାପୀ ପ୍ଲାଷ୍ଟିକ୍ ବ୍ୟବହାର ଯୋଗୁଁ ମାଇକ୍ରୋପ୍ଲାଷ୍ଟିକ୍ ନିଷ୍କାସନ ସମେତ ପରିବେଶ ପ୍ରଦୂଷଣ ହେଉଛି । ବାୟୁ, ଜଳ, ମାଟି, ଖାଦ୍ୟ ଏବଂ ଏପରିକି ମାନବ ଅଙ୍ଗରେ ଏହି କ୍ଷୁଦ୍ର ପ୍ଲାଷ୍ଟିକ୍ କଣିକା ଥିବା ଜଣାଯାଇଛି । ମାଇକ୍ରୋପ୍ଲାଷ୍ଟିକ୍ ମାନବ ସ୍ୱାସ୍ଥ୍ୟ ଓ ପରିବେଶ ଉପରେ ପ୍ରତିକୂଳ ପ୍ରଭାବ ପକାଉଥିବାରୁ ଏହାକୁ ନେଇ ଗବେଷକମାନେ ଘୋର ଉଦ୍ବେଗ ପ୍ରକାଶ କରିଛନ୍ତି ଏବଂ ଏହାକୁ ବୈଶ୍ୱିକ ଜରୁରି ସ୍ୱାସ୍ଥ୍ୟ ସ୍ଥିତି ଘୋଷଣା ପାଇଁ ଆହ୍ୱାନ ଦେଇଛନ୍ତି । ରିପୋର୍ଟ ଅନୁଯାୟୀ, ବୈଜ୍ଞାନିକ ପରୀକ୍ଷଣରୁ ଜଣାପଡ଼ିଛି ଯେ ମାଇକ୍ରୋପ୍ଲାଷ୍ଟିକ୍ ମସ୍ତିଷ୍କ ସମେତ ଗୁରୁତ୍ୱପୂର୍ଣ୍ଣ ମାନବ ଅଙ୍ଗରେ ଜମା ହେଉଛି, ଯାହାଦ୍ୱାରା ଗବେଷକମାନେ ପ୍ଲାଷ୍ଟିକ୍ ପ୍ରଦୂଷଣକୁ ରୋକିବା ପାଇଁ ଅଧିକ ଜରୁରୀ ପଦକ୍ଷେପ ନେବାକୁ ଆହ୍ୱାନ ଦେଇଛନ୍ତି ।
ଏହି ଗବେଷଣାରୁ ମାନବ ଫୁସଫୁସ, ପ୍ଲାସେଣ୍ଟା, ପ୍ରଜନନ ଅଙ୍ଗ, ଯକୃତ, କିଡନୀ, ଆଣ୍ଠୁ ଓ କହୁଣୀ ଗଣ୍ଠି, ରକ୍ତନଳୀ ଓ ଅସ୍ଥିମଜ୍ଜାରେ ପ୍ଲାଷ୍ଟିକ୍ର କ୍ଷୁଦ୍ର ଅଂଶ ଦେଖିବାକୁ ମିଳିଛି । ତୁର୍କୀର କୁକୁରୋଭା ବିଶ୍ୱବିଦ୍ୟାଳୟରେ ମାଇକ୍ରୋପ୍ଲାଷ୍ଟିକ୍ ଉପରେ ଅଧ୍ୟୟନ କରୁଥିବା ସେଦାତ୍ ଗୁଣ୍ଡୋଗ୍ଡ଼ୁ କହିଛନ୍ତି ଯେ ଏହି ଗବେଷଣାର ଫଳାଫଳକୁ ଦୃଷ୍ଟିରେ ରଖି ପ୍ଲାଷ୍ଟିକ୍ ପ୍ରଦୂଷଣର ମୁକାବିଲା ପାଇଁ ବିଶ୍ୱ ଜରୁରିକାଳୀନ ପରିସ୍ଥିତି ଘୋଷଣା କରିବା ଆବଶ୍ୟକ ହୋଇପଡ଼ିଛି । ଏହି ଗବେଷଣାର ମୁଖ୍ୟ ଲେଖକ ତଥା ନ୍ୟୁ ମେକ୍ସିକୋ ବିଶ୍ୱବିଦ୍ୟାଳୟର ଔଷଧ ବିଜ୍ଞାନର ପ୍ରଫେସର ମାଥ୍ୟୁ କାମ୍ପେନ କହିଛନ୍ତି ଯେ ଗବେଷକମାନେ ୨୦୨୪ ପ୍ରାରମ୍ଭରେ ନିଆଯାଇଥିବା ମସ୍ତିଷ୍କ ନମୁନାରେ ଓଜନ ହିସାବରେ ହାରାହାରି ୦.୫% ପ୍ଲାଷ୍ଟିକ୍ ପାଇଥିଲେ ଏବଂ ଏହା ଅତ୍ୟନ୍ତ ଉଦ୍ବେଗଜନକ ।
