ନର୍ସିଂହୋମ୍‌ରେ ଭୟଙ୍କର ଅଗ୍ନିକାଣ୍ଡ: ୧୬ମୃତ

ଜାକର୍ତ୍ତା: ସୋମବାର ଇଣ୍ଡୋନେସିଆର ଉତ୍ତର ସୁଲାୱେସି ପ୍ରଦେଶର ରାଜଧାନୀ ମାନାଡୋରେ ଥିବା ଏକ ନର୍ସିଂହୋମରେ ଏକ ଭୟଙ୍କର ଅଗ୍ନିକାଣ୍ଡ ଘଟିଛି। ଏହି ଘଟଣାରେ ବର୍ତ୍ତମାନ ସୁଦ୍ଧା ୧୬ଜଣଙ୍କ ମୃତ୍ୟୁ ହୋଇଥିବା କୁହାଯାଉଛି। ସମସ୍ତ ମୃତକ ବୟସ୍କ ବର୍ଗର ବୋଲି ଜଣାପଡିଛି। ସେହିପରି ଅନେକ କିଛି ଲୋକ ଗୁରୁତର ଆହତ ହୋଇଛନ୍ତି। ଏମାନଙ୍କୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି। ଅନ୍ୟପକ୍ଷେ ଇଣ୍ଡୋନେସିଆ ପୁଲିସ ପୀଡିତମାନଙ୍କୁ ଚିହ୍ନଟ କରିବା ପ୍ରକ୍ରିୟା ଆରମ୍ଭ କରିଛି। ସିନହୁଆ ରିପୋର୍ଟ ଅନୁସାରେ ଉତ୍ତର ସୁଲାୱେସି ଆଞ୍ଚଳିକ ପୁଲିସର ଜନସମ୍ପର୍କ ମୁଖ୍ୟ ଆଲମସ୍ୟାହ ପି ହାସିବୁଆନ କହିଛନ୍ତି ଯେ, ନର୍ସିଂହୋମରେ ରବିବାର ରାତି ପ୍ରାୟ ୮:୩୬ (ସ୍ଥାନୀୟ ସମୟ) ସମୟରେ ନିଆଁ ଲାଗିଥିଲା। ତିନୋଟି ଦମକଳ ଗାଡି ଘଟଣା ସ୍ଥଳରେ ପହଞ୍ଚିବା ପରେ ରାତି ୯:୩୦ ସୁଦ୍ଧା ନିଆଁକୁ ନିୟନ୍ତ୍ରଣ କରାଯାଇଥିଲା। ପୁଲିସ ଅଧିକାରୀମାନେ ଅଞ୍ଚଳକୁ ସୁରକ୍ଷିତ ରଖିବା ଏବଂ ଉଦ୍ଧାର କାର୍ଯ୍ୟରେ ସହାୟତା କରିବା ପାଇଁ ତୁରନ୍ତ ପ୍ରତିକ୍ରିୟା ପ୍ରକାଶ କରିଥିଲେ। ବଞ୍ଚିଥିବା ଲୋକଙ୍କୁ ମାନାଡୋ ସିଟି ଆଞ୍ଚଳିକ ହସ୍ପିଟାଲ ଏବଂ ପର୍ମାଟା ବୁଣ୍ଡା ହସ୍ପିଟାଲକୁ ସ୍ଥାନାନ୍ତରିତ କରାଯାଇଥିଲା। ଫରେନସିକ୍ ଦଳ ଅଗ୍ନିକାଣ୍ଡର ପ୍ରାଥମିକ କାରଣ ନିର୍ଣ୍ଣୟ କରିବା ପାଇଁ ଅପରାଧ ଦୃଶ୍ୟ ପରୀକ୍ଷା ଏବଂ ସାକ୍ଷୀଙ୍କ ସାକ୍ଷାତକାର ସହିତ ତଦନ୍ତ ଆରମ୍ଭ କରିଛନ୍ତି। ସେହିପରି ଭୟାଙ୍ଗକାରା ହସ୍ପିଟାଲରେ ମୃତ ଶରୀରଗୁଡ଼ିକୁ ପୋଷ୍ଟମର୍ଟମ୍ ପାଇଁ ପଠାଯାଇଥିବା ବେଳେ ସେଠାରେ ସେମାନଙ୍କ ଚିହ୍ନଟ ପ୍ରକ୍ରିୟା ଚାଲିଛି ଏବଂ ପରିବାର ଲୋକଙ୍କୁ ସୂଚୀତ କରାଯାଉଛି।