ପୋଲିସ ଗ୍ରାଉଣ୍ଡ ପରିସରରେ ୬୯ ତମ ବୃତ୍ତିଗତ ପ୍ରତିଯୋଗିତାର ଶୁଭାରମ୍ଭ

ଭୁବନେଶ୍ୱର:  ଆଜି ରାଜ୍ୟ ପୋଲିସ ବାହିନୀରେ କନଷ୍ଟେବଳ  ଠାରୁ ଇନସ୍ପେକ୍ଟର ପାହ୍ୟା ପଯ୍ୟନ୍ତ କର୍ମଚାରୀଙ୍କର ବୃତ୍ତିଗତ ରରେ  ଦକ୍ଷତା ବୃଦ୍ଧି ପାଇଁ  ଏହି କାଯ୍ୟକ୍ରମ କରାଯାଇଛି । କଟକ ସ୍ଥିତ ପୋଲିସ ଗ୍ରାଉଣ୍ଡ ପରିସରରେ ୬୯ ତମ ବୃତ୍ତିଗତ ପ୍ରତିଯୋଗିତାର ଶୁଭାରମ୍ଭ ହୋଇଛି ।  ଆଜି ପୂର୍ୱାହ୍ଣରେ  ରାଜ୍ୟ ଆରକ୍ଷୀ ମହାନିର୍ଦ୍ଦେଶକ  ଶ୍ରୀ ଯୋଗେଶ ବାହାଦୂର  ଖୁରାନିଆ  ଏହି ପ୍ରତିଯୋଗିତାକୁ  ଆନୁଷ୍ଠାନିକ ଭାବେ ଉଦଘାଟନ କରିଥିଲେ । ଏହି ପ୍ରତିଯୋଗିତାରେ  ରାଜ୍ୟର ୩୪ଟି ପୋଲିସ ଜିଲ୍ଲାରୁ  ୩୧୩ ଜଣ ପ୍ରତିଯୋଗୀ  ଅଂଶ ଗ୍ରହଣ କରିଛନ୍ତି ।  ଏଥିରେ ୪୧ ଜଣ  ଇନ୍ସପେକ୍ଟର , ୪୪ ଜଣ ଏସ. ଆଇ , ୬୩ ଜଣ ଏ. ଏସ. ଆଇ ,  ୧୪୨ ଜଣ କନଷ୍ଟେବଳ  ଏବଂ ୨୩ଟି ପୋଲିସ ଶ୍ୱାନ କେ୯  ସାମିଲ ଅଛନ୍ତି ।  ଏହି ଅବସରରେ ଡିଜିପି ଶ୍ରୀ ଖୁରାନିଆ ନିଜର ମତବ୍ୟକ୍ତ ରଖିଥିଲେ । କହିଥିଲେ,  ବର୍ତ୍ତମାନ  ସମୟରେ  ଅପରାଧର ପରିଭାଷାରେ ପରିବର୍ତ୍ତନ ହୋଇଛି ।  ସାଇବର ଅପରାଧ, ସୋସିଆଲ ମିଡିଆ ଅପରାଧ , ବ୍ୟାଙ୍କ ଠକେଇ, ନାରୀ ଉପରେ  ହେଉଥିବା ଅତ୍ୟାଚାର ଭଳି ଅପରାଧକୁ ଶୀଘ୍ର ଅନୁସନ୍ଧାନ  କରି ଦୋଶୀକୁ ଦଣ୍ଡ ଦେବା ଆମର ପ୍ରାଥମିକ କର୍ତ୍ତବ୍ୟ । ଆହୁରି କହିଛନ୍ତି,  ଅତ୍ୟାଧୁନିକ ଟେକ୍ନୋଲୋଜିର  ପ୍ରୟୋଗ ସହାୟତାରେ ଓଡିଶାରେ ପୋଲିସ ବ୍ୟବସ୍ଥାରେ ପରିବର୍ତ୍ତନ ଆସିଛି ।  କେବଳ ରାଜ୍ୟ ସ୍ତରୀୟ  ସଫଳତା ହାସଲ କଲେ ଏହା ଆମ ପାଇଁ ଯଥେଷ୍ଟ ନୁହେଁ  ଆମକୁ ସର୍ୱ ଭାରତୀୟ  ବୃତ୍ତିଗତ ପ୍ରତିଯୋଗିତାରେ   ସଫଳତା ହାସଲ କରି ଓଡିଶା ପୋଲିସକୁ ଗୌରାବାନ୍ୱିତ କରିବା  ଉଚିତ ବୋଲି  ଡିଜିପି ଖୁରାନିଆ  ମତପ୍ରକାଶ କରିଥିଲେ । ଏହି ପ୍ରତିଯୋଗିତା ୩ ଦିନ ଧରି ଚାଲିବ । କମ୍ପ୍ୟୁଟର ଜ୍ଞାନ କୌଶଳର ଦକ୍ଷତା ,  ପୋଲିସ ଶ୍ୱାନଙ୍କ  କୌଶଳ ପ୍ରଦର୍ଶନ ଭଳି ପ୍ରତିଯୋଗିତା ଅନୁଷ୍ଠିତ ହେବ । ରାଜ୍ୟ ଅପରାଧ ଅନୁସନ୍ଧାନ ଶାଖାର ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ ଶ୍ରୀ ବିନୟତୋଷ ମିଶ୍ରଙ୍କ ପ୍ରତ୍ୟକ୍ଷ ତତ୍ବାବଧାନରେ ଏହି ରାଜ୍ୟସ୍ତରୀୟ ପ୍ରତିଯୋଗିତା ଆୟୋଜିତ ହେଉଛି । ଏହି ଅବସରରେ ଶ୍ରୀ ମିଶ୍ର ସ୍ଵାଗତ ଭାଷଣ ପ୍ରଦାନ କରିଥିବା ବେଳେ ଆଇ.ଜି ସଫିନ ଅହମ୍ମଦ କେ. ଧନ୍ୟବାଦ ଅର୍ପଣ କରିଥିଲେ । ଆଜିର ଏହି ଉଦଘାଟନୀ  ଉତ୍ସବରେ ରାଜ୍ୟ ପୋଲିସର ବହୁ ବରିଷ୍ଠ ପୋଲିସ ଅଧିକାରୀମାନେ ଉପସ୍ଥିତ ଥିଲେ ।