ମସ୍କୋ: ରୁଷ୍-ୟୁକ୍ରେନ୍ ଯୁଦ୍ଧ ଶେଷ ହେବ । ଏଭଳି ଏକ ସଂକେତ ଦେଇଛି ଖୋଦ୍ ରୁଷ୍ । ରିପୋର୍ଟ ଅନୁସାରେ ରୁଷ୍ ରାଷ୍ଟ୍ରପତି ଭ୍ଲାଦିମିର ପୁତିନ୍ଙ୍କ କାର୍ଯ୍ୟାଳୟ ତଥା ରାଷ୍ଟ୍ରପତି ଭବନ କ୍ରେମଲିନ୍ ପକ୍ଷରୁ ଦିଆଯାଇଥିବା ସୂଚନାନୁସାରେ ଦୀର୍ଘଦିନର ଲଢ଼େଇ ପରେ ରୁଷ୍ ଏବଂ ୟୁକ୍ରେନ ଏବେ ଶାନ୍ତି ଆଡ଼କୁ ଅଗ୍ରସର ହେଉଛନ୍ତି । ଉଭୟ ଦେଶଙ୍କ ମଧ୍ୟରେ ଦୁଇ ପର୍ଯ୍ୟାୟ ଆଲୋଚନା ପ୍ରାୟତଃ ସଫଳ ହୋଇଛି ଏବଂ ଏବେ କ୍ରେମଲିନ ଆଶା କରୁଛି ଯେ, ରୁଷ୍-ୟୁକ୍ରେନ ତୃତୀୟ ପର୍ଯ୍ୟାୟ ଆଲୋଚନାର ତାରିଖ ଶୀଘ୍ର ସ୍ଥିର ହୋଇପାରିବ । କ୍ରେମଲିନ ମୁଖପାତ୍ର ଦିମିତ୍ରୀ ପେସ୍କୋଭ ଏନେଇ ସୂଚନା ଦେଇଛନ୍ତି । ସେ କହିଛନ୍ତି ଯେ, ଆମେ ଆଶା କରୁଛୁ ଯେ, ଏଥିରେ ଶୀଘ୍ର ଏକ ସହମତି ହେବ । କ୍ରେମଲିନ ମୁଖପାତ୍ରଙ୍କ ଅନୁଯାୟୀ, ପରବର୍ତ୍ତୀ ଆଲୋଚନା ପ୍ରକ୍ରିୟାର ଗତି ୟୁକ୍ରେନ୍ ସରକାରଙ୍କ ସହଯୋଗ ଏବଂ ଆମେରିକାର ମଧ୍ୟସ୍ଥତା ପାଇଁ ପ୍ରୟାସ ଉପରେ ନିର୍ଭର କରେ ।
୨ ଜୁନ୍ରେ ହୋଇଥିବା ଚୁକ୍ତି ସତ୍ତ୍ୱେ, ରୁଷ୍ ଗଣମାଧ୍ୟମ ରିପୋର୍ଟ କରିଥିଲା ଯେ, କ୍ରେମଲିନ ଯୁଦ୍ଧବିରତି ପାଇଁ ଦୁଇଟି ପ୍ରସ୍ତାବ ଦେଇଥିଲା, ଯେଉଁଥିରେ ୟୁକ୍ରେନ୍ ନିଜ ସେନାକୁ ୪ଟି ଅଞ୍ଚଳ (ଡୋନେଟସ୍କ, ଲୁହାନସ୍କ, ଖେରସନ ଏବଂ ଜାପୋରିଝିଆ)ରୁ ପ୍ରତ୍ୟାହାର କରିବାକୁ ଦାବି କରାଯାଇଥିଲା, ଯାହାକୁ ରୁଷ୍ ନିଜର ଅଂଶ ବୋଲି ବିବେଚନା କରେ । ଏହା ବ୍ୟତୀତ ୧୦୦ ଦିନ ମଧ୍ୟରେ ୟୁକ୍ରେନରେ ରାଷ୍ଟ୍ରପତି ନିର୍ବାଚନ କରିବା ପାଇଁ ଏକ ସର୍ତ୍ତ ରଖାଯାଇଥିଲା । କିନ୍ତୁ ୟୁକ୍ରେନ ରାଷ୍ଟ୍ରପତି ଜେଲେନ୍ସ୍କି ଏହି ଦାବିଗୁଡ଼ିକୁ ଶାନ୍ତିର ଉଦ୍ଦେଶ୍ୟ ବିପରୀତ ବୋଲି କହୁଛନ୍ତି । ତାଙ୍କ ପକ୍ଷରୁ ନୂତନ କଟକଣା ଦାବି କରାଯାଇଥିଲା । ଜେଲେନ୍ସ୍କି ବିଶ୍ୱାସ କରନ୍ତି ଯେ, ଏହି ଦାବିଗୁଡ଼ିକ ପ୍ରକୃତରେ ୟୁକ୍ରେନର ଆତ୍ମସମର୍ପଣ ପାଇଁ ସର୍ତ୍ତ, ଯାହାକୁ ସେ ଗ୍ରହଣ କରିବେ ନାହିଁ । ପ୍ରକାଶ, ପ୍ରଥମ ପର୍ଯ୍ୟାୟ ଆଲୋଚନା ୧୬ ମେ’ ରେ ଇସ୍ତାନବୁଲରେ ହୋଇଥିଲା, ଯେତେବେଳେ ଦୁଇ ଦେଶ ମଧ୍ୟରେ ଦ୍ୱିତୀୟ ପର୍ଯ୍ୟାୟ ଆଲୋଚନା ୨ ଜୁନ୍ରେ ତୁର୍କୀରେ ଅନୁଷ୍ଠିତ ହୋଇଥିଲା । ଶେଷ ବୈଠକରେ ୟୁକ୍ରେନର ପ୍ରତିରକ୍ଷା ମନ୍ତ୍ରୀ ରୁସ୍ତମ ଉମାରୋଭ ତୃତୀୟ ବୈଠକ ଜୁନ୍ ଶେଷ ସପ୍ତାହରେ ଅନୁଷ୍ଠିତ ହେବା ନେଇ ପ୍ରସ୍ତାବ ଦେଇଥିଲେ, କିନ୍ତୁ ଏହା ସମ୍ଭବ ହୋଇପାରିନଥିଲା ।
