ଭୁବନେଶ୍ୱର: ୨୦୨୫ ଆର୍ଥିକ ବର୍ଷ ପାଇଁ ରାଜ୍ୟରେ ୫୮.୫୦ ଲକ୍ଷ ହେକ୍ଟର ଖରିଫ ଫସଲ ପାଇଁ ଯୋଜନା କରାଯାଇଛି I (ଏଥିମଧ୍ୟରୁ ଧାନ-୩୪.୯୪ ଲକ୍ଷ ହେକ୍ଟର ଏବଂ ଅଣ-ଧାନ ଫସଲ- ୨୩.୫୬ ଲକ୍ଷ ହେକ୍ଟର)। ତଦନୁସାରେ, ରାଜ୍ୟକୁ ସାର ଆବଣ୍ଟନ ପାଇଁ ସାର ଯୋଗାଣ ଯୋଜନା ପ୍ରସ୍ତୁତ କରାଯାଇ ଭାରତ ସରକାରଙ୍କୁ ପ୍ରଦାନ କରାଯାଇଥିଲା। ଭାରତ ସରକାର , ସମଗ୍ର ଖରିଫ ଋତୁ ପାଇଁ ମାସିକ ଫସଲ କାର୍ଯ୍ୟକ୍ରମକୁ ଆଧାର କରି ରାଜ୍ୟକୁ ବିଭିନ୍ନ ଗ୍ରେଡର ୯.୫୫ ଲକ୍ଷ ମେଟ୍ରିକ ଟନ୍ ସାର (ସରଳ ଏବଂ ଜଟିଳ ସାର) ଆବଣ୍ଟନ କରିଛନ୍ତି। ଖରିଫ କାର୍ଯ୍ୟ ଆରମ୍ଭ ହେବା ପୂର୍ବରୁ ରାଜ୍ୟ ସରକାର ମାର୍କଫେଡ଼, ପାକ୍ସ, ଲ୍ୟାମ୍ପସ (MARKFED/PACS/LAMPCS)/ ଖୁଚୁରା ଡିଲରମାନଙ୍କ ପାଖରେ ବିଭିନ୍ନ ସାର ଉପଲବ୍ଧ କରାଇବା ପାଇଁ ପର୍ଯ୍ୟାପ୍ତ ପଦକ୍ଷେପ ନେଇଛନ୍ତି ।
ଖରିଫ ଋତୁ ଆରମ୍ଭରେ, ତା ୦୧.୦୪.୨୦୨୫ ରିଖ ସୁଦ୍ଧା ବିଭିନ୍ନ ଜିଲ୍ଲାରେ ୨.୯୪ ଲକ୍ଷ ମେଟ୍ରିକ୍ ଟନ୍ ସାର (ୟୁରିଆ-୧,୪୭,୧୮୦ ମେଟ୍ରିକ୍ ଟନ୍, DAP- ୨୬,୭୦୨ ମେଟ୍ରିକ୍ ଟନ୍, MOP ୩୩,୬୩୧ ମେଟ୍ରିକ୍ ଟନ୍, SSP-୧୦,୩୫୦ ମେଟ୍ରିକ୍ ଟନ୍ ଏବଂ NP/NPK/NPKS- ୭୬,୧୦୩ ମେଟ୍ରିକ୍ ଟନ୍) ଉପଲବ୍ଧ ଥିଲା। ସାର ଯୋଗାଣ ଯୋଜନା ଅନୁଯାୟୀ, ଜୁଲାଇ ମାସ ଶେଷ ସୁଦ୍ଧା ରାଜ୍ୟକୁ ୬.୮୨ ଲକ୍ଷ ମେଟ୍ରିକ୍ ଟନ୍ ସାର ମିଳିବାର ସମ୍ଭାବନା ଅଛି, ଯେଉଁଥିରୁ ରାଜ୍ୟ ୫.୦୦ ଲକ୍ଷ ମେଟ୍ରିକ୍ ଟନ୍ ସାର ପାଇସାରିଛି। ଏହାକୁ ମିଶାଇ ଆଜି (୧୭.୦୭.୨୦୨୫) ସୁଦ୍ଧା ମୋଟ ସାରର ଉପଲବ୍ଧତା ୭.୯୪ ଲକ୍ଷ ମେଟ୍ରିକ୍ ଟନ୍ (ୟୁରିଆ-୩.୭୩ ଲକ୍ଷ ମେଟ୍ରିକ୍ ଟନ୍, DAP ୧.୩୧ ଲକ୍ଷ ମେଟ୍ରିକ୍ ଟନ୍, MOP ୦.୫୦ ଲକ୍ଷ ମେଟ୍ରିକ୍ ଟନ୍, SSP-୦.୩୦ ଲକ୍ଷ ମେଟ୍ରିକ୍ ଟନ୍ ଏବଂ NP/NPK/NPKS- ୨.୧ ଲକ୍ଷ ମେଟ୍ରିକ୍ ଟନ୍) ରହିଛି । ଉପରୋକ୍ତ ୭.୯୪ ଲକ୍ଷ ମେଟ୍ରିକ ଟନ୍ ସାର ମଧ୍ୟରୁ, ୩.୬୫ ଲକ୍ଷ ମେଟ୍ରିକ ଟନ୍ ବିଭିନ୍ନ ଗ୍ରେଡର ସାର ଚାଷୀମାନଙ୍କୁ ବିକ୍ରୟ କରାଯାଇସାରିଛି ଏବଂ ଆଜି (୧୭.୦୭.୨୦୨୫) ସୁଦ୍ଧା ବିଭିନ୍ନ ଜିଲ୍ଲାରେ ୪.୨୪ ଲକ୍ଷ ମେଟ୍ରିକ ଟନ୍ ସାର ଉପଲବ୍ଧ ଅଛି। ଏହା ଦର୍ଶାଉଛି ଯେ ରାଜ୍ୟର ବିଭିନ୍ନ ଜିଲ୍ଲାରେ ବର୍ତ୍ତମାନ ପର୍ଯ୍ୟାପ୍ତ ସାର ଉପଲବ୍ଧ ଅଛି ଏବଂ ଭାରତ ସରକାର/ଉତ୍ପାଦକ/ମାର୍କଫେଡ୍ ଏବଂ ଅନ୍ୟାନ୍ୟ ଅଂଶୀଦାରଙ୍କ ସହ ସମନ୍ୱୟ ରଖି ଖରିଫ୍ କାର୍ଯ୍ୟ ଆଧାରରେ ପର୍ଯ୍ୟାପ୍ତ ପରିମାଣର ଯୋଗାଣ ପାଇଁ ଯୋଜନା ପ୍ରସ୍ତୁତ କରିଛନ୍ତି । ଏହା ବ୍ୟତୀତ, ୨୩,୫୮୯ ମେଟ୍ରିକ ଟନ୍ ସାର ଖୁବ୍ ଶୀଘ୍ର ବିଭିନ୍ନ ଜିଲ୍ଲାରେ ପହଞ୍ଚିବା ପାଇଁ ପରିବହନରେ ଅଛି। ଏହା ସହିତ, ମାର୍କଫେଡ୍ କୁ ପର୍ଯ୍ୟାପ୍ତ ପରିମାଣର ସାର ଯୋଗାଣ କରିବାକୁ ସାର ନିର୍ମାତାମାନଙ୍କୁ ନିର୍ଦ୍ଦେଶ ଦିଆଯାଇଛି ଏବଂ ଷ୍ଟକ୍ ସ୍ଥିତି ଏବଂ ଆବଶ୍ୟକତା ଅନୁସାରେ ପାକ୍ସ / ଲ୍ୟାମ୍ପସ ଗୁଡିକୁ ବିଭିନ୍ନ ଗ୍ରେଡ୍ ର ସାର ଉପଲବ୍ଧତା ସୁନିଶ୍ଚିତ କରିବାକୁ ମାର୍କଫେଡ୍ କୁ ନିର୍ଦ୍ଦେଶ ଦିଆଯାଇଛି। ଏହା ମଧ୍ୟ ଉଲ୍ଲେଖ କରିବା ଉଚିତ ଯେ ଗତ ବର୍ଷ (୨୦୨୪ ଖରିଫ୍) ଏହି ସମୟ ମଧ୍ୟରେ ରାଜ୍ୟରେ ୭.୭୧ ଲକ୍ଷ ମେଟ୍ରିକ ଟନ୍ ବିଭିନ୍ନ ଗ୍ରେଡ୍ ସାର ଉପଲବ୍ଧ ଥିଲା ଯାହା ସୂଚାଇଥାଏ ଯେ ରାଜ୍ୟରେ ଏହି ବର୍ଷ ଅଧିକ ସାର ଉପଲବ୍ଧ ଅଛି ।
ଚାଷୀମାନେ କୌଣସି ବାଧ୍ୟବାଧକତା ବିନା ସ୍ୱାଧୀନ ଭାବେ ଆବଶ୍ୟକୀୟ ସାର କ୍ରୟ କରିପାରିବେ । ମାର୍କଫେଡ୍ ଅଧିକାରୀମାନଙ୍କୁ ମଧ୍ୟ ସେହି ଅନୁଯାୟୀ ପଦକ୍ଷେପ ନେବାକୁ ନିର୍ଦ୍ଦେଶ ଦିଆଯାଇଛି।
ସରକାରଙ୍କ ମୁଖ୍ୟ ଉଦ୍ଦେଶ୍ୟ ହେଉଛି ସଠିକ୍ ମୂଲ୍ୟରେ, ସଠିକ୍ ସ୍ଥାନରେ ଏବଂ ସଠିକ୍ ସମୟରେ ଉପଯୁକ୍ତ ଗୁଣାତ୍ମକ ସାର ଉପଲବ୍ଧତାକୁ ସୁନିଶ୍ଚିତ କରିବା। ନକଲି ସାରର ବିକ୍ରୟ/ କଳାବଜାରୀ / ଗଚ୍ଛିତ ରଖିବାକୁ ରୋକିବା ପାଇଁ, କୃଷି, ରାଜସ୍ୱ ଏବଂ ପୋଲିସ ସଂସ୍ଥାର ଅଧିକାରୀମାନଙ୍କୁ ନେଇ ଜିଲ୍ଲା ଏବଂ ବ୍ଲକ ସ୍ତରରେ ଏନଫୋର୍ସମେଣ୍ଟ ସ୍କ୍ୱାଡ୍ ଗଠନ କରାଯାଇଛି। ନିୟମିତ ଭାବରେ ସାର ଖୁଚୁରା ବିକ୍ରେତା ଏବଂ ପାଇକାରୀ ବିକ୍ରେତା ପଏଣ୍ଟଗୁଡ଼ିକର ଅଚାନକ ଯାଞ୍ଚ ଏବଂ ଚାଷୀଙ୍କ ସ୍ୱାର୍ଥ ରକ୍ଷା ପାଇଁ ଯେକୌଣସି ପ୍ରକାରର ବେଆଇନ କାର୍ଯ୍ୟକଳାପ ଯାଞ୍ଚ କରି ରାଜ୍ୟ ସାରା କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଏପର୍ଯ୍ୟନ୍ତ, ୧୯୯୩ ଖୁଚୁରା ବିକ୍ରେତା ପଏଣ୍ଟ ଯାଞ୍ଚ କରାଯାଇଛି ଏବଂ ୪୨୭ ଖୁଚୁରା ବିକ୍ରେତାଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି ଏବଂ ୮ ଟି ମାମଲାରେ ବିକ୍ରୟ ବନ୍ଦ ନୋଟିସ୍ ଜାରି କରାଯାଇଛି। ସେହିପରି, FCO ନିୟମ ଉଲ୍ଲଂଘନ ପାଇଁ ୨୫ ଟି ଡିଲର ଲାଇସେନ୍ସକୁ ନିଲମ୍ବିତ / ବାତିଲ କରାଯାଇଛି।
