ନୂଆଦିଲ୍ଲୀ: ୨୦୨୦ରେ ଗଲୱାନ୍ ସୀମା ବିବାଦ ପର ଠାରୁ ଭାରତ ଏବଂ ଚୀନ୍ ମଧ୍ୟରେ ତିକ୍ତତା ରହିଆସିଥିଲା। ଇତି ମଧ୍ୟରେ ଦୀର୍ଘ ୬ ବର୍ଷ ବିତିବାକୁ ବସିଛି। ତେବେ ବର୍ତ୍ତମାନ ସମୟରେ ଭାରତ ଏବଂ ଚୀନ୍ ମଧ୍ୟରେ କୂଟନୈତିକ ସ୍ତରରେ ସକାରତ୍ମକ ଆଲୋଚନା କାରଣରୁ ଭାରତ ଏବେ ପୁଣିଥରେ କୈଳାସ ମାନସରୋବର ଯାତ୍ରା ଆରମ୍ଭ କରିବାକୁ ଯୋଜନା କରିଛି। ଏସମ୍ପର୍କରେ ମିଳିଥିବା ସୂଚନାନୁସାରେ କୈଳାସ ମାନସରୋବର ଯାତ୍ରା ୨୦୨୫ ପାଇଁ ଆସନ୍ତା ଜୁନ୍ ମାସରୁ ପଞ୍ଜିକରଣ ଆରମ୍ଭ ହେବ ଏବଂ ଏହା ଅଗଷ୍ଟ ଯାଏ ଜାରି ରହିବ।
ବୈଦେଶିକ ମନ୍ତ୍ରଣାଳୟ ବୁଧବାର ଦିନ ଆଗାମୀ କୈଳାସ ମାନସରୋବର ଯାତ୍ରା ପାଇଁ ଦେଶ ସାରାରୁ ମିଳିଥିବା ୫,୫୦୦ ରୁ ଅଧିକ ଆବେଦନ ମଧ୍ୟରୁ କମ୍ପ୍ୟୁଟରାଇଜଡ୍ ଲକି ଡ୍ର’ ମାଧ୍ୟମରେ ମାତ୍ର ୭୫୦ ଜଣ ତୀର୍ଥଯାତ୍ରୀଙ୍କୁ ଚୟନ କରିଛି। ଏହି କମ୍ପ୍ୟୁଟରାଇଜଡ୍ ଡ୍ର ବୈଦେଶିକ ବ୍ୟାପାର ଏବଂ ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ରାଷ୍ଟ୍ରମନ୍ତ୍ରୀ କୀର୍ତ୍ତି ବର୍ଦ୍ଧନ ସିଂହଙ୍କ ଦ୍ୱାରା ପରିଚାଳିତ ହୋଇଥିଲା। ପ୍ରକାଶ କୈଳାସ ମାନସରୋବର ଯାତ୍ରା ଶେଷଥର ପାଇଁ ୨୦୧୯ରେ ଅନୁଷ୍ଠିତ ହୋଇଥିଲା। ୨୦୨୦ ବେଳକୁ ବିଶ୍ୱବ୍ୟାପୀ କରୋନା ଭୂତାଣୁ ସଂକ୍ରମଣଜନିତ ଭୟାବହ ସ୍ଥିତିକୁ ଦେଖି ଯାତ୍ରା ଉପରେ ପ୍ରତିବନ୍ଧକ ଲଗାଇଥିଲେ। ଏହାପରେ ପରେ ଚୀନ୍ ସେନା ସହ ଭାରତୀୟ ସେନାଙ୍କ ଗଲୱାନ୍ ଘାଟିରେ ହାତାହାତି ଘଟଣା ଏହି ଯାତ୍ରାକୁ ଏକ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ସ୍ଥଗିତ ରଖିଦେଇଥିଲା।
ବିଦେଶ ମନ୍ତ୍ରଣାଳୟ ରିପୋର୍ଟ ଅନୁସାରେ ଚଳିତ ବର୍ଷ ୫,୫୬୧ ଜଣ ଆବେଦନକାରୀ ସଫଳତାର ସହ ଅନଲାଇନରେ ପଞ୍ଜିକରଣ କରିଛନ୍ତି, ଯେଉଁଥିରେ ୪,୦୨୪ ପୁରୁଷ ଆବେଦନକାରୀ ଏବଂ ୧,୫୩୭ ମହିଳା ଆବେଦନକାରୀ ଅନ୍ତର୍ଭୁକ୍ତ। ପ୍ରତ୍ୟେକ ବ୍ୟାଚରେ ଦୁଇଜଣ ଯୋଗାଯୋଗ ଅଧିକାରୀ ସମେତ ୭୫୦ଜଣ ମନୋନୀତ ଆବେଦନକାରୀ ଲିପୁଲେଖ ରୁଟ୍ ଦେଇ ପ୍ରତ୍ୟେକ ୫୦ଜଣ ଯାତ୍ରୀଙ୍କ ପାଞ୍ଚଟି ବ୍ୟାଚ୍ରେ ଏବଂ ନାଥୁ ଲା ରୁଟ୍ ଦେଇ ପ୍ରତ୍ୟେକ ୫୦ଜଣ ଯାତ୍ରୀଙ୍କ ୧୦ ଟି ବ୍ୟାଚରେ ଯାତ୍ରା କରିବେ। “ଉଭୟ ରୁଟ୍ ଏବେ ସମ୍ପୂର୍ଣ୍ଣ ଭାବରେ ମୋଟର ଚଳାଚଳ କରିପାରିବ, ଏବଂ ଏଥିରେ ବହୁତ କମ୍ ଟ୍ରେକିଂ କରିବାକୁ ପଡ଼ିବ। ଅଂଶଗ୍ରହଣକାରୀମାନଙ୍କୁ ପରସ୍ପରର ଯତ୍ନ ନେବା ସହିତ ପରିବେଶର ପବିତ୍ରତାକୁ ରକ୍ଷା କରିବା ସହିତ ଦାୟିତ୍ୱ, ନମ୍ରତା ଏବଂ ସତର୍କତାର ସହିତ ତୀର୍ଥଯାତ୍ରା କରିବାକୁ ଶ୍ରୀ କୀର୍ତ୍ତି ବର୍ଦ୍ଧନ ସିଂହ ଅନୁରୋଧ କରିଛନ୍ତି।
