ଟୋକିଓ : ଜାପାନର ରାଜଧାନୀ ଟୋକିଓରେ ଜନ୍ମ ହାରରେ ଉନ୍ନତି ଆଣିବା ପାଇଁ ଏକ ନୂତନ ପଦକ୍ଷେପ ଆରମ୍ଭ କରାଯାଇଛି । ଆସନ୍ତା ବର୍ଷଠାରୁ ଏଠାରେ ଅଫିସରେ ୪ ଦିନିଆ କାର୍ଯ୍ୟ ଦିବସ ନିୟମ ଲାଗୁ କରାଯିବ । ଏହାର ଅର୍ଥ, ଏବେ ଲୋକଙ୍କୁ ସପ୍ତାହରେ କେବଳ ଚାରି ଦିନ ହିଁ କାମ କରିବାକୁ ପଡ଼ିବ । ଟୋକିଓ ଗଭର୍ଣ୍ଣର ୟୁରିକୋ କୋଇକେ ଘୋଷଣା କରିଛନ୍ତି ଯେ ଆସନ୍ତା ବର୍ଷ ଏପ୍ରିଲରୁ କର୍ମଚାରୀମାନେ ସପ୍ତାହରେ ତିନି ଦିନ ଅଫ୍ ନେଇପାରିବେ । ଗତ କିଛି ବର୍ଷ ମଧ୍ୟରେ ଦେଖାଯାଇଛି ଯେ ଲୋକମାନେ ନିଜ ପିଲାମାନଙ୍କ ପ୍ରତିପୋଷଣ ହେତୁ କ୍ୟାରିୟର ଅଧାରୁ ଛାଡ଼ିବାକୁ ବାଧ୍ୟ ହେଉଛନ୍ତି । ଲୋକଙ୍କର ସନ୍ତାନ ନ ହେବା ପଛରେ ଏହା ମଧ୍ୟ ଏକ ପ୍ରମୁଖ କାରଣ ବୋଲି କୁହାଯାଉଛି ।
କିଛି ବର୍ଷର ନୀତି ଯୋଗୁ ଦେଶର ପ୍ରଜନନ ହାର ବହୁତ ଖରାପ ସ୍ଥିତିରେ ପହଞ୍ଚିଛି । ରାଜ୍ୟପାଳ କୋଇକେ କହିଛନ୍ତି, ଏହି ସମୟ ମଧ୍ୟରେ ଆମେ କାର୍ଯ୍ୟ ପ୍ରଣାଳୀରେ ଆହୁରି ଉନ୍ନତି ଆଣିବୁ ଏବଂ ସୁନିଶ୍ଚିତ କରିବୁ ଯେ ସନ୍ତାନ ପ୍ରସବ କିମ୍ବା ସନ୍ତାନର ଯତ୍ନ ନେବା କାରଣରୁ କେହି ବି କ୍ୟାରିୟର୍ ଅଧାରୁ ନ ଛାଡ଼ନ୍ତୁ । ଜାପାନୀମାନଙ୍କ ମଧ୍ୟରେ ସନ୍ତାନ ଜନ୍ମକୁ ପ୍ରୋତ୍ସାହିତ କରିବାରେ ଏହି ପଦକ୍ଷେପ ସହାୟକ ହେବ । ଟୋକିଓ ପ୍ରଶାସନ ମୁତାବକ, ଯେଉଁ ମାଆବାପାଙ୍କ ପିଲାମାନେ ପ୍ରାଥମିକ ବିଦ୍ୟାଳୟରେ ପାଠ ପଢ଼ୁଛନ୍ତି, ଏହି ଯୋଜନା ସେମାନଙ୍କ ପାଇଁ ସହାୟକ ହେବ । ସେମାନେ କମ୍ କାମ କରିବାର ବିକଳ୍ପ ପାଇବେ । ଗତ ବର୍ଷ ଜାପାନରେ ମାତ୍ର ୭୨୭,୨୭୭ ଜନ୍ମ ରେକର୍ଡ କରାଯାଇଥିଲା । କୁହାଯାଉଛି ଯେ ଏହି ଅଭାବ ଦେଶର ଓଭରଟାଇମ୍ ୱାର୍କ କଲଚରର ଫଳାଫଳ । ବିଶ୍ୱ ବ୍ୟାଙ୍କର ତଥ୍ୟ ଅନୁଯାୟୀ, ଅନ୍ୟ ଧନୀ ଦେଶମାନଙ୍କ ତୁଳନାରେ ଜାପାନରେ ଲିଙ୍ଗ ନିଯୁକ୍ତି ପାର୍ଥକ୍ୟ ଅଧିକ, ଏଥିରେ ମହିଳାଙ୍କ ଅଂଶଗ୍ରହଣ ୫୫ ପ୍ରତିଶତ ଥିବା ବେଳେ ପୁରୁଷଙ୍କର ରହିଛି ୭୨ ପ୍ରତିଶତ ।
