ନୂଆଦିଲ୍ଲୀ: ରୁଷ ଏବଂ ୟୁକ୍ରେନ ମଧ୍ୟରେ ଚାରି ବର୍ଷ ଧରି ଚାଲିଥିବା ଭୟଙ୍କର ଯୁଦ୍ଧ ଭୟଙ୍କର ରୂପ ନେଇଛି। ଦୁଇ ଦେଶ ମଧ୍ୟରେ ଶାନ୍ତି ଚୁକ୍ତିର ସମ୍ଭାବନା ମଳିନ ହେଉଥିବା ପରି ମନେ ହେଉଛି। ଏହାର ଏକ ପ୍ରମୁଖ କାରଣ ହେଉଛି ଯେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଧ୍ୟାନ ବର୍ତ୍ତମାନ ଇରାନ ଏବଂ ଗ୍ରୀନଲ୍ୟାଣ୍ଡ ଭଳି ଅନ୍ୟାନ୍ୟ ଆନ୍ତର୍ଜାତୀୟ ପ୍ରସଙ୍ଗ ଉପରେ ରହିଛି, ଯାହା ୟୁକ୍ରେନ ସଙ୍କଟ ଉପରେ ଆଲୋଚନାକୁ ଅଟକାଇ ଦେଇଛି। ତେବେ ଏହି ଯୁଦ୍ଧରେ ୟୁକ୍ରେନୀୟ ସୈନିକଙ୍କ ସ୍ଥିତି ଖୁବ୍ ସଙ୍ଗୀନ ରହିଛି। ଆହତ ସୈନିକଙ୍କ ଚିକିତ୍ସାର ଅଭାବ ଏବଂ ଭୋକ ଉପାସରେ ଜୀବନ ଯାଉଛି। ରୁଷ ପ୍ରତିରକ୍ଷା ମନ୍ତ୍ରଣାଳୟ ଦ୍ୱାରା ଜାରି ଏକ ଭିଡିଓରେ, ଜଣେ ୟୁକ୍ରେନୀୟ ଯୁଦ୍ଧବନ୍ଦୀ, ଆଲେକଜାଣ୍ଡାର ସୋଟନିଭୋକ୍, ତାଙ୍କ ନିଜ ସେନାର ଭୟଙ୍କର ପରିସ୍ଥିତି ପ୍ରକାଶ କରିଛନ୍ତି। ସୋଟନିଭୋକ୍ ଦାବି କରିଛନ୍ତି ଯେ ୟୁକ୍ରେନ୍ ଏହାର ଆହତ ସୈନିକମାନଙ୍କୁ ଉଦ୍ଧାର କରିବାରେ ସମ୍ପୂର୍ଣ୍ଣ ଅସମର୍ଥ। ଯୁଦ୍ଧକ୍ଷେତ୍ରରେ ଆହତ ସୈନିକଙ୍କ ମୃତ୍ୟୁ ସୁନିଶ୍ଚି।
ସୋଟନିଭୋକ୍ କହିଛନ୍ତି, ସେ ଜଣେ ସୈନିକଙ୍କୁ ଗଛ ଉପରେ ବସିଥିବାର ଦେଖିଥିଲେ, ଯିଏ ସାହାଯ୍ୟ ପାଇଁ ଅପେକ୍ଷା କରି ଶେଷରେ ତାଙ୍କର ମୃତ୍ୟୁ ହୋଇଥିଲା। ଯୁଦ୍ଧକ୍ଷେତ୍ରରେ ନିୟୋଜିତ ସୈନିକମାନେ କେବଳ ଗୁଳିମାଡ଼ ନୁହେଁ ବରଂ ଭୋକ ଏବଂ ଶୋଷର ସମ୍ମୁଖୀନ ହେଉଛନ୍ତି। ୟୁକ୍ରେନୀୟ ସେନା ଘୋର ଖାଦ୍ୟ ଅଭାବର ସମ୍ମୁଖୀନ ହେଉଛି। କେତେକ ସମୟରେ ଡ୍ରୋନ୍ ମାଧ୍ୟମରେ ଖାଦ୍ୟ ଯୋଗାଇ ଦିଆଯାଏ, ସେତେବେଳେ ମଧ୍ୟ ଏଥିରେ କେବଳ ବ୍ରେକଫାଷ୍ଟ ସାମଗ୍ରୀ ରହିଥାଏ, ଯାହା ସୈନିକମାନଙ୍କ ପାଇଁ ବଞ୍ଚିବା କଷ୍ଟକର କରିଥାଏ। ୟୁକ୍ରେନରେ ସୈନିକଙ୍କ ଅଭାବ ପୂରଣ କରିବା ପାଇଁ ବଳପୂର୍ବକ ନିଯୁକ୍ତି କରାଯାଉଛି। ତାଙ୍କୁ କୌଣସି ସାମରିକ ଅଭିଜ୍ଞତା ବିନା ବଳପୂର୍ବକ ସୀମାକୁ ପଠାଯାଇଥିଲା। ଏପରିକି ନିଯୁକ୍ତି ନେଇ ଯେଉଁ ଅର୍ଥ ଦିଆଯାଉଥିବାଦାବି ହେଉଛି ତାହା ବି ଭୁଲ। ୟୁକ୍ରେନ ଲଜିଷ୍ଟିକ୍ ଏବଂ ସୁରକ୍ଷା ସଙ୍କଟର ସମ୍ମୁଖୀନ ହେଉଥିବା ବେଳେ, ରୁଷ ଏହାର ଆକ୍ରମଣକୁ ତୀବ୍ର କରିଛି। ରୁଷ ୨୦୦ ରୁ ଅଧିକ ଡ୍ରୋନ୍ ବ୍ୟବହାର କରି ଗୋଟିଏ ରାତିରେ ଛଅଟି ୟୁକ୍ରେନୀୟ ପ୍ରଦେଶରେ ପ୍ରବଳ କ୍ଷତି ପହଞ୍ଚାଇଛି।
