ଗତ ଏଗାର ବର୍ଷ ମଧ୍ୟରେ ନିରନ୍ତର ନିବେଶ ଓ ଲକ୍ଷ୍ୟବଦ୍ଧ କାର୍ଯ୍ୟକାରିତା ମାଧ୍ୟମରେ ଭାରତୀୟ ରେଳପଥ ଏହାର ଟ୍ରାକ୍ ଭିତ୍ତିଭୂମିକୁ ସୁଦୃଢ଼ କରିବା ଏବଂ ସୁରକ୍ଷା ମାନଦଣ୍ଡକୁ ବୃଦ୍ଧି କରିବା ଦିଗରେ ଉଲ୍ଲେଖନୀୟ ପ୍ରଗତି ହାସଲ କରିଛି। ଏହି ପ୍ରୟାସଗୁଡ଼ିକ ସାରା ଦେଶରେ ସୁରକ୍ଷିତ, ଦ୍ରୁତ ଏବଂ ଅଧିକ ଭରସାଯୋଗ୍ୟ ଟ୍ରେନ ଚଳାଚଳରେ ଯୋଗଦାନ ଦେଉଛି ।
ଆର୍ଥିକ ବର୍ଷ 2024-25ରେ, ଭାରତୀୟ ରେଳବାଇ 6,851 ଟ୍ରାକ୍ କିଲୋମିଟରରୁ ଅଧିକ ଟ୍ରାକ୍ ନବୀକରଣ କରିଥିଲା। ଚଳିତ ଆର୍ଥିକ ବର୍ଷ 2025-26ରେ, 7,500ରୁ ଅଧିକ କିଲୋମିଟର ଟ୍ରାକ୍ ନବୀକରଣ କାମ ଚାଲିଛି। ଏହା ବ୍ୟତୀତ, 2026-27 ପାଇଁ 7,900 କିଲୋମିଟର ରେଳ ଟ୍ରାକ୍ ନବୀକରଣ ଲାଗି ଯୋଜନା କରାଯାଇଛି। ଏହା ଭରସାଯୋଗ ସମ୍ପତ୍ତି ସୃଷ୍ଟି ଏବଂ ସୁରକ୍ଷା ଉପରେ ରେଳବାଇର ନିରନ୍ତର ଗୁରୁତ୍ୱକୁ ପ୍ରତିଫଳିତ କରେ।
ଟର୍ଣ୍ଣଆଉଟ୍ ନବୀକରଣରେ ମଧ୍ୟ ଯଥେଷ୍ଟ ଅଗ୍ରଗତି ହୋଇଛି, ଯାହା ଟ୍ରେନର ସୁଗମ ଗମନାଗମନ ଲାଗି ଅତ୍ୟନ୍ତ ଜରୁରୀ। 2024-25 ମସିହାରେ, 7,161 ଥିକ୍ ୱେବ୍ ସ୍ୱିଚ୍ ଏବଂ 1,704 ଟି ୱେଲ୍ଡେବଲ୍ ସିଏମଏସ କ୍ରସିଂ ଯୋଗାଇ ଦିଆଯାଇଥିଲା। 2025-26 ମସିହାରେ, 8,000 ରୁ ଅଧିକ ଥିକ୍ ୱେବ୍ ସ୍ୱିଚ୍ ଏବଂ 3,000 ରୁ ଅଧିକ ୱେଲ୍ଡେବଲ୍ ସିଏମଏସ କ୍ରସିଂ ଯୋଗାଇ ଦିଆଯାଉଛି।
ଟ୍ରାକ୍ ସ୍ଥିରତା ବଜାୟ ରଖିବା ଏବଂ ଯାତ୍ରାର ଗୁଣବତ୍ତାରେ ସୁଧାର ଆଣିବା ପାଇଁ ଜରୁରୀ ବାଲାଷ୍ଟର ଯାନ୍ତ୍ରିକ ଡିପ୍ ସ୍କ୍ରିନିଂ କ୍ରମାଗତ ଭାବରେ କରାଯାଇଛି। 2024-25 ମଧ୍ୟରେ, 7,442 ଟ୍ରାକ୍ କିଲୋମିଟର ଡିପ୍ ସ୍କ୍ରିନିଂ ସମାପ୍ତ ହୋଇଥିଲା, ଅନ୍ୟପକ୍ଷରେ 2025-26 ରେ 7,500 ରୁ ଅଧିକ ଟ୍ରାକ୍ କିଲୋମିଟର ଡିପ୍ ସ୍କ୍ରିନିଂ କାର୍ଯ୍ୟ କରାଯାଉଛି।
ଯାନ୍ତ୍ରିକ ରକ୍ଷଣାବେକ୍ଷଣକୁ ସମର୍ଥନ କରିବା ଏବଂ ଉତ୍ପାଦକତାକୁ ଉନ୍ନତ କରିବା ପାଇଁ ଭାରତୀୟ ରେଳବାଇ ଏହାର ଟ୍ରାକ୍ ମେସିନ୍ ଫ୍ଲିଟକୁ ଉଲ୍ଲେଖନୀୟ ଭାବରେ ବିସ୍ତାର କରିଛି। 2014 ପରଠାରୁ 1,100 ରୁ ଅଧିକ ଟ୍ରାକ୍ ମେସିନ୍ କିଣାଯାଇଛି, ଯାହା ରେଳ ନେଟୱାର୍କର ଦ୍ରୁତ ଏବଂ ଅଧିକ ଦକ୍ଷ ରକ୍ଷଣାବେକ୍ଷଣକୁ ସକ୍ଷମ କରିଥାଏ।
ଆକସ୍ମିକ ଭାବେ ଗୋରୁଙ୍କ ଦୌଡ଼ି ଆସିବା ଘଟଣା ଏବଂ ଅନୁପ୍ରବେଶକୁ କମ କରିବା ପାଇଁ ରେଳ ଟ୍ରାକରେ ସୁରକ୍ଷା ବାଡ଼କୁ ପ୍ରାଥମିକତା ଦିଆଯାଇଛି, ଯାହା ଦ୍ଵାରା ସାମଗ୍ରିକ ସୁରକ୍ଷା ବୃଦ୍ଧି ପାଇଛି। ବର୍ତ୍ତମାନ ସୁଦ୍ଧା ପ୍ରାୟ 15,000 କିଲୋମିଟର ବାଡ଼ ଦିଆଯାଇଛି, ଯାହା ଦ୍ଵାରା ଟ୍ରେନଗୁଡ଼ିକ ପ୍ରତି ଘଣ୍ଟା 110 କିଲୋମିଟରରୁ ଅଧିକ ବେଗରେ ଚଳାଚଳ କରୁଥିବା ସେକ୍ସନରେ ସୁରକ୍ଷା ଉନ୍ନତ ହୋଇଛି।
ଏହି ନିରନ୍ତର ପ୍ରୟାସର ଫଳସ୍ୱରୂପ, ଭାରତୀୟ ରେଳ ଟ୍ରାକଗୁଡ଼ିକୁ ଉନ୍ନତ କରିବାରେ ଉଲ୍ଲେଖନୀୟ ପ୍ରଗତି ହାସଲ କରିଛି। ଘଣ୍ଟା ପ୍ରତି 110 କିଲୋମିଟର ଏବଂ ତଦୁର୍ଦ୍ଧ୍ୱ ବେଗରେ ଟ୍ରେନ ଚଳାଚଳ କରିପାରୁଥିବା ଟ୍ରାକର ଲମ୍ବ 2014 ରେ 31,445 କିଲୋମିଟର (ନେଟୱାର୍କର ପ୍ରାୟ 40 ପ୍ରତିଶତ) ରୁ ବର୍ତ୍ତମାନ 84,244 କିଲୋମିଟର (ନେଟୱାର୍କର ପ୍ରାୟ 80 ପ୍ରତିଶତ) କୁ ବୃଦ୍ଧି ପାଇଛି, ଯାହା ଦ୍ରୁତ ଏବଂ ଅଧିକ ଦକ୍ଷ ଟ୍ରେନ ଚଳାଚଳରେ ସହାୟକ ହୋଇଛି।
ଟ୍ରାକ୍ ଆଧୁନିକୀକରଣ ଏବଂ ସୁରକ୍ଷା କ୍ଷେତ୍ରରେ ଭାରତୀୟ ରେଳବାଇର ବ୍ୟାପକ ପଦକ୍ଷେପ
