ନୂଆଦିଲ୍ଲୀ: ଏଡ୍ସ ଭଳି ଏକ ଭୟଙ୍କର ସଂକ୍ରାମକ ମହାମାରୀ ପ୍ରସଙ୍ଗରେ ସରକାରଙ୍କ ପକ୍ଷରୁ ଯେତେ ବି ଦୃଢ଼ୋକ୍ତି ବା ଦାବି କରାଯାଉ, ବାସ୍ତବତା କିନ୍ତୁ ଭିନ୍ନ ରହିଛି। ଭାରତ ଏବେ ବି ଏଡ୍ସ ଭଳି ଏକ ପ୍ରାଣଘାତୀ ସଂକ୍ରମଣ କବଳରୁ ସମ୍ପୂର୍ଣ୍ଣ ରୂପେ ମୁକ୍ତ ହୋଇପାରିନାହିଁ। କର୍ଣ୍ଣାଟକ ରାଜ୍ୟରୁ ସାମ୍ନାକୁ ଆସୁଥିବା ଚିତ୍ର ସବୁପ୍ରକାର ଦାବିକୁ ମିଛ ପ୍ରମାଣିତ କରିଦେଇଛି। ରିପୋର୍ଟ ଅନୁସାରେ କର୍ଣ୍ଣାଟକରେ ଏବେ ଦ୍ରୁତଗତିରେ ଏଚ୍ଆଇଭି ଭୂତାଣୁ ସଂକ୍ରମିତ ହେବାରେ ଲାଗିଛି। ସବୁଠୁ ବଡ଼କଥା ହେଉଛି ସଂକ୍ରମିତ ରୋଗୀଙ୍କ ଠାରୁ ତାଙ୍କ ପରିବାରର ଅନ୍ୟ ସଦସ୍ୟମାନଙ୍କୁ ଏହି ଭୂତାଣୁ ସଂକ୍ରମିତ ହେଉଛି। ରାଜ୍ୟ ସରକାରଙ୍କ ପକ୍ଷରୁ ଦିଆଯାଇଥିବା ତଥ୍ୟ ଅନୁସାରେ ୨୦୨୪-୨୫ରେ ମୋଟ୍ ୮୨୮ଜଣ ଏଚ୍ଆଇଭି ପଜିଟିଭ୍ ଚିହ୍ନଟ ହୋଇଛନ୍ତି। ଏଥିମଧ୍ୟରୁ ଗତ ୭ ମାସ ମଧ୍ୟରେ ୫୨୫ରୁ ଊର୍ଦ୍ଧ୍ୱ ଏଡ୍ସ ରୋଗୀ ଚିହ୍ନଟ ହୋଇଛନ୍ତି। ତେବେ ସବୁଠୁ ଅଧିକ ସଂକ୍ରମଣ ଏମ୍ଏସ୍ଏମ୍ (ପୁରୁଷ-ପୁରୁଷ ଶାରୀରିକ ସମ୍ପର୍କ ରଖୁଥିବା ବ୍ୟକ୍ତିବିଶେଷ)କମ୍ୟୁନିଟିରେ ଦେଖିବାକୁ ମିଳିଛି। ପ୍ରକାଶ, ୨୦୨୦-୨୧ରେ ୧୮୨ ସଂକ୍ରମିତ ଚିହ୍ନଟ ହୋଇଥିଲେ। କର୍ଣ୍ଣାଟକରୁ ମିଳିଥିବା ନୂତନ ତଥ୍ୟରୁ ଜଣାପଡ଼ିଛି ଯେ ସାଧାରଣ ଜନସଂଖ୍ୟାରେ ସାମଗ୍ରିକ ସକାରାତ୍ମକତା ହ୍ରାସ ପାଉଥିଲେ ମଧ୍ୟ, ଉଚ୍ଚ ବିପଦପୂର୍ଣ୍ଣ ଗୋଷ୍ଠୀମାନଙ୍କ ମଧ୍ୟରେ ଏଚ୍ଆଇଭି ସଂକ୍ରମଣରେ ଚିନ୍ତାଜନକ ବୃଦ୍ଧି ଘଟିଛି। ବିଶେଷଜ୍ଞମାନେ ଚେତାବନୀ ଦେଇଛନ୍ତି ଯେ ପାଣ୍ଠି ହ୍ରାସ ଏବଂ ଏଚ୍ଆଇଭି/ଏଡ୍ସ ସେବା ଉପରେ ଚାପ ପଡ଼ିବା ଦ୍ୱାରା ଏମ୍ଏସ୍ଏମ୍, ଟ୍ରାନ୍ସଜେଣ୍ଡର/ତୃତୀୟ ଲିଙ୍ଗ, ଏଲ୍ଜିବିଟିକ୍ୟୁ ବର୍ଗ ଏବଂ ଇଞ୍ଜେକ୍ସନ ନେଉଥିବା ନିଶା ବ୍ୟବହାରକାରୀଙ୍କ ସମେତ ଅନ୍ୟ କେତେକ ଦୁର୍ବଳ ସମ୍ପ୍ରଦାୟଗୁଡ଼ିକୁ ଅଧିକ ବିପଦରେ ପକାଇଛି। ସୂଚନାଯୋଗ୍ୟ ଇଞ୍ଜେକ୍ସନ ଏବଂ ରକ୍ତ ସ୍ଥାନାନ୍ତରଣରେ ଅବହେଳା ସଂକ୍ରମଣର ପ୍ରସାରର ଏକ ପ୍ରମୁଖ କାରଣ, ଏବଂ ରୋଗ ଏବଂ ଏହାର ପ୍ରତିରୋଧ ବିଷୟରେ ଜନସଚେତନତା ବୃଦ୍ଧି କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
ଅନ୍ୟପକ୍ଷେ ପାକିସ୍ତାନରେ ମଧ୍ୟ ସମ୍ପ୍ରତି ଏଡ୍ସ ବା ଏଚ୍ଆଇଭି ସଂକ୍ରମଣ ବ୍ୟାପକ ରୂପ ଧାରଣ କରିଛି, ଯାହାକୁ ନେଇ ବିଶ୍ୱସ୍ତରରେ ବିତର୍କ ଆରମ୍ଭ ହୋଇଛି। ଗତ ୧୫ ବର୍ଷ ମଧ୍ୟରେ ପାକିସ୍ତାନରେ ଏଚ୍ଆଇଭି ସଂକ୍ରମଣ ପ୍ରାୟ ୨୦୦% ପର୍ଯ୍ୟନ୍ତ ବୃଦ୍ଧି ପାଇଛି, ଯାହାକୁ ଦୃଷ୍ଟିରେ ରଖି ବିଶ୍ୱ ସ୍ୱାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ ବା ହୁ’) ପକ୍ଷରୁ ଚେତାବନୀ ଦିଆଯାଇଛି। ୨୦୧୦ରେ ପାକିସ୍ତାନରେ ପ୍ରାୟ ୧୬,୦୦୦ ଏଚ୍ଆଇଭିଜନିତ ନୂଆ ମାମଲା ସାମ୍ନାକୁ ଆସିଥିବା ବେଳେ ୨୦୨୪ରେ ଏହି ସଂଖ୍ୟା ୩୮୦୦୦କୁ ବୃଦ୍ଧି ପାଇଛି। ଏହି ବୃଦ୍ଧିକୁ ପାକିସ୍ତାନ ପାଇଁ ଏକ ପ୍ରମୁଖ ଚେତାବନୀ ବୋଲି ବିବେଚନା କରାଯାଉଛି। ଅନ୍ୟପକ୍ଷେ ପାକିସ୍ତାନର ସ୍ୱାସ୍ଥ୍ୟ ମନ୍ତ୍ରଣାଳୟ ମଧ୍ୟ ସ୍ୱୀକାର କରିସାରିଛି ଯେ କେବଳ ସରକାରୀ ପ୍ରୟାସ ଦ୍ୱାରା ଏଚ୍ଆଇଭି ସଂକ୍ରମଣକୁ ଆଉ ନିୟନ୍ତ୍ରଣ କରାଯାଇପାରିବ ନାହିଁ। ପାକିସ୍ତାନରେ ଏବେ ପ୍ରାୟ ୩୫୦,୦୦୦ ଲୋକ ଏଚ୍ଆଇଭି ସଂକ୍ରମିତ। କିନ୍ତୁ ଆଶ୍ଚର୍ଯ୍ୟଜନକ ବିଷୟ ହେଉଛି ଯେ, ପାକିସ୍ତାନ ଜନସଂଖ୍ୟାର ଏକ ବଡ଼ ଅଂଶ ଏପ୍ରକାର ଏକ ଘାତକ ରୋଗକୁ ନେଇ ସଚେତନ ନୁହଁନ୍ତି। ପିଲାମାନଙ୍କ ମଧ୍ୟରେ ପରିସ୍ଥିତି ଅଧିକ ଚିନ୍ତାଜନକ ରହିଛି। ୨୦୧୦ରେ ପାକିସ୍ତାନରେ ଛୋଟ ପିଲାମାନଙ୍କ ମଧ୍ୟରେ ପ୍ରାୟ ୫୩୦ ମାମଲା ଚିହ୍ନଟ ହୋଇଥିବା ବେଳେ ୨୦୨୩ ମସିହାରେ ଏହି ସଂଖ୍ୟା ୧୮୦୦କୁ ବୃଦ୍ଧି ପାଇଛି। ଏହାର ଅର୍ଥ ହେଉଛି ପରିବାର ଏବଂ ସମ୍ପ୍ରଦାୟ ମଧ୍ୟରେ ସଂକ୍ରମଣ ଦ୍ରୁତ ଗତିରେ ବ୍ୟାପିବାରେ ଲାଗିଛି।
