ଭୁବନେଶ୍ୱର: ବିଭିନ୍ନ ପ୍ରକାରର ସମସ୍ୟାର ସମାଧାନ ଓ ପରିବେଶ ସୁରକ୍ଷା କରିବା ଦିଗରେ ଜ୍ଞାନକୁ ଉପଯୋଗ କରିବା ସହିତ ସାମାଜିକ ସଦଭାବନା କୁ ପ୍ରୋତ୍ସାହିତ କରି ମାନବ ସମାଜର ସେବା କରିବାକୁ ଓଡ଼ିଶାର ମାନ୍ୟବର ରାଜ୍ୟପାଳ ଡକ୍ଟର ହରି ବାବୁ କମ୍ଭମପାଟି ଆହ୍ୱାନ ଜଣାଇଛନ୍ତି l ଶୁକ୍ରବାର ଦିନ ନିଷ୍ଟ (NIST) ବିଶ୍ୱବିଦ୍ୟାଳୟ ବ୍ରହ୍ମପୁରର ଦ୍ଵିତୀୟ ସମାବର୍ତ୍ତନ ଉତ୍ସବରେ ସ୍ନାତକ ଛାତ୍ରଛାତ୍ରୀଙ୍କୁ ଉଦବୋଧନ ଦେଇ ରାଜ୍ୟପାଳ ଏହି ଆହ୍ୱାନ ଜଣାଇଛନ୍ତି l ଏହି ସମାରୋହରେ ସ୍ନାତକମାନଙ୍କୁ ସମ୍ବୋଧିତ କରି ରାଜ୍ୟପାଳ କହିଛନ୍ତି ଯେ ବର୍ତ୍ତମାନ ଯୁଗରେ ବିଭିନ୍ନ ସମସ୍ୟା ଯଥା ସ୍ଥାୟୀତ୍ୱ, ଅନ୍ତର୍ଭୁକ୍ତି, ଜନସ୍ୱାସ୍ଥ୍ୟ, ସାଇବର ସୁରକ୍ଷା ଠାରୁ ଆରମ୍ଭ କରି ସମାନ ଅଭିବୃଦ୍ଧି ପର୍ଯ୍ୟନ୍ତ ବିଭିନ୍ନ ଚ୍ୟାଲେଞ୍ଜର ମୁକାବିଲା ପାଇଁ ଦକ୍ଷତା ସହିତ ସହାନୁଭୂତିଶୀଳତା ଥିବା ବୃତ୍ତିଧାରୀଙ୍କ ଆବଶ୍ୟକତା ରହିଛି। ପ୍ରକୃତ ନେତୃତ୍ୱ କେବଳ ବ୍ୟକ୍ତିଗତ ସଫଳତା ଦ୍ୱାରା ନୁହେଁ ବରଂ ସମାଜରେ ସୃଷ୍ଟି କରୁଥିବା ସକାରାତ୍ମକ ଏବଂ ସ୍ଥାୟୀ ପ୍ରଭାବ ଦ୍ୱାରା ପରିଭାଷିତ ହୁଏ ବୋଲି ରାଜ୍ୟପାଳ କହିଥିଲେ l
ଦ୍ରୁତ ଗତିରେ ପରିବର୍ତ୍ତିତ ବିଶ୍ୱ ଦୃଶ୍ୟପଟ ଉପରେ ଆଲୋକପାତ କରି ରାଜ୍ୟପାଳ କହିଛନ୍ତି ଯେ ଆଜିର ସ୍ନାତକମାନେ ପ୍ରଯୁକ୍ତିବିଦ୍ୟା, କୃତ୍ରିମ ବୁଦ୍ଧିମତ୍ତା, ଜଳବାୟୁ ପରିବର୍ତ୍ତନ, ଭୌଗୋଳିକ ଅନିଶ୍ଚିତତା ଏବଂ ସାମାଜିକ ପରିବର୍ତ୍ତନ ଦ୍ୱାରା ଆକୃତି ପାଉଥିବା ଏକ ବିଶ୍ୱରେ ପ୍ରବେଶ କରୁଛନ୍ତି। ସଫଳତା କେବଳ ଡିଗ୍ରୀ ଦ୍ୱାରା ନୁହେଁ ବରଂ ସୂକ୍ଷ୍ମ ଭାବରେ ଚିନ୍ତା କରିବା, ନୈତିକତାର ସହ କାର୍ଯ୍ୟ କରିବା ଏବଂ ନିରନ୍ତରତାକୁ ଗ୍ରହଣ କରିବାର କ୍ଷମତା ଦ୍ୱାରା ମାପ କରାଯାଏ ବୋଲି କହିଥିଲେ l ଶିକ୍ଷାକୁ ଜୀବନବ୍ୟାପୀ ଶିଖିବାର ଆରମ୍ଭ ଭାବରେ ଦେଖିବା ପାଇଁ ଛାତ୍ରଛାତ୍ରୀମାନଙ୍କୁ ପରାମର୍ଶ ଦେଇ ରାଜ୍ୟପାଳ ଜିଜ୍ଞାସା, ସ୍ଥିରତା ଏବଂ ନୂତନତ୍ୱ ଆଣିବାର ସାହସ ରଖିବା ଉପରେ ଗୁରୁତ୍ୱାରୋପ କରିଥିଲେ l ପ୍ରଯୁକ୍ତିବିଦ୍ୟାର ଅଗ୍ରଗତି ସତ୍ତ୍ୱେ ଚରିତ୍ର, ସାଧୁତା, ସଚ୍ଚୋଟତା, ନମ୍ରତା ଏବଂ ସହାନୁଭୂତିଶୀଳତା କାଳଜୟୀ ଗୁଣ ହୋଇ ରହିଥାଏ। ସମାବର୍ତ୍ତନ ଉତ୍ସବରେ ଯୋଗଦେଇ ଖୁସି ପ୍ରକାଶ କରି ରାଜ୍ୟପାଳ କହିଛନ୍ତି ଯେ,ଏହା ଏକ ନିର୍ଣ୍ଣାୟକ ମୁହୂର୍ତ୍ତ ଯେଉଁଠାରେ ବର୍ଷ ଯାକର ପ୍ରୟାସ ସଫଳତା ଏବଂ ଦାୟିତ୍ୱରେ ପରିଣତ ହୁଏ। ରାଜ୍ୟପାଳ ସମସ୍ତ ସ୍ନାତକ, ପଦକ ବିଜେତା ଏବଂ ପୁରସ୍କାର ବିଜେତାଙ୍କୁ ଅଭିନନ୍ଦନ ଜଣାଇଥିଲେ ଏବଂ ଶିକ୍ଷକଙ୍କ ମାର୍ଗଦର୍ଶନ ଏବଂ ପିତାମାତା ଏବଂ ପରିବାରର ତ୍ୟାଗ ସମ୍ପର୍କରେ ସ୍ମରଣ କରାଇ ଦେଇଥିଲେ।
ଓଡ଼ିଶାରେ ଉଚ୍ଚଶିକ୍ଷାର ଏକ ସମ୍ମାନଜନକ କେନ୍ଦ୍ର ଭାବରେ ଉଭା ହୋଇଥିବାରୁ ନିଷ୍ଟ (NIST) ବିଶ୍ୱବିଦ୍ୟାଳୟକୁ ରାଜ୍ୟପାଳ ପ୍ରଶଂସା କରିଥିଲେ l ଶିକ୍ଷାଗତ ଉତ୍କର୍ଷତା, ଗବେଷଣା, ନବସୃଜନ, ଉଦ୍ୟମିତା ଏବଂ ସାମାଜିକ ଦାୟିତ୍ୱ ଉପରେ ଏହାର ଭୂମିକା ଉପରେ ଆଲୋକପାତ କରିଥିଲେ। ଜାତୀୟ ଶିକ୍ଷା ନୀତି ୨୦୨୦ ସହିତ ବିଶ୍ୱବିଦ୍ୟାଳୟର ସମନ୍ୱୟକୁ ମଧ୍ୟ ରାଜ୍ୟପାଳ ପ୍ରଶଂସା କରିଥିଲେ ଏବଂ ବିଶ୍ୱବିଦ୍ୟାଳୟର ପ୍ରେସିଡେଣ୍ଟ ଡକ୍ଟର ସୁକାନ୍ତ କୁମାର ମହାପାତ୍ରଙ୍କ ନେତୃତ୍ୱରେ ଏହାର ଭୂମିକାକୁ ମଧ୍ୟ ପ୍ରଶଂସା କରିଥିଲେ। ଓଡ଼ିଶାରେ ଚାଲିଥିବା ବିକାଶ ପ୍ରକ୍ରିୟା ଉପରେ ଉଲ୍ଲେଖ କରି ରାଜ୍ୟପାଳ କହିଛନ୍ତି ଯେ ଭିତ୍ତିଭୂମି, ଶିଳ୍ପ ଏବଂ ପ୍ରଯୁକ୍ତିବିଦ୍ୟା ଚାଳିତ କ୍ଷେତ୍ରରେ ରାଜ୍ୟର ଅଭିବୃଦ୍ଧି ଯୁବପିଢ଼ିଙ୍କ ପାଇଁ ଅଭୂତପୂର୍ବ ସୁଯୋଗ ପ୍ରଦାନ କରୁଛି। ସ୍ନାତକମାନଙ୍କୁ ଉତ୍କର୍ଷତା ଏବଂ ସାଧୁତାର ଆମ୍ବାସଡର ହେବା ସହିତ ଶିକ୍ଷାନୁଷ୍ଠାନ ସହିତ ଜଡିତ ରହିବାକୁ ଏବଂ ସମାଜରେ ଅର୍ଥପୂର୍ଣ୍ଣ ଯୋଗଦାନ କରିବାକୁ ଆହ୍ୱାନ ଜଣାଇଥିଲେ। ଅନ୍ୟମାନଙ୍କ ମଧ୍ୟରେ ନୂଆଦିଲ୍ଲୀର ଏଆଇସିଟିଇ(AICTE)ର ଉପାଧ୍ୟକ୍ଷ ଡ.ଅଭୟ ଜେରେ ଏବଂ ନିଷ୍ଟ (NIST) ବିଶ୍ୱବିଦ୍ୟାଳୟର ପ୍ରେସିଡେଣ୍ଟ ଡକ୍ଟର ସୁକାନ୍ତ କୁମାର ମହାପାତ୍ର ମଧ୍ୟ ସମାବେଶକୁ ସମ୍ବୋଧିତ କରିଥିଲେ ଏବଂ ଭାଇସ-ଚାନସେଲର ଡକ୍ଟର ପ୍ରିୟଦର୍ଶନ ପାତ୍ର ସ୍ୱାଗତ ଭାଷଣ ପ୍ରଦାନ କରିଥିଲେ।
