ଭୁବନେଶ୍ୱର : ବିବିଧତାରେ ଏକତା ହେଉଛି ଭାରତର ଶକ୍ତି ଓ ସୌନ୍ଦର୍ଯ୍ୟ। ଏହା ଏକ ସ୍ଲୋଗାନ ନୁହେଁ ବରଂ ଏକ ମିଳିତ ଜାତୀୟ ଦାୟୀତ୍ବ ବୋଲି ମାନ୍ୟବର ରାଜ୍ୟପାଳ ଡ. ହରି ବାବୁ କମ୍ଭମପାଟି କହିବା ସହିତ ଦେଶରେ ବିବିଧତାରେ ଏକତାର ଭାବନାକୁ ଅଧିକ ସୁଦୃଢ କରିବା ପାଇଁ ଆହ୍ୱାନ ଜଣାଇଛନ୍ତି। ମଙ୍ଗଳବାର ଦିନ ଲୋକ ଭବନର ନୂତନ ଅଭିଷେକ ହଲରେ ଆୟୋଜିତ ଆସାମ ଏବଂ ନାଗାଲାଣ୍ଡ ରାଜ୍ୟର ପ୍ରତିଷ୍ଠା ଦିବସ ପାଳନ ଅବସରରେରେ ରାଜ୍ୟପାଳ ଏହି ଆହ୍ୱାନ ଜଣାଇଛନ୍ତି। ଏହି କାର୍ଯ୍ୟକ୍ରମରେ ରାଜ୍ୟର ମାନ୍ୟବର ପ୍ରଥମ ମହିଳା ଡ. ଜୟଶ୍ରୀ କମ୍ଭମପାଟି ମଧ୍ୟ ଉପସ୍ଥିତ ଥିଲେ। ଆସାମ ଏବଂ ନାଗାଲାଣ୍ଡର ଜନସାଧାରଣଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇ ରାଜ୍ୟପାଳ କହିଥିଲେ ଯେ, ଏହି ଅବସର କେବଳ ଏହି ଦୁଇଟି ଗର୍ବିତ ରାଜ୍ୟର ସମୃଦ୍ଧ ଇତିହାସ ନୁହେଁ ବରଂ ଦେଶକୁ ଏକତା, ସମ୍ମାନ ଏବଂ ଏକ ମିଳିତ ଦୃଷ୍ଟିକୋଣ ସହିତ ବାନ୍ଧି ରଖୁଥିବା ମୂଲ୍ୟବୋଧକୁ ମଧ୍ୟ ପ୍ରତିଫଳିତ କରେ। ଯେତେବେଳେ ଏହାର ବିବିଧତାକୁ ଆନ୍ତରିକତାର ସହିତ ସମ୍ମାନିତ କରାଯାଏ ସେତେବେଳେ ଭାରତ ଅଧିକ ଶକ୍ତିଶାଳୀ ହୁଏ। ଉତ୍ତର-ପୂର୍ବାଞ୍ଚଳ ବିଷୟରେ ବିଶେଷ କରି ଏହାର ଭାବପ୍ରବଣ ସ୍ଥାନ ଉପରେ ରାଜ୍ୟପାଳ ଆଲୋକପାତ କରିଥିଲେ ଏବଂ କହିଥିଲେ ଯେ ଏହା ଘରର ପବିତ୍ର ଉତ୍ତର-ପୂର୍ବ କୋଣ ସହିତ ତୁଳନୀୟ। ଏହି ଅଞ୍ଚଳକୁ ପ୍ରକୃତି, ସଂସ୍କୃତି ଏବଂ ଆଧ୍ୟାତ୍ମିକତାର ଏକ ଅନନ୍ୟ ମିଶ୍ରଣ ଭାବରେ ରାଜ୍ୟପାଳ ବର୍ଣ୍ଣନା କରିଥିଲେ।
ଆସାମ ଉପରେ ଆଲୋକପାତ କରି ରାଜ୍ୟପାଳ କହିଥିଲେ ଯେ ଏହା ବ୍ରହ୍ମପୁତ୍ରର ଭୂମି, ସୁସଜ୍ଜିତ ଚା ବଗିଚା, ବିଭିନ୍ନ ପ୍ରକାରର ବନ୍ୟପ୍ରାଣୀ, ଆଧ୍ୟାତ୍ମିକ ଐତିହ୍ୟ ଏବଂ ବିହୁ ଭଳି ସ୍ପନ୍ଦନଶୀଳ ସାଂସ୍କୃତିକ ଉତ୍ସବର ମାଟି। ଆସାମ ଉତ୍ତର-ପୂର୍ବର ଏକ ସାଂସ୍କୃତିକ ବନ୍ଧନ ଭାବରେ କାର୍ଯ୍ୟ କରିଆସୁଛି ବୋଲି କହିଥିଲେ। ନାଗାଲାଣ୍ଡ ବିଷୟରେ ରାଜ୍ୟପାଳ ଉଲ୍ଲେଖ କରି ଏହାର ଆଦିବାସୀ ଐତିହ୍ୟ, ହର୍ଣ୍ଣବିଲ୍ ମହୋତ୍ସବ ଏବଂ ସାମୁହିକ ଜୀବନର ଭାବନାକୁ ବିବିଧତାରେ ଏକତାର ପ୍ରତିଫଳନ ବୋଲି କହିବା ସହ ପ୍ରଶଂସା କରିଥିଲେ। ନାଗାଲାଣ୍ଡର ଲୋକଙ୍କ ସଚ୍ଚୋଟତା ଏବଂ ଶୃଙ୍ଖଳାକୁ ପ୍ରଶଂସା କରିଥିଲେ।ପୁଣି ରାଜ୍ୟପାଳ କହିଥିଲେ ଯେ ଭାରତର ବିକାଶ ପ୍ରତ୍ୟେକ ରାଜ୍ୟ ଏବଂ ପ୍ରତ୍ୟେକ ସଂସ୍କୃତି ଦ୍ୱାରା ଆକୃତିପ୍ରାପ୍ତ ଏକ ସାମୂହିକ ଯାତ୍ରା। ଯେତେବେଳେ ଦେଶ ପାରସ୍ପରିକ ସମ୍ମାନ ଏବଂ ସହଭାଗୀ ଦାୟିତ୍ୱ ସହିତ ଅଗ୍ରଗତି କରେ ସେତେବେଳେ ଚ୍ୟାଲେଞ୍ଜଗୁଡ଼ିକ ଦୂର କରିବା ସହଜ ହୋଇଯାଏ ଏବଂ ସାମୂହିକ ଲକ୍ଷ୍ୟ ହାସଲ କରାଯାଇଥାଏ। ନାଗରିକମାନଙ୍କୁ ସାଂସ୍କୃତିକ ବୁଝାମଣାକୁ ମଜବୁତ କରିବା, ସହଯୋଗ ବିସ୍ତାର କରିବା ଏବଂ ଦେଶର ପ୍ରତ୍ୟେକ କୋଣରେ ବିକାଶ ପହଞ୍ଚିବାକୁ ନିଶ୍ଚିତ କରିବା ପାଇଁ କାର୍ଯ୍ୟ କରିବାକୁ ରାଜ୍ୟପାଳ ସମସ୍ତଙ୍କୁ ଆହ୍ୱାନ ଦେଇଥିଲେ।
ମାନ୍ୟବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ‘ଏକ ଭାରତ- ଶ୍ରେଷ୍ଠ ଭାରତ’ ପ୍ରୟାସକୁ ପ୍ରଶଂସା କରି ରାଜ୍ୟପାଳ ଏହାକୁ ଜାତୀୟ ବନ୍ଧନକୁ ସୁଦୃଢ଼ କରିବା ପାଇଁ ଏକ ଅର୍ଥପୂର୍ଣ୍ଣ ପ୍ରୟାସ ବୋଲି କହିଥିଲେ। ରାଜ୍ୟପାଳ ଡ. କମ୍ଭମପାଟି ଓଡ଼ିଶାର ଅନ୍ତର୍ଭୁକ୍ତିମୂଳକ ଆତ୍ମାକୁ ମଧ୍ୟ ପ୍ରଶଂସା କରି ଉଲ୍ଲେଖ କରିଥିଲେ ଯେ ଉତ୍ତର-ପୂର୍ବର ଅନେକ ଲୋକ ଓଡ଼ିଶାକୁ ନିଜର ଦ୍ୱିତୀୟ ଘର କରିଛନ୍ତି ଏବଂ ଓଡ଼ିଶାର ସାଂସ୍କୃତିକ ଓ ଆର୍ଥିକ ଅଭିବୃଦ୍ଧିରେ ସହାୟକ ହେବା ସହ ସଦଭାବନା ବଢ଼ାଇବାରେ ସହଯୋଗ କରିଛନ୍ତି। କାର୍ଯ୍ୟକ୍ରମ ସମୟରେ ଆସାମର ମାନ୍ୟବର ରାଜ୍ୟପାଳ ଲକ୍ଷ୍ମଣ ପ୍ରସାଦ ଆଚାର୍ଯ୍ୟଙ୍କ ଏକ ଭିଡିଓ ବାର୍ତ୍ତା ମଧ୍ୟ ପ୍ରସାରିତ ହୋଇଥିଲା। ଏହି ଅବସରରେ ଓଡ଼ିଶାରେ ସେବା କରୁଥିବା ଆସାମ ରାଜ୍ୟର ମୂଳ ବାସିନ୍ଦା ଅବକାରୀ ବିଭାଗର ପ୍ରମୁଖ ଶାସନ ସଚିବ ଭାସ୍କର ଜ୍ୟୋତି ଶର୍ମା ଏବଂ ନାଗାଲାଣ୍ଡ ରାଜ୍ୟର ମୂଳ ବାସିନ୍ଦା ଯୋଜନା ଓ ସଂଯୋଜନ ବିଭାଗର ସ୍ୱତନ୍ତ୍ର ଶାସନ ସଚିବ ଟି.ଏଓ ସେମାନଙ୍କର ରାଜ୍ୟର ବୈଶିଷ୍ଟ୍ୟ ଏବଂ ଓଡ଼ିଶାରେ ଅଭିଜ୍ଞତା ସମ୍ପର୍କରେ ବକ୍ତବ୍ୟ ପ୍ରଦାନ କରିଥିଲେ । ରାଜ୍ୟପାଳଙ୍କ କମିଶନର ତଥା ଶାସନ ସଚିବ ଶ୍ରୀମତୀ ରୂପା ରୋସନ ସାହୁ ପ୍ରାରମ୍ଭରେ ସ୍ବାଗତ ଭାଷଣ ପ୍ରଦାନ କରିବା ସହ କାର୍ଯ୍ୟକ୍ରମର ଉଦ୍ଦେଶ୍ୟ ସମ୍ପର୍କରେ ଆଲୋକପାତ କରିଥିଲେ।ଏହି ଉତ୍ସବରେ ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ପ୍ରଦର୍ଶନ ମଧ୍ୟ ପ୍ରଦର୍ଶିତ ହୋଇଥିଲା।
