କଟକ: ଝାରପଡ଼ା ଜେଲରେ ଏବେ ଗ୍ୟାଙ୍ଗ୍ୱାର ଦେଖିବାକୁ ମିଳିଛି । ଜଣେ ବିଚାରାଧୀନ କଏଦୀଙ୍କ ଉପରେ ଆଜି ମରଣାନ୍ତକ ଆକ୍ରମଣ ହୋଇଛି । ଏହି ଆକ୍ରମଣରେ ସୌମ୍ୟକାନ୍ତ ମହାନ୍ତି ନାମକ ବିଚାରାଧୀନ କଏଦୀ ଆହତ ହୋଇଥିବା ଜଣାପଡ଼ିଛି । ଜେଲ୍ରେ ଥିବା ଗ୍ୟାଙ୍ଗଷ୍ଟର ହାଇଦରର ପୁଅ ମୁନା ଓ ତାଙ୍କ ସହଯୋଗୀମାନେ ସୌମ୍ୟକାନ୍ତଙ୍କୁ ଆକ୍ରମଣ କରି ଲହୁ ଲୁହାଣ କରିଛନ୍ତି । ତାଙ୍କ ମୁଣ୍ଡରେ ଗଭୀର ଆଘାତ ଲାଗିଛି । ଖବର ପାଇ ଜେଲ୍ କର୍ତ୍ତୃପକ୍ଷ ସୌମ୍ୟକାନ୍ତଙ୍କୁ ଚିକିତ୍ସା ପାଇଁ ମେଡିକାଲ୍ରେ ଭର୍ତ୍ତି କରିଛନ୍ତି ।
ଝାରପଡ଼ା ଜେଲ୍ରେ ହେଉଥିବା ଅବ୍ୟବସ୍ଥା ତଥା କେତେକ କଏଦୀଙ୍କୁ ବିଭିନ୍ନ ସୁବିଧା ସୁଯୋଗ ଦିଆଯାଉଥିବା ନେଇ ସୌମ୍ୟ କିଛିଦିନ ତଳେ ଭୁବନେଶ୍ୱର ଜିଲ୍ଲା ଆଇନ୍ସେବା ପ୍ରାଧିକରଣଙ୍କୁ ଚିଠି ଲେଖିଥିଲେ । ଜେଲ୍ ଭିତରେ ଗଞ୍ଜେଇ ଭର୍ତ୍ତି ବିଡି ଗୋଟା ୨ ଶହ ଟଙ୍କାରେ ବିକ୍ରି ହେଉଛି । ବିଭିନ୍ନ ସୁବିଧା ସୁଯୋଗ ଯୋଗାଇଦେବା ପାଇଁ ଅର୍ଥକାରବାର ହେଉଛି ବୋଲି ସେ ଚିଠିରେ ଦର୍ଶାଇଥିଲେ । ଏହି ଚିଠି ମିଳିବା ପରେ ଭୁବନେଶ୍ୱର ଜିଲ୍ଲା ଆଇନ୍ସେବା ପ୍ରାଧିକରଣ ଶନିବାର ଅଚାନକ ଜେଲ୍ରେ ଚଢ଼ଉ କରିଥିଲେ । ଚଢ଼ଉ ସମୟରେ ମୋବାଇଲ ଓ ନିଶା ଦ୍ରବ୍ୟ ଆଦି ଜବତ କରି ସେଗୁଡିକୁ ଲକ୍ଷ୍ମୀସାଗର ଥାନା ଜିମା ଦେଇଥିଲେ । ଚଢ଼ଉର ଗୋଟିଏ ଦିନ ପରେ ଅର୍ଥାତ ଆଜି ସୌମ୍ୟକାନ୍ତଙ୍କ ଉପରେ ଆକ୍ରୋଶ ରଖି ଆକ୍ରମଣ କରାଯାଇଛି । ଫଳରେ ଜେଲ୍ରେ ଏକ ପ୍ରକାର ଗ୍ୟାଙ୍ଗ୍ୱାର ହେବାଭଳି ପରିସ୍ଥିତି ଉପୁଜିଛି ବୋଲି ଆଶଙ୍କା କରାଯାଉଛି ।
