ନୂଆଦିଲ୍ଲୀ: ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଏବଂ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (JMM) ପ୍ରତିଷ୍ଠାତା ଶିବୁ ସୋରେନଙ୍କ 81 ବର୍ଷ ବୟସରେ ଦେହାନ୍ତ ହୋଇଛି । ଶିବୁ ସୋରେନ ସୋମବାର ଦିଲ୍ଲୀର ଗଙ୍ଗାରାମ ହସ୍ପିଟାଲରେ ଶେଷ ନିଶ୍ୱାସ ତ୍ୟାଗ କରିଛନ୍ତି। ସେ ଦୀର୍ଘ ଦିନ ଧରି ଏହି ହସ୍ପିଟାଲରେ ଚିକିତ୍ସାଧୀନ ଥିଲେ। ଶିବୁ ସୋରେନଙ୍କ ପୁଅ ତଥା ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ ଏକ ସୋସିଆଲ ମିଡିଆ ପୋଷ୍ଟ ମାଧ୍ୟମରେ ଏହି ଦୁଃଖଦ ଖବରକୁ ଜଣାଇଛନ୍ତି । ଶିବୁ ସୋରେନ ଙ୍କୁ ଜୁନ୍ ୧୯ ତାରିଖରୁ ଗଙ୍ଗାରାମ ହସ୍ପିଟାଲରେ ଭର୍ତ୍ତି କରାଯାଇଥିଲା। କୁହାଯାଉଛି ଯେ ଶିବୁ ସୋରେନଙ୍କର ଅନେକ ରୋଗ ଥିଲା। ତାଙ୍କର କିଡନୀ ରୋଗ ମଧ୍ୟ ଥିଲା। ରାଜନୀତିରେ ଚାରି ଦଶନ୍ଧିର କ୍ୟାରିଅରରେ, ଶିବୁ ସୋରେନ ଆଠ ଥର ଲୋକସଭାକୁ ନିର୍ବାଚିତ ହୋଇଥିଲେ ଏବଂ ଦୁଇ ଥର ରାଜ୍ୟସଭା ସାଂସଦ ଭାବରେ କାର୍ଯ୍ୟ କରିଥିଲେ ।ସାନ୍ତାଳ ସମ୍ପ୍ରଦାୟର ଜଣେ ସଦସ୍ୟ ଶିବୁ ସୋରେନଙ୍କ ଜନ୍ମ ରାମଗଡ଼ ଜିଲ୍ଲାରେ ହୋଇଥିଲା ।
ଶିବୁ ସୋରେନ ଝାଡ଼ଖଣ୍ଡରେ ତାଙ୍କ ପ୍ରିୟଜନଙ୍କ ମଧ୍ୟରେ ‘ଗୁରୁଜୀ’ ଭାବରେ ଜଣାଶୁଣା ଥିଲେ। ସେ ଝାଡ଼ଖଣ୍ଡ ମୁକ୍ତି ମୋର୍ଚ୍ଚାର ପ୍ରତିଷ୍ଠାତା ନେତାମାନଙ୍କ ମଧ୍ୟରୁ ଜଣେ ଥିଲେ ଏବଂ ଆଦିବାସୀଙ୍କ ଅଧିକାର ପାଇଁ ଲଢ଼ିଥିଲେ। ସେ ଏକ ସ୍ୱତନ୍ତ୍ର ଝାଡ଼ଖଣ୍ଡ ରାଜ୍ୟ ପାଇଁ ଆନ୍ଦୋଳନର ନେତୃତ୍ୱ ନେଇଥିଲେ। ତାଙ୍କ ନେତୃତ୍ୱରେ, ଝାଡ଼ଖଣ୍ଡ ମୁକ୍ତି ମୋର୍ଚ୍ଚା ସାମାଜିକ ଏବଂ ରାଜନୈତିକ ସଚେତନତା ଅଭିଯାନ ଆରମ୍ଭ କରିଥିଲା ଏବଂ ରାଜ୍ୟକୁ ଏକ ସ୍ୱତନ୍ତ୍ର ପରିଚୟ ଦେବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା। ଶିବୁ ସୋରେନଙ୍କ ଦେହାନ୍ତ ପରେ ସମସ୍ତ ବରିଷ୍ଠ ରାଜନେତାମାନଙ୍କ ମନରେ ଶୋକର ଛାୟା ଖେଳିଯାଇଛି । ଏଠି ସହିତ ପ୍ରତିରକ୍ଷାମନ୍ତ୍ରୀ ରାଜନାଥ ସିଂ ମଧ୍ୟ ଦୁଃଖ ପ୍ରକାଶ କରିଛନ୍ତି ଆତ୍ମାକୁ ଶାନ୍ତି ମିଳୁ ଏବଂ ତାଙ୍କ ପରିବାରକୁ , ସମର୍ଥକଙ୍କୁ ସମବେଦନା ଜଣାଇଛନ୍ତି ।
