ବେଜିଂ: ଚୀନ୍ ରାଜଧାନୀ ବେଜିଂରୁ ପ୍ରାୟ ୧୮୦ କିଲୋମିଟର ଦୂର ଉତ୍ତର ଚୀନ୍ର ହେବେଇ ପ୍ରଦେଶରେ ଥିବା ଏକ ଘରୋଇ ନର୍ସିଂହୋମ୍ରେ ଭୟାବହ ଅଗ୍ନିକାଣ୍ଡ ଘଟି ୨୦ରୁ ଅଧିକ ମୃତ୍ୟୁ ହୋଇଥିବା ସୂଚନା ମିଳିଛି। ମଙ୍ଗଳବାର ବିଳମ୍ବିତ ରାତିରେ ଘଟିଥିବା ଚେଙ୍ଗଡେ ସହରର ଲୋଙ୍ଗହୁଆ କାଉଣ୍ଟିରେ ଘଟିଥିବା ଏହି ଅଗ୍ନିକାଣ୍ଡ ସମୟରେ କୋଠାରେ ମୋଟ୍ ୩୯ ଜଣ ବୃଦ୍ଧ ରହିଥିଲେ। ତେବେ ନିଆଁ ଲିଭା ପ୍ରକ୍ରିୟା ସହ ୧୮ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରିବା ସମ୍ଭବ ହୋଇପାରିଥିଲା।
କିନ୍ତୁ ବାକି ୨୧ଜଣ ବିଲ୍ଡିଂରୁ ବାହାରକୁ ବାହାରିପାରିନଥିଲେ। ରାତି ପ୍ରାୟ ୧୧ଟା ସୁଦ୍ଧା ନିଆଁ ଲିଭାଇ ଦିଆଯାଇଥିଲା। ତେବେ ବୁଧବାର ସକାଳ ସୁଦ୍ଧା ୨୦ଜଣଙ୍କ ମୃତଦେହ ଘଟଣାସ୍ଥଳରୁ ଉଦ୍ଧାର କରାଯାଇଛି। ଏହି ଘଟଣାରେ ଆହତ ଅନ୍ୟ ବୃଦ୍ଧଙ୍କୁ ଅଧିକ ଚିକିତ୍ସା ପାଇଁ ନିକଟସ୍ଥ ହସ୍ପିଟାଲ୍କୁ ସ୍ଥାନାନ୍ତର କରାଯାଇଛି। ଅଗ୍ନିକାଣ୍ଡର କାରଣ ଜାଣିବା ପାଇଁ ତଦନ୍ତ ଜାରି ରହିଛି ବୋଲି ସୂଚନା ଦିଆଯାଇଛି। ପ୍ରକାଶ, ଶିଳା ନିର୍ମାଣ କୋଡ୍ ଏବଂ କର୍ମକ୍ଷେତ୍ର ସୁରକ୍ଷା ପ୍ରତି ପ୍ରାୟତଃ ଅବହେଳା ଯୋଗୁଁ ଚୀନ୍ରେ ଏପ୍ରକାର ଅଗ୍ନିକାଣ୍ଡ ପ୍ରାୟତଃ ସାଧାରଣ ଘଟଣା ପାଲଟିଛି। ଗତ ଜାନୁଆରୀରେ ବେଜିଂର ଉତ୍ତର-ପଶ୍ଚିମରେ ଥିବା ଝାଙ୍ଗଜିଆକୋଉ ସହରରେ ଏକ ପନିପରିବା ବଜାରରେ ଅଗ୍ନିକାଣ୍ଡ ଘଟି ୮ଜଣଙ୍କ ମୃତ୍ୟୁ ହୋଇଥିଲା ଏବଂ ୧୫ଜଣ ଆହତ ହୋଇଥିଲେ। ସେହିପରି ୨୦୨୪ ଡିସେମ୍ବର ବେଳକୁ ପୂର୍ବ ଚୀନ୍ର ରୋଙ୍ଗଚେଙ୍ଗ ସହରରେ ଏକ ନିର୍ମାଣ ସ୍ଥାନରେ ଅଗ୍ନିକାଣ୍ଡ ଘଟି ୯ଜଣ ପ୍ରାଣ ହରାଇଥିଲେ।
