ଇନ୍ଦୋର: ହନିମୁନ୍ ମର୍ଡର ମିଷ୍ଟ୍ରିରେ ଦିନକୁ ଦିନ ଆଶ୍ଚର୍ଯ୍ୟଜନକ ଖୁଲାସା ହେଉଛି। ରାଜା ରଘୁବଂଶୀ ମାମଲାରେ ସୋନମ କେବଳ ତାଙ୍କ ସ୍ବାମୀଙ୍କୁ ହତ୍ୟା କରିଥିବା ଅଭିଯୋଗ ହୋଇଛି। କିନ୍ତୁ ଏବେ ସୋନମଙ୍କ ବିରୋଧରେ ଆଉ ଏକ ଗମ୍ଭୀର ଅଭିଯୋଗ ଆସିଛି। ରାଜାଙ୍କ ପିତା ଦେବୀ ଲାଲ ରଘୁବଂଶୀଙ୍କ ଅନୁଯାୟୀ, ସୋନମ ତାଙ୍କ ପୁଅ ଉପରେ କଳା ଯାଦୁ କରିଥିଲେ। ତାଙ୍କ ପୁଅର ସ୍ମୃତିରେ କାନ୍ଦି କାନ୍ଦି ପିତା ଦେବୀ ଲାଲ ରଘୁବଂଶୀ ଅଭିଯୋଗ କରିଛନ୍ତି, ସୋନମ ତନ୍ତ୍ର-ମନ୍ତ୍ରରେ ଆଗ୍ରହୀ ଥିଲେ। ସେ ତନ୍ତ୍ର ପୂଜା କରୁଥିଲେ। ରାଜା ରଘୁବଂଶୀଙ୍କ ପିତା ଦେବୀ ଲାଲଙ୍କ ଅନୁଯାୟୀ, ନିର୍ବନ୍ଧ ପରେ ସୋନମ ରଘୁବଂଶୀ ସେମାନଙ୍କ ଘରର ମୁଖ୍ୟ ଦ୍ୱାର ବାହାରେ ଏକ କଳା ଗଣ୍ଠି ଟାଙ୍ଗି ଦେଇଥିଲେ। କିନ୍ତୁ ବର୍ତ୍ତମାନ ରାଜାଙ୍କ ହତ୍ୟା ପରେ ଏହି ଗଣ୍ଠି ମଧ୍ୟ ଗାଏବ ହୋଇଯାଇଛି। ରାଜାଙ୍କ ପିତା କହିଛନ୍ତି, ସୋନମ ପରିବାରକୁ କହିଥିଲେ ଯେ ଏହି କଳା ଗଣ୍ଠି ଘରକୁ ଖରାପ ନଜରରୁ ରକ୍ଷା କରିବ। ଏହା କହି ସେ ଘରର ମୁଖ୍ୟ ଦ୍ୱାରରେ ଗଣ୍ଠି ଟାଙ୍ଗି ଦେଇଥିଲେ। କିନ୍ତୁ ସେମାନେ ଜାଣି ନ ଥିଲେ ଯେ ଏହା ଖରାପ ନଜରରୁ ରକ୍ଷା କରିବା ପାଇଁ ନୁହେଁ ବରଂ ରାଜାଙ୍କ ଉପରେ କଳା ଯାଦୁ କରିବା ପାଇଁ ଟାଙ୍ଗି ଦିଆଯାଇଥିଲା। ରାଜାଙ୍କ ହତ୍ୟା ପରେ, ସେହି ଗଣ୍ଠି ମଧ୍ୟ ଘରର ଦ୍ୱାରରୁ ଗାଏବ ହୋଇଗଲା।
ଅନ୍ୟପକ୍ଷରେ, ରାଜାଙ୍କ ଭାଇ ସଚିନ ପୂର୍ବରୁ ସୋନମଙ୍କ ଉପରେ ମାନବ ବଳିର ଅଭିଯୋଗ ଆଣିଥିଲେ। ସଚିନ କହିଛନ୍ତି, ସୋନମ ତାଙ୍କ ୬୦ ବର୍ଷୀୟ ପିତାଙ୍କ ପାଇଁ ରାଜାଙ୍କୁ ବଳିଦାନ ଦେଇଛନ୍ତି। ସଚିନ ରଘୁବଂଶୀ କହିଛନ୍ତି, ମୋ ଭାଇ ରାଜାଙ୍କୁ ବଳି ଦିଆଯାଇଛି। ସୋନମ ତାଙ୍କ ପିତାଙ୍କ ସ୍ବାସ୍ଥ୍ୟ ପାଇଁ ଏହି ମାନବ ବଳି ଦେଇଛନ୍ତି। ତାଙ୍କ ପିତା ପୂର୍ବରୁ ଦୁଇଥର ହୃଦଘାତର ଶିକାର ହୋଇଥିଲେ, କିନ୍ତୁ ଏବେ ସେ ସମ୍ପୂର୍ଣ୍ଣ ସୁସ୍ଥ ଅଛନ୍ତି। ସଚିନ ଏହା ମଧ୍ୟ ଅଭିଯୋଗ କରିଛନ୍ତ, ସୋନମ ଏବଂ ତାଙ୍କ ପରିବାର କିଛି ତାନ୍ତ୍ରିକ କାର୍ଯ୍ୟକଳାପରେ ଜଡିତ ଲୋକଙ୍କ ସହ ଯୋଗାଯୋଗରେ ଥିଲେ। ବର୍ତ୍ତମାନ, ଏହି ଅଭିଯୋଗ ଉପରେ ସୋନମ ରଘୁବଂଶୀଙ୍କ ପରିବାର ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ।
