କଟକ: ପାରିବାରିକ ଅଶାନ୍ତି ତଥା ଋଣ ବୋଝ ଯୋଗୁ ଜଣେ ବାପ ତା’ର ଏକମାତ୍ର ଝିଅକୁ ହତ୍ୟା କରି ନିଜେ ବେକରେ ଦଉଡି ଦେଇ ଆତ୍ମହତ୍ୟା କରିଛନ୍ତି। ବାଦାମବାଡ଼ି ଥାନା ଅନ୍ତର୍ଗତ ଜଗନ୍ନାଥ ଲେନ୍ରେ ଥିବା ଏକ ଆପର୍ଟମେଣ୍ଟର ପ୍ରଥମ ମହଲାରେ ଥିବା ଏକ ବନ୍ଦ ଘର ବାପାଝିଅଙ୍କ ମୃତଦେହକୁ ପୋଲିସ ଜବତ କରିଛି। ମୃତକ ଦ୍ୱୟ ହେଲେ ମାନସ ରଞ୍ଜନ ଦାସ (୬୦) ଓ ତାଙ୍କ ଝିଅ ହରଶ୍ରୀତା ହେମାଙ୍ଗିନି (୧୭)। ଦୁଇ ମୃତଦେହକୁ ଏସ୍ସିବି ମେଡିକାଲକୁ ବ୍ୟବଚ୍ଛେଦ ପାଇଁ ପଠାଇବା ସହ ଏକ ଅପମୃତ୍ୟୁ ମାମଲା ରୁଜୁ କରି ପୁଲିସ ତଦନ୍ତ ଚଳାଇଛି।
ପ୍ରାଥମିକ ତଦନ୍ତରୁ ଆର୍ଥିକ ଚାପରୁ ବାପା ଝିଅକୁ ହତ୍ୟା କରିବା ପରେ ଆତ୍ମହତ୍ୟା କରିଥାଇପାରନ୍ତି ବୋଲି ପୁଲିସ ସନ୍ଦେହ କରୁଛି। ବାଦାମବାଡ଼ି ଜଗନ୍ନାଥ ଲେନ୍ରେ ଥିବା ଏକ ଚାରି ମହଲା ବିଶିଷ୍ଟ ଆପର୍ଟମେଣ୍ଟର ପ୍ରଥମ ମହଲାରେ ଫ୍ଲାଟ୍ ନମ୍ୱର୍ ୧/୨ଏ୩ରେ ମାନସ ରଞ୍ଜନ ଓ ତାଙ୍କ ଝିଅ ରହନ୍ତି। କିଛି ବର୍ଷ ତଳୁ ତାଙ୍କ ସ୍ତ୍ରୀଙ୍କର ମୃତ୍ୟୁ ହୋଇସାରିଛି। ମାନସଙ୍କ ଘର କେନ୍ଦ୍ରାପଡ଼ା ଜିଲା ଗୁଣୁପୁର ଅଞ୍ଚଳରେ ହୋଇଥିବା ବେଳେ ସେ କଟକରେ ରହି ବ୍ୟବସାୟ କରୁଥିଲା ବେଳେ ଆପାର୍ଟମେଣ୍ଟରେ ବାପା-ଝିଅ ଗତ ପ୍ରାୟ ଦେଢ଼ ବର୍ଷ ହେବ ରହିଆସୁଥିଲେ। ଝିଅଟି ମାନସିକ ଭାବେ ଭିନ୍ନକ୍ଷମ ହୋଇଥିବାରୁ ବାପା ସବୁବେଳେ ତାଙ୍କୁ ଘର ଭିତରେ ରଖୁଥିଲେ। କେବେ ବି ବାହାରକୁ ଛାଡ଼ୁନଥିଲେ। ଝିଅଙ୍କୁ ପଡୋଶୀମାନେ ମଧ୍ୟ ଦେଖିପାରୁନଥିଲେ। ସେ ରହୁଥିବା ଫ୍ଲାଟ୍ର କିଛି ମାସ ଭଡ଼ା ବାକି ରହିଥିବା ବେଳେ ଘର ମାଲିକ ତାଙ୍କୁ ଘର ଛାଡ଼ିବାକୁ କହିଥିଲେ। ଆଜି ଘର ମାଲିକ ଭଡା ଆଦାୟ କରିବାକୁ ଆସିବାର ଥିଲା। ତେଣୁ ସେ ଆର୍ôଥକ ବୋଝ ଯୋଗୁଁ ମାନସିକ ଭାରସାମ୍ୟ ହରାଇ ଏଭଳି ଆତ୍ମହତ୍ୟା ନିଷ୍ପତ୍ତି ନେଇଥାଇପାରନ୍ତି ବୋଲି ପ୍ରାଥମିକ ସ୍ତରରେ ପୁଲିସ ଅନୁମାନ କରୁଛି। ତେବେ ଶୁକ୍ରବାର ସକାଳୁ ଦୀର୍ଘ ସମୟ ଯାଏ ମାନସଙ୍କ ଘରର ଦରଜା ଖୋଲାଯାଇନଥିଲା।
ଘର ମାଲିକ ସେଠାରୋ ପହଞ୍ôଚ କବାଟ ବାଡେଇଥିଲେ ବି ଭିତର ପଟୁ କୌଣସି ସୋର୍ଶବ୍ଦ ନଥିଲା। କିଛି ଲୋକ ଝରକା ଫାଙ୍କରେ ମାନସ ଫ୍ୟାନ୍ରେ ଝୁଲୁଥିବାର ଦେଖିଥିଲେ। ଏଣୁ ଘର ମାଲିକ ଏନେଇ ବାଦାମବାଡ଼ି ଥାନାରେ ଜଣାଇଥିଲେ। ପୋଲିସ ପହଞ୍ôଚ କବାଟ ଭାଙ୍ଗି ଘର ଭିତରେ ପଶିଥିଲା। ତେବେ ମାନସ ରଞ୍ଜନଙ୍କ ମୃତଦେହ ଫ୍ୟାନ୍ରୁ ଧୋତିରେ ଝୁଲନ୍ତା ଅବସ୍ଥାରେ ଥିବା ଦେଖାଯାଇଥିଲା। ସେହିପରି ଝିଅର ମୃତଦେହ ଘର ଭିତରେ ଥିବା ଖଟ ଉପରେ ପଡ଼ି ରହିଥିଲା। ସାଇଂଟିଫିକ ଟିମ୍ ସହ ପୁଲିସ ତଦନ୍ତ କରିବା ଉପସ୍ଥିତ ଲୋକଙ୍କୁ ପଚରାଉଚୁରା କରିଛି। ଘଟଣାସ୍ଥଳରୁ ମୃତକଙ୍କ ଏକ ମୋବାଇଲ ଜବତ ହୋଇଛି। ମାନସଙ୍କ ପିତାଙ୍କ ଏକ ଘର କଟକରେ ଥିଲା । ମାତ୍ର କିଛି ବର୍ଷ ହେବ ତାହା ବିକ୍ରି ହୋଇଯାଇଥିôବାରୁ ମାନସ କଟକରେ ଭଡାଘରେ ରହୁଥିଲେ। ଅପରପକ୍ଷେ ପ୍ରାୟ ଦୁଇବର୍ଷ ହେବ ମାନସ ତାଙ୍କ ପରିବାରର ଅନ୍ୟ ସଦସ୍ୟଙ୍କ ସହିତ ଏକ ପ୍ରକାର ସମ୍ପର୍କ ଚ୍ଛିନ୍ନ କରିଥିଲେ ବୋଲି ତାଙ୍କ ଭଉଣୀ ସୂଚନା ଦେଇଛନ୍ତି।
