ଅତାବିରା: ବରଗଡ଼ ଜିଲ୍ଲା ପ୍ରଶାସନ ଓ ପୁଲିସ କନ୍ୟା ସନ୍ତାନ ଦିବସ, ବେଟି ପଢ଼ାଓ ବେଟି ବଚାଓ ଦିବସ ପାଳନ କରୁଥିବା ବେଳେ ଗୋଟେ ପରେ ଗୋଟେ ହୋଇ ଘଟିଚାଲିଥିବା ଅଘଟଣ ପାଇଁ ଜିଲ୍ଲାକୁ ଲଜ୍ଜିତ ହେବାକୁ ପଡ଼ୁଛି । ୧୪ ଦିନ ତଳର ଯୁବତୀ ନିଖୋଜ ଓ ରକ୍ତାକ୍ତ ଭାବେ ଉଦ୍ଧାର ଘଟଣା ଏବଂ ୪ ଦିନ ତଳର ଝରାପାଲି ନାବାଳିକା ନିଖୋଜ ଘଟଣା ମାନସ ପଟଳରୁ ନଲିଭୁଣୁ ଜଣେ ପିତା ନିଜ ଜନ୍ମକଲା ଝିଅକୁ ପାଶବିକ ଅତ୍ୟାଚାର କରିବା ଭଳି ଅତିଶୟ ଲଜ୍ଜାଜନକ ଓ ଅଭାବନୀୟ ଘଟଣା ସଂସ୍କୃତି ସମ୍ପନ୍ନ, ଐତିହ୍ୟ ସମ୍ପନ୍ନ ବରଗଡ଼ ଜିଲ୍ଲାର ମଥାନତ କରିଦେଇଛି । ବରଗଡ଼ ଜିଲ୍ଲା ଅତାବିରା ଥାନା ଅନ୍ତର୍ଗତ କୁଲୁଣ୍ଡା ପଂଚାୟତରେ ଘଟଣାଟି ଘଟିଯାଇଛି । ୩୬ ବର୍ଷିୟ ବାପା ନିଜ ନିଜ ଜନ୍ମ କଲା ୧୨ ବର୍ଷିୟା ଝିଅକୁ ଦୁଷ୍କର୍ମ କରିବା ଭଳି ନିନ୍ଦନୀୟ ଘଟଣା ସଭ୍ୟ ମାନବ ସମାଜର ସମସ୍ତ ସୀମା ଉଲ୍ଲଂଘନ କରିଯାଇଛି।
ସୂଚନା ଅନୁଯାୟୀ, କୌଣସି କାରଣକୁ ନେଇ ସ୍ୱାମୀ ଓ ସ୍ତ୍ରୀ ମଧ୍ୟରେ ବିବାଦ ଲାଗି ରହିଥିଲା। ଏଥିପାଇଁ କିଛିଦିନ ହେଲା ସ୍ତ୍ରୀ ସମ୍ବଲପୁରରେ ନିଜ ମା’ ଘରେ ଆଶ୍ରୟ ନେଇଆସୁଛନ୍ତି । ଏପଟେ ଅତାବିରା ଘରେ ୧୨ ବର୍ଷିୟା ଝିଅ ଓ ୧୦ ବର୍ଷର ପୁଅକୁ ନେଇ ସ୍ୱାମୀ ରହୁଥିଲେ । ସ୍ତ୍ରୀ ମଝିରେ ମଝିରେ ଅତାବିରା ଆସି ଝିଅ ପୁଅ ପାଖକୁ ଯାଇ ଦେଖାଦେଖି କରି ଫେରିଆସୁଥିଲେ ମଧ୍ୟ ସ୍ୱାମୀଙ୍କ ସହିତ କଥାବାର୍ତ୍ତା କରୁନଥିଲେ । ପତ୍ନୀ ନଥିବାର ସୁଯୋଗ ନେଇ ଗତ ବୁଧବାର ରାତିରେ ବାପ ନିଜ ଝିଅକୁ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ଏନେଇ ଗୁରୁବାର ସକାଳେ ଝିଅ ନିଜ ମା’କୁ ଫୋନରେ ସବୁ କଥା କହିବା ପରେ ସ୍ତ୍ରୀ ଗାଁକୁ ଆସି ଝିଅ ସହିତ ଟିଖିନିଖି ଆଲୋଚନା କରିବା ପରେ ଅତାବିରା ଥାନାରେ ଲିଖିତ ଅଭିଯୋଗ କରିଥିଲେ । ଅତାବିରା ପୁଲିସ ଏନେଇ ଏକ ଦୁଷ୍କର୍ମ ମାମଲା ରୁଜୁ କରି ଅଭିଯୁକ୍ତଙ୍କୁ ଗିରଫ କରିଥିବା ସହ ଅଭିଯୁକ୍ତ ଓ ପୀଡ଼ିତାଙ୍କ ଡ଼ାକ୍ତରିମାଇନା କରାଇଥିବା ଜଣାପଡ଼ିଛି । ବାପ-ଝିଅ ଭଳି ପବିତ୍ର ସଂପର୍କରେ କଳା ଦାଗ ଆଙ୍କି ଦେଇଥିବା ପିତାର କୁକର୍ମକୁ ନେଇ ଏବେ ସାରା ଜିଲ୍ଲାରେ ଚର୍ଚ୍ଚା ଖେଳିଯାଇଛି । ଏଭଳି ପିତାଙ୍କୁ ଫାଶୀ ଦିଆଯାଉ ବୋଲି ସଚେତନ ମହଲର ଦାବି ଏବେ ସରକାରଙ୍କ ପାଇଁ ଆହ୍ୱାନ ପାଲଟିଯାଇଛି ।
