ବେଜିଂ: ମଙ୍ଗଳବାର ଦିନ ଚୀନର ପୂର୍ବ ପ୍ରାନ୍ତ ଶାଣ୍ଡୋଙ୍ଗରେ ଏକ ରାସାୟନିକ କାରଖାନାରେ ଏକ ବଡ଼ ବିସ୍ଫୋରଣ ଯୋଗୁଁ ଆକାଶରେ ଘନ ଧୂଆଁର କୁଣ୍ଡ ଖେଳିଯାଇଛି, ସରକାରୀ ଗଣମାଧ୍ୟମ ରିପୋର୍ଟ କରିଛି, କିନ୍ତୁ ଏଥିରେ ମୃତାହତଙ୍କ ବିଷୟରେ କୌଣସି ବିବରଣୀ ଦିଆଯାଇ ନାହିଁ। ଚୀନର ସରକାରୀ ସମାଚାର ଏଜେନ୍ସି ସିନହୁଆ ରିପୋର୍ଟ କରିଛି ଯେ ବିସ୍ଫୋରଣ ପରେ ଗାଓମି ସହରର ପ୍ଲାଣ୍ଟକୁ ଉଦ୍ଧାର କର୍ମୀଙ୍କ ଦଳ ପଠାଯାଇଥିଲା। ବିସ୍ଫୋରଣ ଖବର ମିଳିବା ପରଠାରୁ ଜରୁରୀକାଳୀନ ପରିଚାଳନା ମନ୍ତ୍ରଣାଳୟ ସ୍ଥିତିର ତଦାରଖ କରୁଛି । ଅଧିକାରୀଙ୍କ କହିବା ଅନୁଯାୟୀ ଏହି ଘଟଣାରେ ଏପର୍ଯ୍ୟନ୍ତ କୌଣସି ମୃତାହତର ଖବର ମିଳିନାହିଁ।
ବିସ୍ଫୋରଣ ପରେ, ସ୍ଥାନୀୟ ଅଗ୍ନିଶମ ଏବଂ ଉଦ୍ଧାର ସେବା ଘଟଣାସ୍ଥଳକୁ ୫୫ଟି ଗାଡ଼ି ଏବଂ ୨୩୨ ଜଣ କର୍ମଚାରୀଙ୍କୁ ପଠାଇଥିଲା। ବିସ୍ଫୋରଣ ସ୍ଥାନରୁ ପ୍ରାୟ ୩.୫ କିଲୋମିଟର (୨.୨ ମାଇଲ) ଦୂରରେ ଥିବା ଜଣେ ହୋଟେଲ କର୍ମଚାରୀ କହିଛନ୍ତି ଯେ ସେ ଏକ ଜୋରରେ ବିସ୍ଫୋରଣ ଶୁଣିଥିଲେ। ପୂର୍ବରୁ ୨୦୧୫ ମସିହାରେ ଉତ୍ତର-ପୂର୍ବ ସହର ତିଆନଜିନରେ ଏକ ରାସାୟନିକ ଗୋଦାମରେ ଅନେକ ବିସ୍ଫୋରଣ ଘଟିଥିଲା। ଏହି ବିସ୍ଫୋରଣରେ ୧୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିଲା ଏବଂ ବାୟୁରେ ବିଷାକ୍ତ ଧୂଆଁ ବ୍ୟାପି ଯାଇଥିଲା।
