ହାଇଦ୍ରାବାଦ: ହାଇଦ୍ରାବାଦରୁ ସାମ୍ନାକୁ ଆସିଛି ଏକ ହୃଦୟ ବିଦାରକ ଘଟଣା। ହଷ୍ଟେଲ ରୁମରୁ ଇଞ୍ଜିନିୟରିଂ ଛାତ୍ରଙ୍କ ମୃତଦେହ ଉଦ୍ଧାର କରାଯାଇଛି। ସୂଚନା ଅନୁସାରେ, ସୋମବାର ସକାଳେ ହାଇଦ୍ରାବାଦର ସିଦ୍ଧାର୍ଥ ଇଞ୍ଜିନିୟରିଂ କଲେଜର ହଷ୍ଟେଲ ରୁମରୁ ଜଣେ ଇଞ୍ଜିନିୟରିଂ ଛାତ୍ରଙ୍କ ମୃତଦେହ ଉଦ୍ଧାର କରାଯାଇଛି। ମୃତକ ଜଣକ ହେଲେ ୨୨ ବର୍ଷୀୟ ଯାଦବ ସାଇ ତେଜା ସେ ତାଙ୍କ ମୃତ୍ୟୁ ପୂର୍ବରୁ ଏକ ଭିଡିଓ ତିଆରି କରିଥିଲେ, ଯେଉଁଥିରେ ସେ ସାହାଯ୍ୟ ପାଇଁ ନିବେଦନ କରିଥିଲେ। ସାହାଯ୍ୟ ଲୋଡ଼ି ଛାତ୍ର ଜଣକ କହିଥିଲେ ଯେ ତାଙ୍କ ସିନିୟରମାନେ ତାଙ୍କୁ ମାରୁଛନ୍ତି ଏବଂ ଟଙ୍କା ଦାବି କରୁଛନ୍ତି। ଖବର ପାଇ ତାଙ୍କ ଓକିଲ ଏବଂ ପରିବାର ସଦସ୍ୟମାନେ ଘଟଣାସ୍ଥଳରେ ପହଞ୍ଚିଥିଲେ। ସେମାନେ ପୋଲିସକୁ ତେଜାଙ୍କ ମୃତ୍ୟୁର କାରଣ ସମ୍ପର୍କରେ ପୁଙ୍ଖାନୁପୁଙ୍ଖ ତଦନ୍ତ ଦାବି କରିଛନ୍ତି।
ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ ସାଇ ତେଜାଙ୍କୁ ତାଙ୍କ ସିନିୟରମାନେ ଏକ ବାରକୁ ନେଇ ଯାଇଥିଲେ, ବାଧ୍ୟ କରି ମଦ୍ୟପାନ କରାଇଥିଲେ ଏବଂ ପ୍ରାୟ ୧୦,୦୦୦ ଟଙ୍କା ବିଲ୍ ଦେବାକୁ କହିଥିଲେ।ଭିଡିଓରେ ଛାତ୍ର ଜଣକ ଦାବି କରିଛନ୍ତି ଯେ ତାଙ୍କୁ ଟଙ୍କା ପାଇଁ ମାଡ଼ ମରାଯାଇଥିଲା ଏବଂ ହଇରାଣ କରାଯାଇଥିଲା। ସେ ସାହାଯ୍ୟ ପାଇଁ ନିବେଦନ କରିଛନ୍ତି। କଲେଜ ଅଧିକାରୀମାନଙ୍କୁ ସମଗ୍ର ମାମଲା ଉପରେ ସୂଚନା ଦେବାକୁ କୁହାଯାଇଛି। ପୋଲିସ କହିଛି ଯେ ସିସିଟିଭି ଫୁଟେଜ୍, ଛାତ୍ରଙ୍କ ଭିଡିଓ ରେକର୍ଡିଂ ଏବଂ ହଷ୍ଟେଲ ଛାତ୍ର ଏବଂ କର୍ମଚାରୀଙ୍କ ବୟାନ ଯାଞ୍ଚ କରାଯାଉଛି। ପୋଲିସ ଦଳ ଏହି ମାମଲାରେ ସହକର୍ମୀ ଇଞ୍ଜିନିୟରିଂ ଛାତ୍ରମାନଙ୍କୁ ମଧ୍ୟ ପଚରାଉଚରା କରିବ।
