ଭୁବନେଶ୍ୱର : ବିବିଧତାକୁ ଆପଣେଇବା ଦ୍ୱାରା ଦେଶର ସାମୂହିକ ପରିଚୟ ସୁଦୃଢ଼ ହୋଇଥାଏ ବୋଲି ମାନ୍ୟବର୍ ରାଜ୍ଯପାଳ ଡ. ହରି ବାବୁ କମ୍ଭମପାଟି କହିଛନ୍ତି। ସୋମବାର ଦିନ ଲୋକଭବନର ନୂତନ ଅଭିଷେକ ହଲରେ ଆୟୋଜିତ ରାଜସ୍ଥାନ ପ୍ରତିଷ୍ଠା ଦିବସ ପାଳନ କାର୍ଯ୍ୟକ୍ରମରେ ଉଦବୋଧନ ଦେଇ ରାଜ୍ୟପାଳ ଏହା କହିଛନ୍ତି। ଏହି ଅବସରରେ ରାଜ୍ୟର ମାନ୍ୟବର ପ୍ରଥମ ମହିଳା ଡ. ଜୟଶ୍ରୀ କମ୍ଭମପାଟି ମଧ୍ୟ ଉପସ୍ଥିତ ଥିଲେ।ଏହି ଅବସରରେ ରାଜ୍ଯପାଳ ଓଡ଼ିଶାରେ ରହୁଥିବା ରାଜସ୍ଥାନର ଲୋକମାନଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଇ କହିଥିଲେଯେ, ଏହି ଅବସର କେବଳ ଏକ ରାଜ୍ୟ ଗଠନର ସ୍ମୃତି ଚାରଣର ଅବସର ନୁହେଁ ବରଂ ଏହାର ସାହସ, ସମ୍ମାନ ଏବଂ ସାଂସ୍କୃତିକ ସମୃଦ୍ଧିର ଗୌରବମୟ ଐତିହ୍ୟକୁ ମଧ୍ୟ ସ୍ମରଣ କରାଯାଏ। ରାଜସ୍ଥାନକୁ “ରାଜାମାନଙ୍କ ଦେଶ” ଭାବରେ ବର୍ଣ୍ଣନା କରି ରାଜ୍ଯପାଳ ସାହସ ଏବଂ ବଳିଦାନ ଦ୍ୱାରା ଚିହ୍ନିତ ଏହାର ଐତିହାସିକ ଐତିହ୍ୟ ଉପରେ ଆଲୋକପାତ କରିଥିଲେ l ମହାରାଣା ପ୍ରତାପଙ୍କ ବୀରତ୍ୱ ଏବଂ ଚିତ୍ତୋରଗଡ଼, କୁମ୍ଭଲଗଡ଼ ଏବଂ ଆମେର ଭଳି ଦୁର୍ଗର ମହିମାକୁ ସ୍ମରଣ କରିଥିଲେ।ରାଜ୍ଯପାଳ ଉଲ୍ଲେଖ କରିଛନ୍ତି ଯେ, ଘୁମର ଏବଂ କାଳବେଲିଆ ଭଳି ଲୋକନୃତ୍ୟ ସମେତ ରାଜସ୍ଥାନର ଜୀବନ୍ତ ପରମ୍ପରାଗୁଡ଼ିକ ଉତ୍ସବର ଭାବନାକୁ ପ୍ରତିଫଳିତ କରେ, ଯେତେବେଳେ କାଲିବଙ୍ଗନ ଭଳି ଐତିହ୍ୟ ସ୍ଥଳଗୁଡ଼ିକ ପ୍ରାଚୀନ ମାନବ ସଭ୍ୟତାର ଝଲକ ପ୍ରଦାନ କରେ। ଥର ମରୁଭୂମି ଏବଂ ଆରାବଳି ପର୍ବତମାଳା ସମେତ ଏହାର ଆହ୍ୱାନପୂର୍ଣ୍ଣ ଭୌଗୋଳିକ ସ୍ଥିତି ସତ୍ତ୍ୱେ ରାଜସ୍ଥାନର ଲୋକମାନେ ସ୍ଥିରତା ଏବଂ ନବସୃଜନ ପ୍ରଦର୍ଶନ କରିଆସି ଛନ୍ତି ବୋଲି ରାଜ୍ଯପାଳ କହିଛନ୍ତି।
ରାଜ୍ୟପାଳ ଆହୁରି ମଧ୍ଯ କହିଛନ୍ତି ଯେ , ଓଡ଼ିଶା ଗଭୀର ଆଧ୍ୟାତ୍ମିକତା, ସମୃଦ୍ଧ ପରମ୍ପରା ଏବଂ ଅନ୍ତର୍ଭୁକ୍ତିମୂଳକ ଅଭିବୃଦ୍ଧିର ଭୂମି ଭାବରେ ଛିଡ଼ା ହୋଇଛି। ମହାପ୍ରଭୁ ଶ୍ରୀଜଗନ୍ନାଥଙ୍କ ଦିବ୍ୟ ଉପସ୍ଥିତିକୁ ଉଲ୍ଲେଖ କରି ରାଜ୍ଯପାଳ କହିଛନ୍ତି ଯେ , ଏହି ରାଜ୍ୟ ବିଶ୍ୱାସ, ଭକ୍ତି ଏବଂ ବିବିଧତାରେ ଏକତାକୁ ପ୍ରତିଫଳିତ କରେ। ରାଜସ୍ଥାନ ସହିତ ଓଡିଶାର ସାମଞ୍ଜସ୍ୟ ସଂପର୍କରେ ଆଲୋକପାତ କରି ରାଜ୍ଯପାଳ କହିଛନ୍ତି ଯେ, ଉଭୟ ରାଜ୍ୟ ଅନେକ ସମାନତା ବହନ କରନ୍ତି ଏଵଂ ଇତିହାସରେ ଗଭୀର ଭାବରେ ମୂଳ, ପ୍ରାଣବନ୍ତ ପରମ୍ପରାରେ ସମୃଦ୍ଧ ଏବଂ ଦୃଢ଼ ଆଧ୍ୟାତ୍ମିକ ବିଶ୍ୱାସ ଦ୍ୱାରା ପରିଚାଳିତ। ରାଜ୍ଯପାଳ ଉଲ୍ଲେଖ କରିଛନ୍ତି ଯେ, ଉଭୟ ରାଜ୍ୟର ସାଂସ୍କୃତିକ ଗର୍ବ ମନ୍ଦିର, ପର୍ବ ଏବଂ ଗୋଷ୍ଠୀ ଜୀବନ ମାଧ୍ୟମରେ ପ୍ରତିଫଳିତ ହୁଏ l ଲୋକଙ୍କ ସହଭାଗୀ ନୀତି ଏବଂ ସାଧାରଣ ମୂଲ୍ୟବୋଧକୁ ଉଜ୍ଜ୍ୱଳ କରିଥାଏ। ବାଣିଜ୍ୟ, ଶିଳ୍ପ, ଶିକ୍ଷା ଏବଂ ସାମାଜିକ ସେବା କ୍ଷେତ୍ରରେ ଓଡ଼ିଶାରେ ରାଜସ୍ଥାନୀ ଗୋଷ୍ଠୀର ଅବଦାନକୁ ରାଜ୍ଯପାଳ ପ୍ରଶଂସା କରି କହିଛନ୍ତି ଯେ , ସେମାନଙ୍କର ପ୍ରୟାସ ରାଜ୍ୟର ସାମାଜିକ ଏବଂ ଆର୍ଥିକ ଗଠନକୁ ସମୃଦ୍ଧ କରିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦୃଷ୍ଟିକୋଣ ଏବଂ “ଏକ ଭାରତ ଶ୍ରେଷ୍ଠ ଭାରତ” ଧାରଣାକୁ ଉଲ୍ଲେଖ କରି ରାଜ୍ଯପାଳ କହିଥିଲେ ଯେ, ବିବିଧତା ପାଳନ କରିବା ଦ୍ବାରା ପାରସ୍ପରିକ ସମ୍ମାନ ଏବଂ ଜାତୀୟ ଏକତା ବୃଦ୍ଧି ହୁଏ l ସାଂସ୍କୃତିକ ବନ୍ଧନକୁ ସୁଦୃଢ଼ କରିବା ଏବଂ ଏକ ସଶକ୍ତ ପ୍ରଗତିଶୀଳ ଭାରତ ପାଇଁ ସାମୂହିକ ଭାବରେ କାମ କରିବା ପାଇଁ ନିରନ୍ତର ପ୍ରୟାସ କରିବାକୁ ରାଜ୍ଯପାଳ ଆହ୍ୱାନ ଜଣାଇଥିଲେ। ଅତିରିକ୍ତ ନିର୍ଦ୍ଦେଶକ ପୋଲିସ (ରେଳବାଇ ଓ ଉପକୂଳ ସୁରକ୍ଷା) ଅରୁଣ ବୋଥ୍ରାଙ୍କ ସମେତ ରାଜସ୍ଥାନର ମୂଳ ବାସିନ୍ଦାମାନେ ଓଡ଼ିଶାରେ ରହିବାର ସେମାନଙ୍କର ଅଭିଜ୍ଞତା ବାଣ୍ଟିଥିଲେ ଏବଂ ଉଭୟ ରାଜ୍ୟର ମହାନତା ସଂପର୍କରେ ଅବତାରଣା କରିଥିଲେ। ଏହି କାର୍ଯ୍ୟକ୍ରମରେ ବିଭିନ୍ନ ଅନୁଷ୍ଠାନ ତରଫରୁ ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ପରିବେଷିତ ହୋଇଥିଲା। ରାଜ୍ୟପାଳଙ୍କ ଏଡିସି କୁଲଦୀପ ମୀନା ଏହି ସମାରୋହରେ ସ୍ୱାଗତ ଭାଷଣ ପ୍ରଦାନ କରିଥଲେ।
