ଇସଲାମାବାଦ୍ : ଜମ୍ମୁ କଶ୍ମୀରରେ ଚାଲିଥିବା ବିଧାନସଭା ନିର୍ବାଚନ ଉପରେ ପାକିସ୍ତାନ ନଜର ରଖିଛି । ଧାରା ୩୭୦ ଏବଂ ୩୫ଏ ପୁଣି ଥରେ କଶ୍ମୀରରେ ପୁନଃକାର୍ଯ୍ୟକାରୀ ହେବ ବୋଲି ପାକିସ୍ତାନ ଆଶା କରୁଛି । ପାକିସ୍ତାନ ପ୍ରତିରକ୍ଷା ମନ୍ତ୍ରୀ ଖ୍ୱାଜା ଆସିଫ କଶ୍ମୀରକୁ ନେଇ ଏକ ବଡ଼ ବିବୃତ୍ତି ଦେଇଛନ୍ତି । ଜମ୍ମୁ କଶ୍ମୀରରେ ଆର୍ଟିକିଲ ୩୭୦ ଏବଂ ୩୫ଏକୁ ପୁନଃକାର୍ଯ୍ୟକାରୀ କରିବା ପାଇଁ ପାକିସ୍ତାନ ଏବଂ ନ୍ୟାଶନାଲ କନଫରେନ୍ସ-କଂଗ୍ରେସ ମିଳିତ ମେଣ୍ଟ ସମାନ ଚିନ୍ତାଧାରାରେ ଅଛି । ଜମ୍ମୁ କଶ୍ମୀରରେ ଧାରା ୩୭୦ ଏବଂ ୩୫ଏର ପୁନଃକାର୍ଯ୍ୟକାରୀକୁ ନେଇ କଂଗ୍ରେସ ଏଥର ନୀରବ ରହିଛି। କଂଗ୍ରେସ ଏହାର ନିର୍ବାଚନୀ ଇସ୍ତାହାରରେ ମଧ୍ୟ ଉଲ୍ଲେଖ କରିନାହିଁ ।
କିନ୍ତୁ ଗତକାଲି ରାହୁଲ ଗାନ୍ଧୀ ଜମ୍ମୁ କଶ୍ମୀରକୁ ପୂର୍ଣ୍ଣ ରାଜ୍ୟ ପ୍ରଦାନ ବିଷୟରେ କହିଥିଲେ । ପ୍ରତିରକ୍ଷା ମନ୍ତ୍ରୀ ଖ୍ୱାଜା କହିଛନ୍ତି, ଶେଖ ଅବଦୁଲ୍ଲା ଏବଂ ନେହେରୁ ଜମ୍ମୁ କଶ୍ମୀରରେ ଧାରା ୩୭୦ ଏବଂ ୩୫ଏ ନିଷ୍ପତ୍ତି ନେଇଛନ୍ତି । ବର୍ତ୍ତମାନ ଉଭୟ ଦଳ ନିର୍ବାଚନରେ କହୁଛନ୍ତି, ଯଦି ସେମାନଙ୍କ ସରକାର ଗଠନ ହୁଏ ତେବେ ସେମାନେ ଧାରା ୩୭୦ ଏବଂ ୩୫ଏକୁ ପୁନଃକାର୍ଯ୍ୟକାରୀ କରିବେ । ଜମ୍ମୁ କଶ୍ମୀରରେ ଉଭୟ ନ୍ୟାଶନାଲ କନଫରେନ୍ସ ଏବଂ କଂଗ୍ରେସର ମହତ୍ତ୍ୱପୂର୍ଣ ଉପସ୍ଥିତି ରହିଛି ।
ଆଶା କରୁଛି ସେମାନେ ମଧ୍ୟ କ୍ଷମତାକୁ ଆସିବେ, ସେମାନେ ଏହାକୁ ଏକ ନିର୍ବାଚନ ପ୍ରସଙ୍ଗ କରିଛନ୍ତି । ବର୍ତ୍ତମାନ ଜାମ୍ମୁ କାଶ୍ମୀରରେ ଅନୁଷ୍ଠିତ ବିଧାନସଭା ନିର୍ବାଚନ ସମୟରେ କଂଗ୍ରେସର ମନିଫେଷ୍ଟୋରେ ଯେକୌଣସି ସ୍ଥାନରେ ଧାରା ୩୭୦ ଏବଂ ୩୫ଏର ପୁନରୁଦ୍ଧାର ପାଇଁ କୌଣସି ଦାବି ନାହିଁ । ବର୍ତ୍ତମାନ କଂଗ୍ରେସ କେବଳ ଜମ୍ମୁ କଶ୍ମୀର ପାଇଁ ପୂର୍ଣ୍ଣ ରାଜ୍ୟ ମାନ୍ୟତା ଦାବି କରୁଛି । ଅନ୍ୟପକ୍ଷରେ, କଂଗ୍ରେସର ସହଯୋଗୀ ନ୍ୟାଶନାଲ କନଫରେନ୍ସ ପାର୍ଟି ଧାରା ୩୭୦ ଏବଂ ୩୫ଏର ପୁନରୁଦ୍ଧାର ପାଇଁ ସ୍ୱର ଉତ୍ତୋଳନ କରୁଛି । ଏହି ପ୍ରସଙ୍ଗରେ ଭାଜପା ନେତାମାନେ କଂଗ୍ରେସ ଉପରେ ଆକ୍ରମଣ କରୁଛନ୍ତି ।
