ଭୁବନେଶ୍ୱର: ଓଡ଼ିଶାର ଏକ ବିଶେଷ ରାଜନୈତିକ ପରିସ୍ଥିତିରେ ନୂଆପଡ଼ା ଉପ ନିର୍ବାଚନ ହେଉଛି । ଆଗାମୀ ନୂଆପଡ଼ା ଉପନିର୍ବାଚନ କେବଳ ପ୍ରାର୍ଥୀମାନଙ୍କ ମଧ୍ୟରେ ଏକ ପ୍ରତିଯୋଗିତା ନୁହେଁ – ଏହା ଆମ ସମ୍ବିଧାନ, ଧର୍ମନିରପେକ୍ଷତା ଓ ଓଡ଼ିଶାର ସମସ୍ତ ସଂପ୍ରଦାୟର ଗଣତାନ୍ତ୍ରିକ ଅଧିକାରର ଭବିଷ୍ୟତ ଉପରେ ଏକ ଜନମତ ସଂଗ୍ରହ । ତେଣୁ ସି.ପି.ଆଇ.(ଏମ୍) ଓଡ଼ିଶା ରାଜ୍ୟ କମିଟି ନୂଆପଡ଼ାର ଜନତା, ଗଣତାନ୍ତ୍ରିକ ଓ ଧର୍ମନିରପେକ୍ଷ ଶକ୍ତି, ଶ୍ରମିକ, କୃଷକ, ଯୁବକ, ମହିଳା, ଦଳିତ, ଆଦିବାସୀ, ସଂଖ୍ୟାଲଘୁ ଓ ସମସ୍ତ ସଚେତନ ନାଗରିକଙ୍କୁ ଏକଜୁଟ ହୋଇ ବିଜେପିର ସାମ୍ପ୍ରଦାୟିକ-ହିନ୍ଦୁତ୍ୱବାଦୀ ରାଜନୀତିକୁ ବିଛିନ୍ନ ଏବଂ ପରାସ୍ତ କରିବା ପାଇଁ କଂଗ୍ରେସ ପ୍ରାର୍ଥୀଙ୍କୁ ଭୋଟ୍ ଦେବାକୁ ଆହ୍ୱାନ ଜଣାଉଛି । ରାଜନୈତିକ ଦୃଷ୍ଟିରୁ ଏହି ଉପନିର୍ବାଚନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଓଡ଼ିଶାରେ ଡ଼ବଲ ଇଞ୍ଜିନ ବିଜେପି ସରକାର ସମୟରେ ସାଂପ୍ରଦାୟିକ ହିଂସା, ସାମାଜିକ ବିଦ୍ୱେଷ, ଦଳିତ ଉତ୍ପୀଡ଼ନ, ଆଦିବାସୀ ବିସ୍ଥାପନ ଏବଂ ମହିଳା ନିର୍ଯ୍ୟାତନା ଅତ୍ୟନ୍ତ ଉଦ୍ବେଗଜନକ ଭାବେ ବୃଦ୍ଧି ପାଇଛି । ବିଜେପି ଏବଂ ଏହାର ସହଯୋଗୀ ସଂଗଠନମାନେ ହିନ୍ଦୁତ୍ୱବାଦୀ ରାଜନୀତି ପାଇଁ ସାମାଜିକ ସଦ୍ଭାବ ଏବଂ ସଂପ୍ରୀତିକୁ ବିଭାଜନ କରିବାକୁ ଚେଷ୍ଟା କରୁଛନ୍ତି । ଏହାକୁ ପରାସ୍ତ କରି ସାଂପ୍ରଦାୟିକ ସଦ୍ଭାବ ଓ ଗଣତାନ୍ତ୍ରିକ ଅଧିକାରକୁ ରକ୍ଷା କରିବା ଜରୁରୀ ବୋଲି ସି.ପି.ଆଇ.(ଏମ୍) ବିଚାର କରୁଛି । ୧୬ ମାସର ଶାସନରେ ବିଜେପି ନିର୍ବାଚନ ପ୍ରତିଶୃତିକୁ ଭୁଲି ଯାଇଛି । ରାଜ୍ୟରେ ଉତ୍କଟ ବେକାରୀ, ବିପର୍ଯ୍ୟସ୍ତ ଆଇନ ଶୃଙ୍ଖଳା ପରିସ୍ଥିତି ଏବଂ ଅପରାଧିକରଣ ରାଜନୀତି ଯୋଗୁଁ ଜନ ଜୀବନ ଦୁର୍ବିସହ ହୋଇ ପଡ଼ିଛି । ବିରୋଧୀ ମତକୁ ଦମନ ଏବଂ ନାଗରିକ ସ୍ୱାଧୀନତା ଉପରେ କଟକଣା ଗଣତନ୍ତ୍ରକୁ ଦୁର୍ବଳ କରୁଛି ।
କୃଷି ସଙ୍କଟ, ମଜୁରୀରେ ଶୋଷଣ, ପ୍ରବାସ ଓ ଲଗାମହୀନ ମୂଲ୍ୟବୃଦ୍ଧିରେ ନୂଆପଡ଼ାର ସାଧାରଣ ଜନତା, କୃଷକ, ଶ୍ରମିକ, ଛୋଟ ବ୍ୟବସାୟୀ ଏବଂ ଯୁବକ ଜର୍ଜରିତ । ବିଜେପିର ନୀତି କର୍ପୋରେଟ ଲୁଣ୍ଠନ ଏବଂ ସାଂପ୍ରଦାୟିକମେଣ୍ଟର ମଧୁଚନ୍ଦ୍ରିକାକୁ ସୁଦୃଢ କରୁଛି । ନୂଆପଡ଼ା ଉପ ନିର୍ବାଚନରେ ସମସ୍ତଙ୍କୁ କାମ, ରୋଜଗାର, ସ୍ୱାସ୍ଥ୍ୟ, ଶିକ୍ଷା, ମୂଲ୍ୟବୃଦ୍ଧି ରୋକିବା ଓ ସାମାଜିକ ନ୍ୟାୟ ଇତ୍ୟାଦି ଗୁରୁତ୍ୱପୂର୍ଣ୍ଣ ପ୍ରସଙ୍ଗ ହୋଇଛି । ଏହି ପୃଷ୍ଠଭୂମିରେ ସି.ପି.ଆଇ.(ଏମ୍) ଓଡ଼ିଶା ରାଜ୍ୟ କମିଟି ନୂଆପଡ଼ାର ସମସ୍ତ ଗଣତାନ୍ତ୍ରିକ ଭୋଟରଙ୍କୁ କଂଗ୍ରେସ ପ୍ରାର୍ଥୀଙ୍କୁ ଭୋଟ ଦେଇ ବିଜେପିର ସାଂପ୍ରଦାୟିକ ଯୋଜନାକୁ ପରାସ୍ତ କରିବାକୁ ଅନୁରୋଧ କରୁଛି । ଆଜିର ପରିସ୍ଥିତିରେ ଜନତାଙ୍କ ଅଧିକାର, ଧର୍ମନିରପେକ୍ଷତା ଓ ଗଣତନ୍ତ୍ରର ବିଜୟ ହେବା ଜରୁରୀ । ଏହି ଉପ ନିର୍ବାଚନରେ ଓଡ଼ିଶାର ଗଣତାନ୍ତ୍ରିକ ଏବଂ ଧର୍ମନିରପେକ୍ଷ ରାଜନୀତି ପାଇଁ ନୂଆପଡ଼ା ଏକ ସ୍ପଷ୍ଟ ବାର୍ତ୍ତା ଦେଉ ବୋଲି ନୂଆପଡ଼ାର ଭୋଟରମାନଙ୍କୁ ସି.ପି.ଆଇ.(ଏମ୍) ଓଡ଼ିଶା ରାଜ୍ୟ କମିଟି ଆହ୍ୱାନ କରୁଛି ।
