ରାଜସ୍ଥାନ: ରାଜସ୍ଥାନରୁ ଏକ ଦୁଃଖଦ ଘଟଣା ସାମ୍ନାକୁ ଆସିଛି। ପାର୍ବତୀ ନଦୀରୁ ଦମ୍ପତିଙ୍କ ମୃତଦେହ ଉଦ୍ଧାର କରାଯାଇଛି। ଔଷଧ ଆଣିବା ପାଇଁ ଘରୁ ବାହାରିଥିବା ଏକ ଦମ୍ପତିଙ୍କ ମୃତଦେହ ପାର୍ବତୀ ନଦୀରେ ମିଳିବା ପରେ ରାଜସ୍ଥାନର ଧୋଲପୁର ଜିଲ୍ଲାରେ ଉତ୍ତେଜନା ପ୍ରକାଶ ପାଇଛି। ମଙ୍ଗଳବାର ଦିନ ପୋଲିସ ଏହି ଘଟଣା ସମ୍ପର୍କରେ ଦେଇଥିବା ସୂଚନା ଅନୁଯାୟୀ, ପ୍ରାରମ୍ଭିକ ତଦନ୍ତରେ ଏହାକୁ ହତ୍ୟା ଏବଂ ଆତ୍ମହତ୍ୟା ଉଭୟ ଦୃଷ୍ଟିକୋଣରୁ ଦେଖାଯାଉଛି। ମୃତକଙ୍କ ନାମ ୩୫ ବର୍ଷୀୟ ମହେଶ ଏବଂ ତାଙ୍କ ୩୦ ବର୍ଷୀୟ ପତ୍ନୀ ବବିତା, ଯେଉଁମାନେ ଧୋଣ୍ଡେ କା ପୁରା ଗାଁର ବାସିନ୍ଦା, ବୋଲି ଚିହ୍ନଟ କରାଯାଇଛି। ମହେଶ ଆଗ୍ରାରେ ଶ୍ରମିକ ଭାବରେ କାମ କରୁଥିଲେ।ସୋମବାର ଦିନ ଦିହୋଲି ଥାନା ଅଞ୍ଚଳର ଧୋଣ୍ଡେ କା ପୁରା ଗାଁ ନିକଟ ପାର୍ବତୀ ନଦୀରେ ଏହି ହୃଦୟବିଦାରକ ଘଟଣା ଘଟିଛି। ସୋମବାର ସକାଳେ ଏହି ଦମ୍ପତି ନିଜ ମୋଟରସାଇକେଲରେ ଆଗ୍ରା ଯାଇଥିଲେ। ପାର୍ବତୀ ନଦୀ କୂଳରେ ସେମାନଙ୍କ ମୋଟରସାଇକେଲ ଏବଂ ମହେଶଙ୍କ ପରିଚୟପତ୍ର ଥିବା ଏକ ବ୍ୟାଗ ମିଳିଥିଲା, ଯାହା ଫଳରେ ସେମାନେ ନଦୀରେ ପଡ଼ିଯାଇଥିବା କିମ୍ବା ଠେଲି ଦିଆଯାଇଥିବା ଆଶଙ୍କା କରାଯାଉଛି।
ଗାଁ ଲୋକେ ପ୍ରଥମେ ନଦୀରେ ମୃତଦେହ ଦେଖି ତୁରନ୍ତ ପୋଲିସକୁ ଖବର ଦେଇଥିଲେ। ଡିହୋଲି ଥାନା ପ୍ରଭାରୀ ପରମଜିତ ସିଂହ ତାଙ୍କ ଦଳ ସହିତ ଘଟଣାସ୍ଥଳରେ ପହଞ୍ଚି ଉଭୟ ମୃତଦେହକୁ ନଦୀରୁ ବାହାର କରିଥିଲେ। ଥାନା ପ୍ରଭାରୀ ପରମଜିତ ସିଂହ କହିଛନ୍ତି ଯେ ପରିବାର ଲୋକଙ୍କ ଉପସ୍ଥିତିରେ ମୃତଦେହ ଉଦ୍ଧାର କରାଯାଇ ପୋଷ୍ଟମର୍ଟମ ପାଇଁ ସରକାରୀ ଶବାଗାରକୁ ପଠାଯାଇଛି। ପୋଷ୍ଟମର୍ଟମ ରିପୋର୍ଟ ଆସିବା ପରେ ହିଁ ମୃତ୍ୟୁର ସଠିକ୍ କାରଣ ଜଣାପଡିବ। ପୋଲିସ ବର୍ତ୍ତମାନ ମାମଲାର ପୁଙ୍ଖାନୁପୁଙ୍ଖ ତଦନ୍ତ କରୁଛି। ଏହା ଏକ ଦୁର୍ଘଟଣା, ଆତ୍ମହତ୍ୟା ନା କେହି ସେମାନଙ୍କୁ ହତ୍ୟା କରିଛି ତାହା ପୋଲିସ ଜାଣିବାକୁ ଚେଷ୍ଟା କରୁଛି। ଦମ୍ପତି ଘରୁ ବାହାରିବା ଠାରୁ ମୃତଦେହ ମିଳିବା ପର୍ଯ୍ୟନ୍ତ ସମସ୍ତ ଘଟଣାକ୍ରମର ତଦନ୍ତ କରାଯାଉଛି। ପରିବାର ସଦସ୍ୟ ଏବଂ ପରିଚିତମାନଙ୍କୁ ମଧ୍ୟ ପଚରାଉଚରା କରାଯାଉଛି।
