ଉତ୍ତରପ୍ରଦେଶ: ଉତ୍ତରପ୍ରଦେଶର ସମ୍ଭଲରେ ଏକ ଚାଞ୍ଚଲ୍ୟକର ଘଟଣା ଘଟିଛି। ଏକ ଦମ୍ପତିଙ୍କୁ ୪୫ ବର୍ଷୀୟ ଅନୀଶ ନାମକ ବ୍ୟକ୍ତିଙ୍କୁ ସ୍କ୍ରୁଡ୍ରାଇଭର ଓ ପ୍ଲାୟାର ଭଳି ଉପକରଣ ସାହାଯ୍ୟରେ ନିର୍ମମ ଭାବେ ହତ୍ୟା କରିଥିବା ନେଇ ଅଭିଯୋଗ ହୋଇଛି। ଅଭଯୋଗ ଆଧାରରେ ପୋଲିସ ଦମ୍ପତିଙ୍କୁ ଗିରଫ କରିଛି। ଅନୀଶଙ୍କ ପରିବାର ଏହି ହତ୍ୟାର କାରଣ ୭ ଲକ୍ଷ ଟଙ୍କାର ଋଣ ବୋଲି ଦାବି କରିଥିବା ବେଳେ, ପୋଲିସ ଏହାକୁ ଅନୀଶଙ୍କ ସହ ଅନୈତିକ ସମ୍ପର୍କରୁ ଉତ୍ପନ୍ନ ଏକ ଷଡ଼ଯନ୍ତ୍ର ବୋଲି କହିଛି।
ଅନୀଶଙ୍କ ବାପା ମୁସ୍ତାକିମ କହିଛନ୍ତି, “ସେମାନେ ମୋ ପୁଅର ହାତ-ଗୋଡ଼ ଭାଙ୍ଗି ଦେଇଥିଲେ, ତା’ର ଲୁଗା ଖୋଲି ନିର୍ମମ ଭାବେ ହତ୍ୟା କରିଥିଲେ।” ସେ ଆହୁରି କହିଛନ୍ତି ଯେ ଅନୀଶଙ୍କ ବାହାଘର ସ୍ଥିର ହୋଇଥିଲା ଏବଂ ସେ ପଡ଼ୋଶୀ ରଈସ ଅହମଦଙ୍କୁ କେତେ ବର୍ଷ ତଳେ ଦିଆଯାଇଥିବା ୭ ଲକ୍ଷ ଟଙ୍କା ଋଣ ଫେରାଇବାକୁ କହିବା ପାଇଁ ତାଙ୍କ ଘରକୁ ଯାଇଥିଲେ। “ସେମାନେ ମୋ ପୁଅକୁ ଏତେ ନିର୍ମମ ଭାବେ ମାରିଦେଲେ ଯେ ମୁଁ ଏହାକୁ ବର୍ଣ୍ଣନା ମଧ୍ୟ କରିପାରୁ ନାହିଁ,” ମୁସ୍ତାକିମ କହିଛନ୍ତି। ଅନୀଶଙ୍କ ପରିବାର କହିଛି ଯେ ଆହତ ଅବସ୍ଥାରେ ଅନୀଶ କୌଣସି ପ୍ରକାରେ ରଈସଙ୍କ ଘରୁ ଖସି ନିଜ ଘରକୁ ପଳାଇ ଆସିଥିଲେ, କିନ୍ତୁ ସେଠାରେ ତାଙ୍କର ମୃତ୍ୟୁ ହୋଇଥିଲା।
ଅତିରିକ୍ତ ପୋଲିସ ଅଧୀକ୍ଷକ ରାଜେଶ କୁମାର ଶ୍ରୀବାସ୍ତବ କହିଛନ୍ତି, “ଗତକାଲି ରାତିରେ ଅନୀଶଙ୍କ ମୃତ୍ୟୁ ସମ୍ପର୍କରେ ସୂଚନା ମିଳିଥିଲା। ଆମେ ଏକ ହତ୍ୟା ମାମଲା ରୁଜୁ କରୁଛୁ ଏବଂ ଆଗକୁ କାର୍ଯ୍ୟାନୁଷ୍ଠାନ ନିଆଯିବ।” ସେ ଆହୁରି କହିଛନ୍ତି, “ତଦନ୍ତରୁ ଜଣାପଡ଼ିଛି ଯେ ଅନୀଶଙ୍କ ପଡ଼ୋଶୀ ରଈସ ଅହମଦ ଓ ତାଙ୍କ ପତ୍ନୀ ସିତାରା ଏହି ହତ୍ୟାକାଣ୍ଡ ଘଟାଇଛନ୍ତି। ଅନୀଶଙ୍କ ସହ ସିତାରାଙ୍କର ଅନୈତିକ ସମ୍ପର୍କ ଥିଲା। ରଈସ ଓ ସିତାରା ମିଶି ଅନୀଶଙ୍କୁ ହତ୍ୟା କରିବାକୁ ଯୋଜନା କରିଥିଲେ ଏବଂ ତାଙ୍କୁ ଘରକୁ ଡାକି ହତ୍ୟା କରିଥିଲେ।” ସିତାରା କାହିଁକି ଏହି ହତ୍ୟା ଯୋଜନାରେ ସାମିଲ ହେଲେ, ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।
