ଭଉଣୀ ଘରୁ ଭାଇର ଚୋରି

ଭୁବନେଶ୍ୱର: ଭଉଣୀ ବିଶ୍ବାସରେ ଭାଇ ଦେଲା ବିଷ । ଭଉଣୀ ଘରେ ବୁଲାଇ ଥିଲା କଳାକନା । ଅଭିଯୁକ୍ତଙ୍କୁ ରାଜଧାନୀ ଭୁବନେଶ୍ବରରୁ ଗିରଫ କରିଛି ପୋଲିସ୍ । ବ୍ରହ୍ମପୁର ଖୋଡାସିଂରୁ ଘଟିଛି ଏଭଳି ଘଟଣା । ସରଧାବାଲିରେ ରହୁଥିବା ଅଜିତ କୁମାର ପଣ୍ଡାଙ୍କ ବାସଭବନରୁ ଚୋରି କରିଥିଲା ନିଜ ଶଳା ସୌମ୍ୟ ରଞ୍ଜନ ପାଢୀ । ସୌମ୍ୟ ରଞ୍ଜନ ଭୁବନେଶ୍ବରରେ ଏକ ଋଣ ପ୍ରଦାନକାରୀ ସଂସ୍ଥାରେ ଚୋରି ଅଳଙ୍କାର ବନ୍ଧା ପକାଇ ଆଣିଥିବା ଟଙ୍କାରେ ନିଜ ବାକି ସୁଝିଥିଲେ । ତେବେ ଚୋରି ନେଇ ଅଭିଯୋଗ ପରେ ବୌଦନାଥପୁର ପୋଲିସ ତଦନ୍ତ ଆରମ୍ଭ କରିଥିଲା । ସୌମ୍ୟ ଭୁବନେଶ୍ବରରେ ଚୋରି ସୁନାରୁ କିଛି ବନ୍ଧା ପକାଇ ଦେଢ ଲକ୍ଷ ଟଙ୍କା ଆଣିଥିବା ପୋଲିସ ସୂଚନା ପାଇଥିଲା । ପରେ ଭୁବନେଶ୍ବରରେ ଚଢାଉ କରି ସୌମ୍ୟକୁ ଗିରଫ କରିବାରେ ସଫଳ ହୋଇଥିଲା ପୋଲିସ । ରଞ୍ଜନଠାରୁ ଦୁଇଟି ସୁନା ଚେନ୍, ହୀରା ଖଚିତ ମଙ୍ଗଳସୁତ୍ର, ଗୋଟିଏ ସୁନା ମୁଦି ଏବଂ ୭୬ ହଜାର ଟଙ୍କା ଜବତ କରିଛି ପୋଲିସ । ଅଜିତଙ୍କ ଘରେ ଶଳା ସୌମ୍ୟ ରଞ୍ଜନ ପାଢୀ ରହିବାକୁ ଆସିଥିବା ବେଳେ ଏଭଳି କାଣ୍ଡ ଭିଆଇଥିଲା । ସେ ନିଜ ଭଉଣୀର ଆଲମାରି ଭାଙ୍ଗି ଗୋଟିଏ ରାଣୀ ହାର, ଦୁଇଟି ସୁନା ଚେନ୍, ହୀରା ଖଚିତ ମଙ୍ଗଳସୁତ୍ର , ଗୋଟିଏ ସୁନା ମୁଦି ଏବଂ ଏକ ଲକ୍ଷ ଟଙ୍କା ଚୋରି କରିଥିଲା । ସେ ଋଣ ସୁଝିବା ପାଇଁ ଏହି ଚୋରି କରିଥିବା ଜଣାପଡିଛି ।