ଦିଲ୍ଲୀର ଦୁଇଟି କଲେଜକୁ ବୋମା ଧମକ

ନୂଆଦିଲ୍ଲୀ: ବୁଧବାର ଦିଲ୍ଲୀ ବିଶ୍ୱ ବିଦ୍ୟାଳୟର ଦୁଇଟି କଲେଜକୁ ବୋମା ଧମକ ଇମେଲ ଆସିଥିଲା । ଯାହା ଫଳରେ ସୁରକ୍ଷା ଯାଞ୍ଚ ପାଇଁ ଏଜେନ୍ସି ଟିମ ଘଟଣାସ୍ଥଳରେ ପହଞ୍ଚିଥିଲେ । ଅଧିକାରୀ ଜଣଙ୍କ କହିଛନ୍ତି, ଧମକ ଇମେଲରେ ଆସିଥିଲା । ଇମେଲ ଧମକଗୁଡିକ ଉତ୍ତର ଦିଲ୍ଲୀର ରାମଜସ କଲେଜ ଏବଂ ଦକ୍ଷିଣ ଦିଲ୍ଲୀର ଦେଶବନ୍ଧୁ କଲେଜକୁ ପଠାଯାଇଥିଲା । “ରାମଜସ କଲେଜର ପ୍ରିନ୍ସିପାଲ୍ ଅଧିକାରୀମାନଙ୍କୁ ସୂଚନା ଦେଇଥିଲେ ଯେ ସେ ରାତି ୧:୫୯ ରେ ଏକ ଧମକପୂର୍ଣ୍ଣ ଇମେଲ୍ ପାଇଥିଲେ, ଯାହା ପରେ ଦିଲ୍ଲୀ ପୋଲିସ ଏବଂ ବୋମା ନିଷ୍କ୍ରିୟକାରୀ ଦଳ (BDT) କ୍ୟାମ୍ପସରେ ପହଞ୍ଚି ତଦନ୍ତ ଆରମ୍ଭ କରିଥିଲେ,” ଉତ୍ତର ଜିଲ୍ଲାର ଡେପୁଟି ପୋଲିସ କମିଶନର ରାଜା ବାନ୍ଥିଆ କହିଛନ୍ତି। ଡିସିପି କହିଛନ୍ତି ଯେ ପୋଲିସ ସମଗ୍ର ଅଞ୍ଚଳକୁ ଘେରାବନ୍ଦୀ କରି ସମସ୍ତ କ୍ୟାମ୍ପସ କୋଠା ଏବଂ ଖୋଲା ସ୍ଥାନଗୁଡ଼ିକର ପୁଙ୍ଖାନୁପୁଙ୍ଖ ତଲାସ ଆରମ୍ଭ କରିଛି। ସେ କହିଛନ୍ତି ଯେ ଏପର୍ଯ୍ୟନ୍ତ କୌଣସି ସନ୍ଦେହଜନକ ବସ୍ତୁ ମିଳିନାହିଁ।