ବେଙ୍ଗାଲୁରୁ: କର୍ଣ୍ଣାଟକର ଚାମରାଜନଗର ଜିଲ୍ଲାର ମାଲେ ମହାଦେଶ୍ୱର ହିଲ୍ସ ବନ୍ୟପ୍ରାଣୀ ଅଭୟାରଣ୍ୟରୁ ଏକ ମା’ ବାଘୁଣୀ ସହ ତା’ର ୪ ଶାବକଙ୍କ ମୃତଦେହ ଉଦ୍ଧାର ହୋଇଛି । ଏମାନଙ୍କୁ କେହି ଉଦ୍ଦେଶ୍ୟମୂଳକ ଭାବେ ଖାଦ୍ୟରେ ବିଷ ଦେଇ ହତ୍ୟା କରିଥିବା ସନ୍ଦେହ କରାଯାଉଛି । ତେବେ ଏହି ଘଟଣାକୁ ନେଇ କେବଳ ରାଜ୍ୟରେ ନୁହେଁ ବରଂ ଦେଶବ୍ୟାପୀ ତୀବ୍ର ଆଲୋଡନ ସୃଷ୍ଟି ହୋଇଛି । ରାଜ୍ୟ ବନମନ୍ତ୍ରୀ ଈଶ୍ୱର ଖଣ୍ଡରେ ଏହି ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି । ସମସ୍ତ ପ୍ରକ୍ରିୟା ଏବଂ ପୋଷ୍ଟମର୍ଟମ ପରେ ହିଁ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ବନବିଭାଗ କହିଛି । ପ୍ରକାଶ, ବନବିଭାଗ ଅଧିକାରୀମାନେ କହିଛନ୍ତି ଯେ, ବାଘୁଣୀଟି କିଛି ଦିନ ପୂର୍ବରୁ ଏକ ଗାଈକୁ ମାରିଥିଲା ।
ମଧ୍ୟପ୍ରଦେଶ ପରେ କର୍ଣ୍ଣାଟକରେ ସର୍ବାଧିକ ବାଘ ଅଛନ୍ତି । ଏଠାରେ ବାଘଙ୍କ ସଂଖ୍ୟା ୫୬୩ । ବନ୍ୟପ୍ରାଣୀଙ୍କ ସହିତ ବଢ଼ୁଥିବା ସଂଘର୍ଷ, ବିଶେଷକରି ବାଘମାନେ ଗୋରୁମାନଙ୍କୁ ଆକ୍ରମଣ କରି ସେମାନଙ୍କୁ ନିଜର ଶିକାର କରୁଥିବାରୁ, ଗ୍ରାମବାସୀମାନେ ପ୍ରାୟତଃ ବିଷ ଏବଂ ଫାଶ ବ୍ୟବହାର କରି ସେମାନଙ୍କୁ ନିପାତ କରିବାକୁ ଚେଷ୍ଟା କରନ୍ତି । ବନ ବିଭାଗ ଦଳ ମୃତ ବାଘଙ୍କଠାରୁ ନମୁନା ନେଇ ତଦନ୍ତ ପାଇଁ ପଠାଇଛନ୍ତି । ବନ ଅଧିକାରୀମାନେ ବର୍ତ୍ତମାନ ସ୍ଥାନୀୟ ମେଷପାଳକମାନଙ୍କୁ ପଚରାଉଚୁରା କରୁଛନ୍ତି, ଯଦିଓ ବାସିନ୍ଦାମାନେ ଗାଈର ମାଲିକାନାକୁ ଅସ୍ୱୀକାର କରୁଛନ୍ତି । ଅନ୍ୟପକ୍ଷେ ତଦନ୍ତକୁ ତ୍ୱରାନ୍ୱିତ କରିବା ପାଇଁ ବରିଷ୍ଠ ବନ ଅଧିକାରୀ, ଜଣେ ପଶୁଚିକିତ୍ସା ଅଧିକାରୀ ଏବଂ ଜଣେ ବନ୍ୟପ୍ରାଣୀ ବିଶେଷଜ୍ଞଙ୍କୁ ନେଇ ଏକ ଉଚ୍ଚସ୍ତରୀୟ ତଦନ୍ତ କମିଟି ଗଠନ କରାଯାଇଛି । କମିଟି ୧୪ ଦିନ ମଧ୍ୟରେ ଏହାର ନିର୍ଣ୍ଣୟ ଦାଖଲ କରିବ ବୋଲି ଆଶା କରାଯାଉଛି ।
