ସାଧାରଣ ନିର୍ବାଚନରେ ପରାଜିତ ହେବା ପରେ ବି କ୍ଷମତା ଅହଂକାରରେ ବୁଡ଼ି ରହିଛି ବିଜେଡି
ସରକାରୀ ପ୍ରକଳ୍ପ ଉଦ୍ଘାଟନ ସମୟରେ ଯେଉଁ ବ୍ୟାନର ଲଗାଯାଇଛି, ତାହା ବିଜେଡିର ଦଳୀୟ କାର୍ଯ୍ୟକ୍ରମ ଭଳି ଲାଗୁଛି
ବିଜେଡି ନେତା ଅହଂକାର ଛାଡ଼ି ଲୋକଙ୍କ ମତକୁ ସମ୍ମାନ ଦିଅନ୍ତୁ
ଭୁବନେଶ୍ୱର,: ଓଡ଼ିଶାବାସୀଙ୍କ ଆଶୀର୍ବାଦରୁ ଭାରତୀୟ ଜନତା ପାର୍ଟି ଆଜି ସରକାର ଗଠନ କରିଛି । ବିଜେଡି ହାରିଯାଇଥିଲେ ମଧ୍ୟ ଏହାକୁ ସହଜରେ ଗ୍ରହଣ କରିପାରୁନାହିଁ । ଲୋକେ ବିଜେଡିକୁ ପ୍ରତ୍ୟାଖ୍ୟାନ କରିଦେଇଥିଲେ ମଧ୍ୟ ସେ କ୍ଷମତାରେ ରହିଛି ବୋଲି ମନେ ମନେ ଭାବୁଛି । ଏହାର ଉଦାହରଣ ଭୁବନେଶ୍ୱର ମଧ୍ୟ ନିର୍ବାଚନ ମଣ୍ଡଳୀରେ ଦେଖିବାକୁ ମିଳିଛି । ଏହି ନିର୍ବାଚନ ମଣ୍ଡଳୀର ଲକ୍ଷ୍ମୀସାଗରଠାରେ ଏକ ସ୍ମଶାନ ପ୍ରକଳ୍ପର ଉଦ୍ଘାଟନୀ କାର୍ଯ୍ୟକ୍ରମ ୨୧ ତାରିଖରେ ଥିଲା । ଏଥିପାଇଁ ସରକାରଙ୍କ ତରଫରୁ ୬୦ ଲକ୍ଷ ଟଙ୍କା ବ୍ୟୟ ହୋଇଛି । ଏହି ପ୍ରକଳ୍ପକୁ ନଗଦ ନିର୍ବାଚନରେ ପରାଜିତ ହୋଇଥିବା ବିଜେଡି ନେତା ଶ୍ରୀ ଅଶୋକ ପଣ୍ଡା ଉଦ୍ଘାଟନ କରିଛନ୍ତି । ଏପରିକି ଫଳକରେ ମୁଖ୍ୟ ଅତିଥିଭାବେ ତାଙ୍କ ନାମ ମଧ୍ୟ ରହିଛି । ଏହା ଜନ ବିରୋଧୀ ଓ ସମ୍ବିଧାନର ବିରୁଦ୍ଧାଚରଣ କରୁଛି ବୋଲି ରାଜ୍ୟ କାର୍ଯ୍ୟାଳୟରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ରାଜ୍ୟ ମୁଖ୍ୟପାତ୍ର ଶ୍ରୀ ଦିଲୀପ ମଲ୍ଲିକ କହିଛନ୍ତି ।
ଶ୍ରୀ ମଲ୍ଲିକ କହିଛନ୍ତି ଯେ, ବିଜୁ ଜନତା ଦଳ ଏବେ ବି କ୍ଷମତା ଲୋଭରେ ରହିଛି । ସାଧାରଣ ନିର୍ବାଚନରେ ପରାଜିତ ହେବା ପରେ ବି କ୍ଷମତା ଅହଂକାରରେ ବୁଡ଼ି ରହିଛି । ଜଣେ ପରାଜିତ ନେତାଙ୍କ ଦ୍ୱାରା ପ୍ରକଳ୍ପ ଉଦ୍ଘାଟନ କରାଯିବା ସମ୍ବିଧାନର ବିରୁଦ୍ଧାଚରଣ କରୁଛି । ଯେଉଁମାନେ ଶ୍ରୀ ପଣ୍ଡାଙ୍କୁ ପ୍ରକଳ୍ପ ଉଦ୍ଘାଟନ ପାଇଁ ଡାକିଥିଲେ ସେମାନଙ୍କୁ କିପରି ଲଜ୍ଜ୍ୟା ଲାଗିଲା ନାହିଁ । ସେହିପରି ଶ୍ରୀ ପଣ୍ଡା ନିର୍ବାଚନରେ ହାରିବା ସତ୍ୱେ ଏକ ସରକାରୀ କାର୍ଯ୍ୟକ୍ରମରେ ମୁଖ୍ୟ ଅତିଥିଭାବେ ଯୋଗ ଦେବା ଅତ୍ୟନ୍ତ ଦୁର୍ଭାଗ୍ୟଜନକ । ଏଥିରୁ ସ୍ପଷ୍ଟ ପ୍ରମାଣିତ ହେଉଛି ଯେ, ନବୀନ ପଟ୍ଟନାୟକ ଓ ତାଙ୍କ ନେତାମାନେ ଅଂହକାରରେ ବୁଡ଼ି ରହିଛନ୍ତି । ୨୪ ବର୍ଷ ସରକାରରେ ଥିବା ବିଜେଡିର ନେତା ଶ୍ରୀ ପଣ୍ଡାଙ୍କୁ ସରକାରୀ ନିୟମ ନିଶ୍ଚୟ ଜଣାଥିବ । ପ୍ରକଳ୍ପର ଯେତେବେଳେ ଉଦ୍ଘାଟନ ହୁଏ ବା ଶିଳାନ୍ୟାସ ହୁଏ ତା’ର ସ୍ୱତନ୍ତ୍ର ବିଧିବିଧାନ ରହିଛି । ଏହାକୁ ଜଣେ ନିର୍ବାଚିତ ପ୍ରତିନିଧି ଉଦ୍ଘାଟନ କରିବା କଥା । ମାତ୍ର ପଣ୍ଡା କୌଣସି ନିର୍ବାଚିତ ପ୍ରତିନିଧି ନ ହୋଇ ପ୍ରକଳ୍ପ ଉଦ୍ଘାଟନ କରି ସମସ୍ତ ନୀତିନିୟମକୁ ଉଲ୍ଲଂଘନ କରିଛନ୍ତି । ଉକ୍ତ ପ୍ରକଳ୍ପକୁ ଯେଉଁଭଳି ଭାବେ ଉଦ୍ଘାଟନ କରାଯାଇଛି, ତାହା ବିଜୁ ଜନତା ଦଳର କାର୍ଯ୍ୟକ୍ରମ ଭଳି ଲାଗୁଛି । ସରକାରୀ ପ୍ରକଳ୍ପ ଉଦ୍ଘାଟନ ସମୟରେ ଯେଉଁ ବ୍ୟାନର ଲଗାଯାଇଛି ତାହା ବିଜୁ ଜନତା ଦଳର ଦଳୀୟ କାର୍ଯ୍ୟକ୍ରମ ଭଳି ଲାଗୁଛି । ବ୍ୟାନରରେ ନବୀନ ବାବୁଙ୍କ ଫଟୋ ରହିବା ଆଉ ଏକ ହାସ୍ୟାସ୍ପଦ ଘଟଣା । ଏଭିଳି ଅସାମ୍ବିଧାନିକ କାର୍ଯ୍ୟକ୍ରମକୁ ଲୋକେ ବିରୋଧ କରିବା ଆରମ୍ଭ କଲେଣି । ତେଣୁ ବିଜେଡି ନେତା ଅହଂକାର ଛାଡ଼ି ଲୋକଙ୍କ ମତକୁ ସମ୍ମାନ ଦିଅନ୍ତୁ ବୋଲି ଶ୍ରୀ ମଲ୍ଲିକ କହିଛନ୍ତି ।
ଏହି ସାମ୍ବାଦିକ ସମ୍ମିଳନୀରେ ରାଜ୍ୟ କାର୍ଯ୍ୟକାରିଣୀ ସଦସ୍ୟ ତଥା ଭୁବନେଶ୍ୱର ମଧ୍ୟର ବିଧାୟକ ପ୍ରାର୍ଥୀ ଜଗନ୍ନାଥ ପ୍ରଧାନ, ଜିଲ୍ଲା ସଭାପତି ନିରଞ୍ଜନ ମିଶ୍ର ପ୍ରମୁଖ ଉପସ୍ଥିତ ଥିଲେ ।
