ନୂଆଦିଲ୍ଲୀ: ମାର୍ଚ୍ଚ ମାସ ପାଇଁ ବ୍ୟାଙ୍କ ଛୁଟି ତାଲିକା ପ୍ରକାଶ କରିଛି ଭାରତୀୟ ରିଜର୍ଭ ବ୍ୟାଙ୍କ । ମାର୍ଚ୍ଚ ମାସରେ ୧୪ ଦିନ ବନ୍ଦ ରହିବ ବ୍ୟାଙ୍କ । ଦେଶର ବିଭିନ୍ନ ରାଜ୍ୟ ଏବଂ ସହରରେ ବ୍ୟାଙ୍କଗୁଡ଼ିକ ମୋଟ ୧୪ ଦିନ ପାଇଁ ବନ୍ଦ ରହିବ । ୫ଟି ରବିବାର ଏବଂ ଦ୍ୱିତୀୟ ଓ ଚତୁର୍ଥ ଶନିବାର ବ୍ୟତୀତ, ବ୍ୟାଙ୍କ କାର୍ଯ୍ୟ ୭ ଦିନ ପାଇଁ ବନ୍ଦ ରହିବ । ମାର୍ଚ୍ଚ ମାସରେ ଦୁଇଟି ବଡ଼ ପର୍ବ ହେଉଛି ୧୪ ମାର୍ଚ୍ଚରେ ହୋଲି ଏବଂ ୩୧ ମାର୍ଚ୍ଚରେ ଇଦ୍ ଉଲ୍ ଫିତର । ରାଜ୍ୟର ନିର୍ଦ୍ଦିଷ୍ଟ ପର୍ବପର୍ବାଣୀ କ୍ଷେତ୍ରରେ, କେବଳ ସେହି ରାଜ୍ୟଗୁଡ଼ିକରେ ବ୍ୟାଙ୍କଗୁଡ଼ିକ ବନ୍ଦ ରହିବ ।
ନେଗୋସିଆବଲ୍ ଇନଷ୍ଟ୍ରୁମେଣ୍ଟ୍ସ ଆକ୍ଟ ଅନୁଯାୟୀ, ଭାରତୀୟ ରିଜର୍ଭ ବ୍ୟାଙ୍କ-ଆରିବିଆଇର ଛୁଟି ଦିନ ତାଲିକା ଉପରେ ଆଧାରିତ ଏହି ଛୁଟିଦିନଗୁଡ଼ିକ ରାଜ୍ୟ ଏବଂ ପର୍ବ ଅନୁସାରେ ଅଲଗା ହୋଇଥାଏ । ତେବେ ମାର୍ଚ୍ଚ ମାସରେ କେଉଁ ରାଜ୍ୟ ଏବଂ ସହରରେ କେବେ ବ୍ୟାଙ୍କଗୁଡ଼ିକ ବନ୍ଦ ରହିବ ତାହାର ସମ୍ପୂର୍ଣ୍ଣ ତାଲିକା ଜାଣନ୍ତୁ । ବ୍ୟାଙ୍କ ବନ୍ଦ ରହିଲେ ମଧ୍ୟ, ଅନଲାଇନ୍ ବ୍ୟାଙ୍କିଂ ମାଧ୍ୟମରେ କାରବାର କରିହେବ । ଅନଲାଇନ୍ ବ୍ୟାଙ୍କିଂ ଏବଂ ଏଟିଏମ୍ ମାଧ୍ୟମରେ ଟଙ୍କା କାରବାର ଏବଂ ଅନ୍ୟାନ୍ୟ କାମ କରାଯାଇ ପାରିବ । ଛୁଟିଦିନ ଦ୍ୱାରା ବ୍ୟାଙ୍କର ଏହି ସୁବିଧାଗୁଡ଼ିକ ପ୍ରଭାବିତ ହେବ ନାହିଁ । କେବଳ ସେତିକି ନୁହେଁ, ୨୦୨୫ ମାର୍ଚ୍ଚ ମାସରେ ୧୨ ଦିନ ପାଇଁ ଷ୍ଟକ୍ ବଜାରରେ କୌଣସି କାରବାର ହେବ ନାହିଁ । ଶନିବାର ଏବଂ ରବିବାର ମୋଟ ୧୦ ଦିନ ପାଇଁ କୌଣସି କାରବାର ହେବ ନାହିଁ । ଏହା ସହିତ, ୧୪ ମାର୍ଚ୍ଚରେ ହୋଲି ଏବଂ ୩୧ ମାର୍ଚ୍ଚରେ ଇଦ୍-ଉଲ୍-ଫିତରରେ ସେୟାର ବଜାର ବନ୍ଦ ରହିବ ।
