ବ୍ୟୁରୋ: ଜ୍ୟୋତିଷାସ୍ତ୍ରବିତ୍ ଏବଂ ବୈଜ୍ଞାନିକମାନେ ଅନେକ ସମୟରେ ପୃଥିବୀ ଉପରେ ଥିବା ବିପଦ ବିଷୟରେ ଅନେକ ପ୍ରକାର ଆକଳନ କରିଥାନ୍ତି । ସେହିଭଳି ବିଶ୍ୱର ବଡ଼ ବଡ଼ ଭବିଷ୍ୟବକ୍ତାଙ୍କ ମଧ୍ୟରୁ ବୁଲଗେରିଆର ବାବା ଭେଙ୍ଗା ଅନ୍ୟତମ । ବୁଲଗେରିଆର ଏହି ଜଣାଶୁଣା ଭବିଷ୍ୟବକ୍ତା ଅତୀତରେ ଯାହା କହିଛନ୍ତି, ଅନେକାଂଶରେ କିଛି ସତରେ ପରିଣତ ହୋଇଛି । ତାଙ୍କ ଜୀବନ କାଳରେ ସେ ଜଣେ ପରାମର୍ଶଦାତା ଭାବରେ ଖୁବ୍ ଲୋକପ୍ରିୟତା ହାସଲ କରିଥିଲେ । ବାବା ଭେଙ୍ଗାଙ୍କ ଭବିଷ୍ୟ ବାଣୀକୁ ସମସ୍ତେ ବିଶ୍ୱାସ କରନ୍ତି । କାରଣ ତାଙ୍କର ଅନେକ ପୂର୍ବାନୁମାନ ସଠିକ ହୋଇଛି । ବାବା ଭେଙ୍ଗା ମଧ୍ୟ ଆଗାମୀ ଦଶନ୍ଧି ଦଶନ୍ଧି ପାଇଁ ପୃଥିବୀକୁ ଆସୁଥିବା ବଡ଼ ବଡ଼ ବିପଦ ଉପରେ ଅନେକ ଭବିଷ୍ୟବାଣୀ ଦେଇଛନ୍ତି । ଏହାରି ଭିତରେ ଏକ ନୂଆ ଭବିଷ୍ୟବାଣୀ କଥା ଲୋକଲୋଚନକୁ ଆସିଛି । ବାବା ଭେଙ୍ଗାଙ୍କ ଭବିଷ୍ୟବାଣୀ ଅନୁସାରେ ୨୦୪୩ ସୁଦ୍ଧା ୟୁରୋପ ଇସଲାମିକ ଶାସନ ଅଧିନରେ ଆସିଯିବ । ବାବା ଭେଙ୍ଗାଙ୍କ ଭବିଷ୍ୟବାଣୀ ଅନୁସାରେ ୨୦୪୩ ସୁଦ୍ଧା ଇସଲାମିକ ସମ୍ପ୍ରଦାୟ ୟୁରୋପରେ ରାଜନୈତିକ ଶକ୍ତି ହାସଲ କରିବ । ପୂର୍ବାନୁମାନରେ ଜନସଂଖ୍ୟା ଏବଂ ସାଂସ୍କୃତିକ ପରିବର୍ତ୍ତନଗୁଡ଼ିକୁ ବିଚାରକୁ ନିଆଯାଇଛି, ଯାହା ଦ୍ୱାରା ୟୁରୋପରେ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ହେବ । ବାବା ଭେଙ୍ଗା ତାଙ୍କ ଜୀବନରେ ଅନେକ ଗୁରୁତ୍ୱପୂର୍ଣ୍ଣ ଭବିଷ୍ୟବାଣୀ କରିଥିଲେ ।
ସେଥି ମଧ୍ୟରୁ ସୋଭିଏତ୍ ୟୁନିଅନର ଧ୍ୱଂସ, ୯/୧୧ ଆକ୍ରମଣ ଓ ବ୍ରେକ୍ସିଟ୍ ପୂର୍ବାନୁମାନ ସତ୍ୟ ପ୍ରମାଣିତ ହୋଇଥିଲା । ବାବା ଭେଙ୍ଗାଙ୍କ ଭବିଷ୍ୟବାଣୀ ଦଶନ୍ଧି ଧରି ଲୋକଙ୍କ ମଧ୍ୟରେ ଆଲୋଚନାର କେନ୍ଦ୍ର ବିନ୍ଦୁ ପାଲଟିଛି । କାହିଁକି ନା ୨୦୭୬ ସୁଦ୍ଧା ସାମ୍ୟବାଦୀ ଶାସନର ପୁନରାବୃତ୍ତି ଏବଂ ୫୦୭୯ ମସିହାରେ ହେବାକୁ ଥିବା ପ୍ରାକୃତିକ ବିପର୍ଯ୍ୟୟ ଯୋଗୁଁ ବିଶ୍ୱର ଅନ୍ତ ଘଟିବ । ଏହି ଦୁଇଟି ପ୍ରମୁଖ ଭବିଷ୍ୟବାଣୀ ଲୋକଙ୍କ ଧ୍ୟାନ ଆକର୍ଷଣ କରୁଛି । ବାବା ଭେଙ୍ଗା ଭବିଷ୍ୟବାଣୀ କରିଥିଲେ ଯେ ୨୦୭୬ ସୁଦ୍ଧା ଦୁନିଆ ସାମ୍ୟବାଦୀ ଚିନ୍ତାଧାରା ଆଡ଼କୁ ଫେରିଯିବ । ଭେଙ୍ଗାଙ୍କ କହିବା ଅନୁସାରେ ସାମୂହିକ ଶାସନକୁ ନେଇ ବିଶ୍ୱବ୍ୟାପୀ ପରିବର୍ତ୍ତନ ହେବ, ଯାହା ଫଳରେ ସାମ୍ୟବାଦ ପୁଣି ଥରେ ପ୍ରଭାବଶାଳୀ ହେବ ।
ବାବା ଭେଙ୍ଗାଙ୍କ ଶେଷ ଭବିଷ୍ୟବାଣୀ ଅନୁସାରେ, ୫୦୭୯ ମସିହାରେ ଏକ ପ୍ରାକୃତିକ ବିପର୍ଯ୍ୟୟ ବିଶ୍ୱକୁ ଧ୍ୱଂସ କରିବାର ଶେଷ କାରଣ ହେବ । ସେ ଦାବି କରିଛନ୍ତି ଯେ ଏହି ବିପର୍ଯ୍ୟୟ ମଣିଷ ଦ୍ୱାରା ହେବ ନାହିଁ, ବରଂ ଏହା ଏକ ପ୍ରାକୃତିକ ଘଟଣା ହେବ, ଯାହା ମାନବତାକୁ ସମ୍ପୂର୍ଣ୍ଣ ଭାବେ ଶେଷ କରିଦେବ । କିନ୍ତୁ ଏହି ଭବିଷ୍ୟବାଣୀକୁ ନେଇ ଲୋକେ ପ୍ରଶ୍ନ ଉପରେ ପ୍ରଶ୍ନ ଉଠାଇଛନ୍ତି । ଏହା ମାନବ ଜାତିର ଭବିଷ୍ୟତ ଏବଂ ପୃଥିବୀରେ ଜୀବନର ଅସ୍ତିତ୍ୱକୁ ନେଇ ଲୋକଙ୍କ ମନରେ ନାନା ଆଶଙ୍କାକୁ ଜନ୍ମ ଦେଇଛି । ବାବା ଭେଙ୍ଗା ୧୯୧୧ ମସିହାରେ ଉତ୍ତର ମାକେଡୋନିଆର ଷ୍ଟ୍ରୁମିକା ଠାରେ ଜନ୍ମଗ୍ରହଣ କରିଥିଲେ । ସେ ଜଣେ ଧାର୍ମିକ ନେତା ତଥା ହର୍ବାଲ ଡାକ୍ତର ଥିଲେ । ମାତ୍ର ୧୨ ବର୍ଷ ବୟସରେ ଆଖି ହରାଇବା ସତ୍ୱେ ସେ ଭବିଷ୍ୟତ ଦେଖିବାର ଇଶ୍ୱରୀୟ ଉପହାର ପାଇଥିବାର ଦାବି କରିଥିଲେ । ୧୧ ଅଗଷ୍ଟ ୧୯୯୬ ରେ ତାଙ୍କର ଦେହାନ୍ତ ଘଟିଥିଲା । ସେ ଅନେକ ଭବିଷ୍ୟବାଣୀ କରିଯାଇଛନ୍ତି । ଯାହା ମଧ୍ୟରେ ତାଙ୍କର ଏହା ମଧ୍ୟ ବିଶ୍ୱାସ ରହିଥିଲା ଯେ ଦୁନିଆ ୫୦୭୯ରେ ସମାପ୍ତ ହୋଇଯିବ । କିନ୍ତୁ ଏହି ଭବିଷ୍ୟବାଣୀ ବାସ୍ତବରେ ସତ ହେବ କି ନାହିଁ ତାହା କେବଳ ଆଗାମୀ ସମୟରେ ହିଁ ଜଣାପଡିବ ।
