ଆସାମ ବନ୍ୟା : ଗଲାଣି ୩୭ ଜୀବନ

ଆସାମ : ରବିବାର ସକାଳେ ଅରୁଣାଞ୍ଚଳ ପ୍ରଦେଶର ରାଜଧାନୀ ଇଟାନଗରରେ ବାଦଲ ଫଟା ବର୍ଷା ହୋଇ ବନ୍ୟା ଭଳି ପରିସ୍ଥିତି ଉପୁଜିଛି । ଯାହାଫଳରେ ବହୁ ଅସୁବିଧାର ସମ୍ମୁଖୀନ ହୋଇଛନ୍ତି ସାଧାରଣ ଅଥବା ତଳିଆ ଅଂଚଳରେ ଥିବା ଲୋକ। ସେପଟେ ଆସାମରେ ପାଖାପାଖି ଗୋଟିଏ ସପ୍ତାହ ହେବ ମୂଶଳଧାରାରେ ବର୍ଷା ଚାଲଇଛି । ଆସାମ ସରକାରଙ୍କ ରିପୋର୍ଟ ମୁତାବକ ଏଭଳି ବର୍ଷା ଫଳରେ ୧୯ଟି ଜିଲ୍ଲାର ପାଖାପାଖି ୪ ଲକ୍ଷରୁ ଅଧିକ ଲୋକ ପ୍ରଭାବିତ ହୋଇଛନ୍ତି । ଚଳିତ ବର୍ଷ ବନ୍ୟା ଓ ମାଟି ଅତଡା ଖସିବା ଫଳରେ ମୃତକଙ୍କ ସଂଖ୍ୟା ୩୭ ରେ ପହଂଚିଛି । ବନ୍ୟା ପ୍ରଭାବିତ ଲୋକଙ୍କୁ ସହାୟତା ଯୋଗାଇଦେବାକୁ ସରକାରଙ୍କ ତରଫରୁ ୧୦୦ ରୁ ଅଧିକ ରିଲିଫ୍ କେନ୍ଦ୍ର ଖୋଲାଯାଇଛି । ଅନ୍ୟପଟେ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ମୌସୁମୀ ବର୍ଷା କାରଣରୁ ବିଭିନ୍ନ ଅଞ୍ଚଳରେ ଦେଖାଦେଇଥିବା ବନ୍ୟା ପରିସ୍ଥିତି ଓ ଆଗାମୀ କାଲିକୁ ନଜରରେ ରଖି ସମୀକ୍ଷା ବୈଠକ କରିଛନ୍ତି । ଏହି ବୈଠକରେ ଗୃହ, ଜଳ ସଂପଦ, ନଦୀ ବିକାଶ, ପୃଥୀବିଜ୍ଞାନ, ପର୍ଯ୍ୟଟନ, ସଡକ ପରିବହନ ମନ୍ତ୍ରଣାଳୟର ସଚିବମାନେ ଉପସ୍ଥିତ ଥିଲେ ।