ଭୁବନେଶ୍ୱର: କିଛି ଲୋକ ବହୁତ କମ୍ ଖାଦ୍ୟ ଗ୍ରହଣ କରନ୍ତି, ତଥାପି ସେମାନଙ୍କର ଓଜନ ବଢ଼ିବାରେ ଲାଗେ। ଓଜନ ବୃଦ୍ଧି ସର୍ବଦା ଅତ୍ୟଧିକ ଖାଇବା କିମ୍ବା କମ୍ ବ୍ୟାୟାମ ଯୋଗୁଁ ହୁଏ ନାହିଁ। ଦିଲ୍ଲୀର ଫୋର୍ଟିସ୍ ହସ୍ପିଟାଲର ଏଣ୍ଡୋକ୍ରାଇନୋଲୋଜିଷ୍ଟ ଡାକ୍ତର ସଞ୍ଜୟ ଗୁପ୍ତାଙ୍କ ଅନୁଯାୟୀ, ଓଜନ ବୃଦ୍ଧି କେବଳ କ୍ୟାଲୋରି ଗ୍ରହଣ ଉପରେ ନିର୍ଭର କରେ ନାହିଁ। ହରମୋନ୍ ଅସନ୍ତୁଳନ, ନିଦ୍ରାର ଅଭାବ ଏବଂ ଚାପ ଇତ୍ୟାଦି ଶରୀରର ମେଟାବୋଲିଜିମ୍ ଉପରେ ପ୍ରଭାବ ପକାଇଥାଏ, ଯାହା ଓଜନ ବୃଦ୍ଧି କରିପାରେ।
ଡାକ୍ତରଙ୍କ କହିବା ଅନୁସାରେ ,ଯେତେବେଳେ ଥାଇରଏଡ୍ ଗ୍ରନ୍ଥି ପର୍ଯ୍ୟାପ୍ତ ପରିମାଣରେ ଥାଇରଏଡ୍ ହରମୋନ୍ ଉତ୍ପାଦନ କରେ ନାହିଁ ସେତେବେଳେ ହାଇପୋଥାଇରଏଡିଜ୍ମ ହୁଏ। ଏହି ଅବସ୍ଥା ମେଟାବୋଲିଜିମ୍କୁ ଧୀର କରିଦିଏ, ଯାହା ଫଳରେ ଓଜନ ବଢ଼ିଥାଏ। ଏହି କାରଣରୁ ଥକ୍କାପଣ ଏବଂ ଦୁର୍ବଳତା ଅନୁଭବ ହୁଏ। ଏହା ସହିତ, ହଠାତ୍ ଓଜନ ବଢ଼ିବାକୁ ଲାଗେ। ଏହା ବ୍ୟତୀତ, ଚର୍ମରେ ଶୁଷ୍କତା, କେଶ ଝଡ଼ିବା, ଥଣ୍ଡା ସହ୍ୟ ନ କରିପାରିବା, ମାଂସପେଶୀ ଯନ୍ତ୍ରଣା ଏବଂ ସନ୍ଧିରେ କଠିନତା ଭଳି ସମସ୍ୟା ମଧ୍ୟ ଦେଖାଦିଏ। PCOS ହେଉଛି ଏକ ହରମୋନ୍ ବ୍ୟାଧି ଯାହା ମହିଳାଙ୍କ ଓଭାରିରେ ପୁରୁଷ ହରମୋନ୍ (ଆଣ୍ଡ୍ରୋଜେନ୍)ର ଅତ୍ୟଧିକ ଉତ୍ପାଦନ ଯୋଗୁଁ ହୁଏ। PCOS ଇନସୁଲିନ୍ ପ୍ରତିରୋଧକୁ ବୃଦ୍ଧି କରେ, ଯାହା ଓଜନ ବୃଦ୍ଧିର ଆଶଙ୍କା ବୃଦ୍ଧି କରେ। ନିଦ୍ରା ଅଭାବ ଏବଂ ଚାପ କର୍ଟିସୋଲର ସ୍ତରକୁ ବୃଦ୍ଧି କରେ, ଯାହା ଫଳରେ ଭୋକ ବଢ଼ିଯାଏ ଏବଂ ମେଟାବୋଲିଜିମ୍ ମନ୍ଥର ହୋଇଯାଏ। ଯେଉଁମାନେ ରାତିରେ 6 ଘଣ୍ଟାରୁ କମ୍ ଶୋଇଥାନ୍ତି ସେମାନେ ଏହି ସମସ୍ୟାର ଅଧିକ ସମ୍ମୁଖୀନ ହୁଅନ୍ତି।
