ରିୟାଦ୍ : ଇସ୍ରାଏଲ ପାଇଁ ସାଉଦିଆରବ ରୂପେ ଆଉ ଏକ ବଡ଼ ଚ୍ୟାଲେଞ୍ଜ୍ ସାମ୍ନାକୁ ଆସିବାକୁ ଯାଉଛି । ସାଉଦି ଆରବ ଏବେ ପାଲେଷ୍ଟାଇନ୍ ପାଇଁ ସମର୍ଥନ ଜୁଟାଇବା ଲକ୍ଷ୍ୟରେ ଏକ ବଡ ପଦକ୍ଷେପ ଯୋଜନା କରିଥିବା ସୂଚନା ମିଳିଛି । ରିପୋର୍ଟ ଅନୁସାରେ ନଭେମ୍ବର ୧୧ ଏବଂ ୧୨ ତାରିଖରେ ସାଉଦିଆରବ୍ ଏକ ଆରବ୍-ଇସଲାମ୍ ସମ୍ମିନଳୀ ଆୟୋଜନ କରିବ ଏବଂ ଏଥିରେ ପାଲେଷ୍ଟାଇନ୍, ଗାଜା ଷ୍ଟ୍ରିପ୍ ଏବଂ ଲେବାନନ୍ରେ ଇସ୍ରାଏଲ୍ ସେନା ପକ୍ଷରୁ ଚାଲିଥିବା ଯୁଦ୍ଧ ଉପରେ ମୁଖ୍ୟତଃ ଆଲୋଚନା କରାଯିବ । ଏହି ଦୁଇ ଦିନିଆ ସମ୍ମିଳନୀ ରିୟାଦ୍ ଠାରେ ଆୟୋଜିତ ହେବ ବୋଲି କୁହାଯାଉଛି।
ଏହି ସମ୍ମିଳନୀ ଗତ ବର୍ଷର ୨୦୨୩ ଆରବ-ଇସଲାମିକ୍ ଶିଖର ସମ୍ମିଳନୀର ଅଂଶବିଶେଷ ରୂପେ ଆୟୋଜିତ ହେବ । ଆରବ୍ ରାଜା ସଲମାନ ଏବଂ କ୍ରାଉନ୍ ପ୍ରିନ୍ସ ମହମ୍ମଦ ବିନ୍ ସଲମାନ ଅଲ ସୟଦଙ୍କ ନିର୍ଦ୍ଦେଶରେ ଏହା ଘୋଷଣା କରାଯାଇଛି । ଏହି ସମ୍ମିଳନୀରେ ଇସଲାମୀୟ ରାଷ୍ଟ୍ରମାନେ ପାଲେଷ୍ଟାଇନ ପାଇଁ ରାଜ୍ୟ ପ୍ରତିଷ୍ଠା ପାଇଁ କିପରି ଇସ୍ରାଏଲ ଉପରେ ଚାପ ପକାଇବେ ସେସମ୍ପର୍କରେ ଆଲୋଚନା କରିବେ । ଯୁଦ୍ଧକୁ ସମାପ୍ତ କରିବାର ଆବଶ୍ୟକତା ହେଉଛି ଏକ ପ୍ରମୁଖ ପ୍ରସଙ୍ଗ, କାରଣ ଇସ୍ରାଏଲ ଏବଂ ଇରାନ ମଧ୍ୟରେ ତିକ୍ତତା ମଧ୍ୟ ପୂର୍ବରେ ଅସ୍ଥିରତା ସୃଷ୍ଟି କରିପାରେ ବୋଲି ସାଉଦିଆରବ ପ୍ରେସ ଏଜେନ୍ସି ରିପୋର୍ଟ କରିଛି । ସାଉଦି ଆରବ ରାଜ୍ୟ ଗାଜା ଉପରେ ଇସ୍ରାଏଲର ଆକ୍ରମଣକୁ ନିନ୍ଦା କରିବା ସହ ଲେବାନନର ଅଖଣ୍ଡତାକୁ କ୍ଷୁର୍ଣ୍ଣ କରୁଥିବା କାର୍ଯ୍ୟକୁ ମଧ୍ୟ ଦୃଢ଼ ବିରୋଧ କରିଛି ।
୨୦୨୩ ଆରବ-ଇସ୍ଲାମିକ ଶିଖର ସମ୍ମିଳନୀରେ ସାଉଦି ଆରବର ବୈଦେଶିକ ମନ୍ତ୍ରୀ, ଇଜିପ୍ଟ, କତାର, ଜୋର୍ଡାନ, ଇଣ୍ଡୋନେସିଆ, ନାଇଜେରିଆ, ଏବଂ ତୁର୍କୀ ଭଳି ଇସଲାମ ରାଷ୍ଟ୍ର ସମୂହଙ୍କ ବିଦେଶ ମନ୍ତ୍ରୀ ତଥା ଓଆଇସିର ସାଧାରଣ ସଚିବମାନେ ଗାଜା ବିରୁଦ୍ଧରେ ହୋଇଥିବା ଇସ୍ରାଏଲୀୟ ଆକ୍ରମଣକୁ ରୋକିବା ଏବଂ ଶାନ୍ତି ପାଇଁ ଉଦ୍ୟମ କରିବା ପାଇଁ ଉଦ୍ୟମ ସମନ୍ୱୟ କରିବା ଦିଗରେ ସହମତ ହୋଇଥିଲେ । ସୂଚନାଯୋଗ୍ୟ, ୟାହିୟା ସିନୱାରଙ୍କ ମୃତ୍ୟୁ ପରେ ଇସ୍ରାଏଲ ଅନ୍ୟ ହମାସ ଅପରେଟିଭ୍ ଖୋଜିବା ପାଇଁ ଏହି ଅଞ୍ଚଳକୁ ଟାର୍ଗେଟ କରିଛି । ଅନ୍ୟପକ୍ଷେ ଯୁଦ୍ଧପୀଡ଼ିତ ସାଧାରଣ ନାଗରିକଙ୍କ ପାଖରେ ଖାଦ୍ୟ, ଖାଦ୍ୟ ଏବଂ ପାନୀୟ ଜଳର ଅଭାବ ରହିଛି ।
