ନୂଆଦିଲ୍ଲୀ: ଅହମ୍ମଦାବାଦ ଏୟାର ଇଣ୍ଡିଆ ବିମାନ ଦୁର୍ଘଟଣା ଘଟଣାରେ ପାଇଲଟ୍ ସୁମିତ ସବରୱାଲଙ୍କ ପିତା ପୁଷ୍କରାଜ ସବରୱାଲ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ସେ ଅଭିଯୋଗ କରିଛନ୍ତି ଯେ ସରକାରୀ ତଦନ୍ତ ରିପୋର୍ଟ ମିଥ୍ୟା ଏବଂ ଦୁର୍ଘଟଣା ପାଇଁ ତାଙ୍କ ପୁଅକୁ ଭୁଲରେ ଦାୟୀ କରାଯାଇଛି। ସେ ଏବେ ସୁପ୍ରିମକୋର୍ଟଙ୍କୁ ଦୁର୍ଘଟଣାର ନୂତନ ନ୍ୟାୟିକ ତଦାରଖ ତଦନ୍ତ ନିର୍ଦ୍ଦେଶ ଦେବାକୁ ଦାବି କରିଛନ୍ତି। ୧୨ ଜୁନ୍ ୨୦୨୫ରେ, ଅହମ୍ମଦାବାଦ ବିମାନବନ୍ଦରରୁ ଉଡାଣ ଭରିବା ପରେ ଏୟାର ଇଣ୍ଡିଆର ବୋଇଂ ୭୮୭ ଡ୍ରିିମଲାଇନର୍ ଦୁର୍ଘଟଣାଗ୍ରସ୍ଥ ହୋଇଥିଲା। ଏହି ଦୁର୍ଘଟଣାରେ ୨୨୯ ଯାତ୍ରୀ, ୧୨ ଜଣ କ୍ରୁ ସଦସ୍ୟ ଏବଂ ଭୂମିରେ ଥିବା ୧୯ ଜଣଙ୍କ ମୃତ୍ୟୁ ଘଟିଥଲା। ପାଇଲଟ୍ କ୍ୟାପଟେନ୍ ସୁମିତ ସବରୱାଲଙ୍କ ପିତା ପୁଷ୍କରାଜ ସବରୱାଲ ସୁପ୍ରିମକୋର୍ଟରେ ଏକ ଆବେଦନ ଦାଖଲ କରିଛନ୍ତି। ଆବେଦନରେ ଅଭିଯୋଗ କରାଯାଇଛି ଯେ ସରକାରୀ ତଦନ୍ତ ପକ୍ଷପାତପୂର୍ଣ୍ଣ ଏବଂ ଅସମ୍ପୂର୍ଣ୍ଣ।
ରିପୋର୍ଟରେ ଉଲ୍ଲେଖ କରାଯାଇଛି ଯେ ପାଇଲଟ୍ ତ୍ରୁଟି ଯୋଗୁଁ ଦୁର୍ଘଟଣା ଘଟିଥିଲା, କିନ୍ତୁ ବାସ୍ତବରେ ବିମାନଟି ଏକ ଯାନ୍ତ୍ରିକ ତ୍ରୁଟିର ସମ୍ମୁଖୀନ ହୋଇଥିଲା। ଦୁର୍ଘଟଣା ସମୟରେ, ବିମାନର ରାମ୍ ଏୟାର ଟର୍ବାଇନ୍ (ଆରଏଟି) ସ୍ୱୟଂଚାଳିତ ଭାବରେ ନିୟୋଜିତ ହୋଇଥିଲା, ଯାହା କେବଳ ସେତେବେଳେ ଘଟେ ଯେତେବେଳେ ବିମାନର ବୈଦ୍ୟୁତିକ କିମ୍ବା ନିୟନ୍ତ୍ରଣ ବ୍ୟବସ୍ଥା ବିଫଳ ହୁଏ। ଆବେଦନକାରୀ ଯୁକ୍ତି ଦେଇଛନ୍ତି ଯେ ଯଦି ସିଷ୍ଟମରେ କୌଣସି ତ୍ରୁଟି ଥିଲା, ତେବେ ପାଇଲଟ୍ କିପରି ଦାୟୀ ହୋଇପାରିବ? ଆମେ ସମ୍ପୂର୍ଣ୍ଣ ନିରପେକ୍ଷ ତଦନ୍ତ ଚାହୁଁଛୁ। ପାଇଲଟଙ୍କ ମୃତ୍ୟୁ ପରେ ତାଙ୍କ ଭାବାବେଗକୁ କ୍ଷୁର୍ଣ୍ଣ କରିବା ଅତ୍ୟନ୍ତ ଭୁଲ। ପାଇଲଟ୍ ସଂଗଠନ, ଭାରତୀୟ ପାଇଲଟ୍ ମହାସଂଘ (ଏଫଆଇପି) ମଧ୍ୟ ଏହି ଆବେଦନରେ ସାମିଲ ହୋଇଛି। ଏଫଆଇପି ଯୁକ୍ତି ରଖିଛି ଯେ ତଦନ୍ତ ରିପୋର୍ଟରେ ବୋଇଂ ୭୮୭ର ସଫ୍ଟୱେର୍ ସିଷ୍ଟମ୍ (ସିସିଏସ୍) ଏବଂ ବୈଦ୍ୟୁତିକ ତ୍ରୁଟି ଭଳି ଅନେକ ବୈଷୟିକ ଦିଗକୁ ଅଣଦେଖା କରାଯାଇଛି।
