ଇନ୍ଦୋର: ଇନ୍ଦୋରରେ ଦୁଇ ଜଣ ଅଷ୍ଟ୍ରେଲିଆ କ୍ରିକେଟରଙ୍କୁ ଅସଦାଟରଣ କରିବା ଅଭିଯୋଗରେ ଗିରଫ ହେଲା ଅଭିଯୁକ୍ତ ଯୁବକ। ଆଇସିସି ମହିଳା ବିଶ୍ୱକପ୍ ୨୦୨୫ ଭାରତରେ ଅନୁଷ୍ଠିତ ହେଉଛି, ଯେଉଁଥିରେ ୮ଟି ଦଳ ଅଂଶଗ୍ରହଣ କରୁଛନ୍ତି। ଏହି ଟୁର୍ଣ୍ଣାମେଣ୍ଟ ୩୦ ସେପ୍ଟେମ୍ବରରେ ଆରମ୍ଭ ହୋଇଥିଲା ଏବଂ ବର୍ତ୍ତମାନ ଏହା ଶେଷ ପର୍ଯ୍ୟାୟରେ ପହଞ୍ଚିଛି। ଟୁର୍ଣ୍ଣାମେଣ୍ଟର ୨୬ତମ ମ୍ୟାଚ୍ ୨୫ ଅକ୍ଟୋବରରେ ଇନ୍ଦୋରରେ ଖେଳାଯିବାକୁ ଯାଉଛି, ଯେଉଁଥିରେ ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକା ପରସ୍ପରକୁ ମୁହାଁମୁହିଁ ହେବେ। ଏହି ମ୍ୟାଚ୍ ପୂର୍ବରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି, ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି। ଇନ୍ଦୋରରେ, ଅଷ୍ଟ୍ରେଲିଆ ମହିଳା କ୍ରିକେଟ ଦଳର ଦୁଇ ଖେଳାଳିଙ୍କୁ ଜଣେ ଯୁବକ ବାଇକରେ ପିଛା କରି ଅସଦାଚରଣ କରିଥିବା ଅଭିଯୋଗ ହୋଇଛି।
ଘଟଣାଟି ଗୁରୁବାର ସକାଳେ, ଅକ୍ଟୋବର ୨୩ ତାରିଖରେ ଖଜରାନା ରୋଡ୍ ଅଞ୍ଚଳରେ ଘଟିଛି। ପୋଲିସର ସୂଚନା ଅନୁଯାୟୀ, ଦୁଇ ଖେଳାଳି ସେମାନଙ୍କ ହୋଟେଲରୁ ବାହାରି ଏକ କାଫେକୁ ଯାଉଥିବା ସମୟରେ ଜଣେ ବ୍ୟକ୍ତି ବାଇକ୍ ରେ ଆସି ସେମାନଙ୍କ ପଛେ ପଛେ ଯିବା ଆରମ୍ଭ କରିଥିଲେ। ସବ-ଇନ୍ସପେକ୍ଟର ନିଧି ରଘୁବଂଶୀ କହିଛନ୍ତି ଯେ ଯୁବକ ଜଣକ ପାଖକୁ ଆସି ଜଣେ ଖେଳାଳିଙ୍କୁ ଅନୁପଯୁକ୍ତ ଭାବରେ ଛୁଇଁବାକୁ ଚେଷ୍ଟା କରିଥିଲେ, ତା’ପରେ ସେଠାରୁ ପଳାଇ ଯାଇଥିଲେ। ଏହି ଘଟଣା ପରେ, ଉଭୟ ଖେଳାଳି ତୁରନ୍ତ ସେମାନଙ୍କ ଦଳର ସୁରକ୍ଷା ଅଧିକାରୀ ଡାନି ସିମନ୍ସଙ୍କ ସହିତ ଯୋଗାଯୋଗ କରିଥିଲେ।
ସେ ସ୍ଥାନୀୟ ସୁରକ୍ଷା ଅଧିକାରୀଙ୍କ ସହିତ ସମନ୍ୱୟ ରକ୍ଷା କରି ସହାୟତା ପାଇଁ ଏକ ଗାଡ଼ି ପଠାଇଥିଲେ। ସୂଚନା ପାଇବା ପରେ, ସହକାରୀ ପୋଲିସ କମିଶନର ହିମାନି ମିଶ୍ର ଘଟଣାସ୍ଥଳରେ ପହଞ୍ଚି ଉଭୟ ଖେଳାଳିଙ୍କ ବୟାନ ରେକର୍ଡ କରିଥିଲେ। ଏମ୍ଆଇଜି ପୋଲିସ ଷ୍ଟେସନରେ ଏକ ଏଫଆଇଆର ରୁଜୁ କରାଯାଇଥିଲା। ଏହି ଘଟଣାରେ ସନ୍ଦିଗ୍ଧ ବ୍ୟକ୍ତିଙ୍କୁ ଜଣେ ପଥଚାରୀଙ୍କ ମାଧ୍ୟମରେ ଚିହ୍ନଟ କରାଯାଇଥିଲା। ସେ ସନ୍ଦିଗ୍ଧ ବ୍ୟକ୍ତିଙ୍କ ବାଇକ୍ ନମ୍ବର ନୋଟ କରିଥିଲେ। ଏହି ସୂଚନା ଆଧାରରେ, ଅକିଲ ଖାନଙ୍କୁ ଗିରଫ କରାଯାଇଛି। ପୋଲିସର କହିବା ଅନୁଯାୟୀ, ଖାନଙ୍କ ବିରୁଦ୍ଧରେ ପୂର୍ବରୁ ଅପରାଧିକ ମାମଲା ରୁଜୁ ହୋଇଛି ଏବଂ ସମଗ୍ର ଘଟଣାର ତଦନ୍ତ ଚାଲିଛି। ଏହି ଘଟଣା ସହରରେ ସୁରକ୍ଷା ଉପରେ ପ୍ରଶ୍ନ ଉଠାଇଛି, ବିଶେଷକରି ଯେତେବେଳେ ଇନ୍ଦୋରରେ ଏକ ଅନ୍ତର୍ଜାତୀୟ କ୍ରିକେଟ ଇଭେଣ୍ଟ ଆୟୋଜିତ ହେଉଛି।
