ସମୁଦ୍ରରେ ବୁଡ଼ିଯାଇ ପର୍ଯ୍ୟଟକ ନିଖୋଜ

ପୁରୀ: ପୁରୀ ସମୁଦ୍ରରେ ଅଘଟଣ ଘଟିଛି । ସମୁଦ୍ରରେ ସ୍ନାନ ବେଳେ ବୁଡ଼ିଯାଇ ପର୍ଯ୍ୟଟକ ନିଖୋଜ ଥିବା ନେଇ ସୂଚନା ରହିଛି । ନିଖୋଜ ପର୍ଯ୍ୟଟକ ଜଣକ ହେଉଛନ୍ତି ମଧ୍ୟପ୍ରଦେଶ ଇନ୍ଦୋରର ପ୍ରଫୁଲ୍ଲ ମହାଳିକ। ଏବେବି ଉଦ୍ଧାର କାର୍ଯ୍ୟ ଜାରି ରହିଛି । ସୂଚନା ମୁତାବକ, ପ୍ରଫୁଲ୍ଲ ଗତ ୯ ତାରିଖରେ ସାତଜଣ ସାଙ୍ଗଙ୍କ ସହ ପୁରୀ ବୁଲିବାକୁ ଆସିଥିଲେ। ଆଜି ଦିନ ପୂର୍ବାହ୍ନରେ ବେଳାଭୂମିରେ ପ୍ରଫୁଲ୍ଲ ତାଙ୍କ ସାଙ୍ଗମାନଙ୍କ ସହ ସମୁଦ୍ରରେ ସ୍ନାନ କରୁଥିଲେ। ସେହି ସମୟରେ ସମୁଦ୍ରରେ ଏକ ବଡ଼ ଲହଡ଼ି ଆସିବାରୁ ଏଭଳି ଅଘଟଣ ଘଟିଥିଲା । ଖବର ପାଇ ଘଟଣାସ୍ଥଳରେ ସମୁଦ୍ର କୂଳ ଥାନା ପୋଲିସ, ଅଗ୍ନିଶମ ବାହିନୀ ପହଞ୍ଚି ସମୁଦ୍ର ଭିତରେ ବହୁ ଖୋଜାଖୋଜି ଜାରି ରଖିଥିଲେ ମଧ୍ୟ ଏପର୍ଯ୍ୟନ୍ତ ପ୍ରଫୁଲ୍ଲଙ୍କ କୌଣସି ପତ୍ତା ମିଳିନାହିଁ।