ନୂଆଦିଲ୍ଲୀ: ଇରାନ , ଇସ୍ରାଏଲ ଆମେରିକା ମଧ୍ୟରେ ପ୍ରାୟ ମାସେ ଧରି ଚାଲିଥିବା ଯୁଦ୍ଧ ଏବଂ ଆମେରିକାର ସାମରିକ କାର୍ଯ୍ୟାନୁଷ୍ଠାନର ସମ୍ଭାବନା ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପ୍ରଶଂସା କରିଛନ୍ତି ।ଡୋନାଲ୍ଡ ଟ୍ରମ୍ପ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ସେ ଯେକୌଣସି ସମସ୍ୟାର ସମାଧାନ କରିପାରିବେ। ତେବେ ଟ୍ରମ୍ପ ଏହା କେଉଁ ପରିପ୍ରେକ୍ଷୀରେ କହିଛନ୍ତି ତାହା ସ୍ପଷ୍ଟ କରିନାହାନ୍ତି। ମଧ୍ୟପ୍ରାଚ୍ୟ ଯୁଦ୍ଧ ମଧ୍ୟରେ ତୈଳ ସଙ୍କଟ ଦେଖାଦେଇଥିବାବେଳେ ଏହାର ମୁକାବିଲା ପ୍ରସଙ୍ଗରେ କହିଥାଇପାରନ୍ତି ବୋଲି ଚର୍ଚ୍ଚା ହେଉଛି ।
ଭାରତରେ ଥିବା ଆମେରିକୀୟ ଦୂତାବାସ ଶୁକ୍ରବାର ଦିନ ଏହାର ସରକାରୀ ସୋସିଆଲ ମିଡିଆରେ ପୋଷ୍ଟ କରିଛନ୍ତି । ଟ୍ରମ୍ପ ଲେଖିଛନ୍ତି ଯେ, ଭାରତ ସହିତ ଆମର ସୁନ୍ଦର ସମ୍ପର୍କ ଆହୁରି ହେବ । ପ୍ରଧାନମନ୍ତ୍ରୀ ଏବଂ ମୁଁ ଆହୁରି କାମ କରିବୁ । ମଙ୍ଗଳବାର ଦିନ ପ୍ରଧାନମନ୍ତ୍ରୀ ମୋଦିଙ୍କ ସହ ଟେଲିଫୋନରେ ଆଲୋଚନା ପରେ ଟ୍ରମ୍ପଙ୍କ ଏହି ବିବୃତ୍ତି। ଇରାନ ଯୁଦ୍ଧ ଆରମ୍ଭ ହେବା ପରେ (୨୮ ଫେବୃଆରୀ, ୨୦୨୬) ଏହା ଦୁଇ ନେତାଙ୍କ ମଧ୍ୟରେ ପ୍ରଥମ ବାର୍ତ୍ତାଳାପ ଥିଲା। ଆଲୋଚନା ସମୟରେ, ଉଭୟ ମଧ୍ୟପ୍ରାଚ୍ୟ ପରିସ୍ଥିତି ଉପରେ ଆଲୋଚନା କରିଥିଲେ ଏବଂ ଏହି ଅଞ୍ଚଳରେ ସ୍ଥିରତାର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ।ପ୍ରଧାନମନ୍ତ୍ରୀ ମୋଦି ପରେ ତାଙ୍କ ମତାମତ ଟ୍ୱିଟ୍ କରି କହିଛନ୍ତି, “ମୁଁ ରାଷ୍ଟ୍ରପତି ଟ୍ରମ୍ପଙ୍କ ସହ ଫୋନରେ କଥା ହୋଇଥିଲି। ପଶ୍ଚିମ ଏସିଆର ପରିସ୍ଥିତି ଉପରେ ଆମର ଏକ ଉପଯୋଗୀ ଆଲୋଚନା ହୋଇଥିଲା। ଭାରତ ଉତ୍ତେଜନା ହ୍ରାସ ଏବଂ ଶାନ୍ତିର ଶୀଘ୍ର ପୁନଃସ୍ଥାପନକୁ ସମର୍ଥନ କରେ। ହର୍ମୁଜ୍ ପ୍ରଣାଳୀକୁ ଖୋଲା, ସୁରକ୍ଷିତ ଏବଂ ସୁଗମ ରଖିବା ସମଗ୍ର ବିଶ୍ୱ ପାଇଁ ଗୁରୁତ୍ୱପୂର୍ଣ୍ଣ। ଦୁଇ ନେତା ଆଞ୍ଚଳିକ ଶାନ୍ତି, ସ୍ଥିରତା ଏବଂ ଗୁରୁତ୍ୱପୂର୍ଣ୍ଣ ସାମୁଦ୍ରିକ ପଥ ସୁରକ୍ଷା ଉପରେ ନିୟମିତ ଯୋଗାଯୋଗ ବଜାୟ ରଖିବାକୁ ରାଜି ହୋଇଥିଲେ।ଏହା ଉଲ୍ଲେଖନୀୟ ଯେ ଭାରତ ଏହି ସଂଘର୍ଷରେ ସିଧାସଳଖ ଜଡିତ ନୁହେଁ, କିନ୍ତୁ ଏହା ଲଗାତାର ଭାବରେ ଉତ୍ତେଜନା ହ୍ରାସ, ଶାନ୍ତି ଏବଂ ହର୍ମୁଜ୍ ପ୍ରଣାଳୀର ସୁରକ୍ଷା ପାଇଁ ଆହ୍ୱାନ କରିଆସିଛି। ଭାରତର ଆମେରିକା, ଇସ୍ରାଏଲ ଏବଂ ଇରାନ ସହିତ ଭଲ ସମ୍ପର୍କ ରହିଛି, ତେଣୁ ଶାନ୍ତି ପ୍ରୟାସରେ ଏହାର ଭୂମିକା ଗୁରୁତ୍ୱପୂର୍ଣ୍ଣ ହୋଇପାରେ।
