ଲକ୍ଷ୍ନେଠାରେ ବିଧାନସଭାର ସଚିବମାନଙ୍କର ସର୍ବଭାରତୀୟ ସମ୍ମିଳନୀ ଆୟୋଜିତ

ଭୁବନେଶ୍ବର: ଲକ୍ଷ୍ନେଠାରେ ଆୟୋଜିତ 86ତମ ସର୍ବଭାରତୀୟ ବାଚସ୍ପତି ସମ୍ମିଳନୀ ସହ 62ତମ ବିଧାନସଭାର ସଚିବମାନଙ୍କର ସମ୍ମିଳନୀ ଅନୁଷ୍ଠିତ ହୋଇଯାଇଛି । ଏହି ଅବସରରେ ଯୋଗଦେଇ ଓଡ଼ିଶା ବିଧାନସଭାର ସଚିବ ଶ୍ରୀ ସତ୍ଯବ୍ରତ ରାଉତ ବିଧାନସଭାର କାର୍ଯ୍ୟଭାର ଓ ପରିସର ବୃଦ୍ଧି ସହ ଅଧିକ କର୍ମଚାରୀମାନଙ୍କ ନିଯୁକ୍ତି, ବିଭିନ୍ନ ରାଜ୍ଯର ବିଧାନସଭାର କର୍ମଚାରୀମାନଙ୍କ ମଧ୍ୟରେ ରହିଥିବା ଦରମାରେ ତାରତମ୍ଯ ଦୂର କରି ଏକକ ବେତନ ବ୍ଯବସ୍ଥା ପ୍ରଚଳନ ସମ୍ପର୍କରେ ନିଜର ଅଭିବ୍ଯକ୍ତିରେ ଗୁରୁତ୍ବାରୋପ କରିବା ସହ କହିଲେ ଯେ ଓଡ଼ିଶା ବିଧାନସଭାର ଅଧିବେଶନ 2024ରେ 42 ଦିନ ଅନୁଷ୍ଠିତ ହୋଇଥିବାବେଳେ ଏହା ଅନ୍ଯ ରାଜ୍ଯମାନଙ୍କ ତୁଳନାରେ ସର୍ବାଧିକ ଏବଂ ଜାତୀୟ ହାରଠାରୁ ଅଧିକ । ଜୁନ୍ 2024ରୁ ଜୁନ୍ 2025 ମଧ୍ୟରେ 62ଟି ବୈଠକ ସମ୍ପନ୍ନ ହୋଇଛି । ଓଡ଼ିଶା ପ୍ରଥମ ରାଜ୍ଯ ଭାବେ ଜାତୀୟ ଇ-ବିଧାନ ଆପ୍ଲିକେସନ୍ ନେଭା ମାଧ୍ୟମରେ ସମ୍ପୂର୍ଣ୍ଣ କାଗଜବିହୀନ ବଜେଟ ଉପସ୍ଥାପନ କରିବା ସହ ଏବେ ପେପରଲେସ୍ ହାଉସ୍ ଭାବରେ ପରିଗଣିତ ହେଉଛି । ଏହା ଏବେ ଅନ୍ଯ ରାଜ୍ଯ ପାଇଁ ମଡେଲ ସାଜିଛି । ଆମେ 1937 ମସିହାର ପୁରୁଣା ରେକର୍ଡର ଡିଜିଟାଇଜେସନ୍ କରିବା ସହ ଓଡ଼ିଶା ବିଧାନସଭାର ପାଠାଗାରକୁ ରାଜ୍ଯ ସର୍ବୋତ୍ତମ ପାଠାଗାର ଭାବେ ପ୍ରତିଷ୍ଠିତ କରିପାରିଛୁ । ସମ୍ମିଳନୀର ପ୍ରାରମ୍ଭରେ ଉତ୍ତରପ୍ରଦେଶ ବିଧାନସଭାର ପ୍ରମୁଖ ସଚିବ ଶ୍ରୀ ପ୍ରଦୀପ କୁମାର ଦୁବେ ଉଦଘାଟନୀ ଅଭିଭାଷଣ ପ୍ରଦାନ କରିଥିବାବେଳେ ଲୋକସଭାର ମହାସଚିବ ଶ୍ରୀ ଉତ୍ପଳ କୁମାର ସିଂହ ଓ ରାଜ୍ଯସଭାର ମହାସଚିବ ଶ୍ରୀ ପି.ସି. ମୋଦୀ ନିଜର ବକ୍ତବ୍ଯ ଉପସ୍ଥାପନ କରିଥିଲେ । ଉତ୍ତରପ୍ରଦେଶ ବିଧାନ ପରିଷ’ର ପ୍ରମୁଖ ସଚିବ ଡ. ରାଜେଶ ସିଂ ଧନ୍ଯବାଦ ଅର୍ପଣ କରିଥିଲେ । ଏହି ଅବସରରେ ୩୫ଟି ରାଜ୍ୟ ବିଧାନସଭା ଓ ବିଧାନପରିଷଦ ର ସଚିବ ଯୋଗ ଦେଇଥିବାବେଳେ ଓଡ଼ିଶା ସମେତ ତେଲେଙ୍ଗାନା, କର୍ଣ୍ଣାଟକ, କାଶ୍ମୀର, ଗୁଜରାଟ, ନାଗାଲାଣ୍ଡ, ଓ ମଣିପୁରର ସଚିବ ସମ୍ମିଳନୀରେ ଆଲୋଚନାରେ ଅଂଶ ଗ୍ରହଣକରି ନିଜ ନିଜର ସୁଚିନ୍ତିତ ମତ ଉପସ୍ଥାପନ କରିଥିଲେ l ସମ୍ମିଳନୀରେ ବିଧାନସଭାରେ କର୍ମଚାରୀ ସଂଖ୍ୟା ବୃଦ୍ଧି ନେଇ ସହମତି ପ୍ରକାଶ ପାଇ ଥିଲା l