ନୂଆଦିଲ୍ଲୀ: ମହଙ୍ଗା ହେଲା ଟ୍ରେନ୍ ଯାତ୍ରା। ବଢିଲା ଟ୍ରେନ୍ ଭଡା। ରେଳବାଇ ଘୋଷଣା କରିଛି ଯେ ଟ୍ରେନ ଭଡାରେ ପରିବର୍ତ୍ତନ ଡିସେମ୍ବର ୨୬, ୨୦୨୫ରୁ ଲାଗୁ ହେବ। ୨୧୫ କିଲୋମିଟର ପର୍ଯ୍ୟନ୍ତ ନିୟମିତ ଭଡା ବୃଦ୍ଧି କରାଯାଇ ନାହିଁ। ସାଧାରଣ ବର୍ଗରେ ୨୧୫ କିମିରୁ ଅଧିକ ଯାତ୍ରା ପାଇଁ କିମି ପିଛା ୧ ପଇସା ବୃଦ୍ଧି କରାଯାଇଛିି। ମେଲ୍ / ଏକ୍ସପ୍ରେସ୍ ନନ୍ ଏସି ପାଇଁ କିମି ପିଛା ୨ ପଇସା ବୃଦ୍ଧି ହୋଇଛି। ଏସି ଯାତ୍ରା ପାଇଁ କିଲୋମିଟର ପିଛା ୨ ପଇସା ବୃଦ୍ଧି କରାଯାଇଛି। ନନ୍ ଏସିରେ ୫୦୦ କିମି ଯାତ୍ରା ପାଇଁ ଅଧିକ ୧୦ ଟଙ୍କା ଦେବାକୁ ପଡିବ। ଏହା ଦ୍ୱାରା ଚଳିତ ବର୍ଷ ୬୦୦ କୋଟି ଟଙ୍କାର ଆୟ କରିବ ରେଲୱେ। ଲୋକେଲ ଟ୍ରେନ୍ ଓ ମାସିକିଆ ଟିକେଟ (ଏମଏସଟି)ରେ କୌଣସି ବୃଦ୍ଧି ହୋଇନାହିଁ। ରେଳବାଇ କହିଛି ଯେ ଉତ୍ତମ ଟ୍ରେନ୍ ପରିଚାଳନା ସୁନିଶ୍ଚିତ କରିବା ପାଇଁ କର୍ମଚାରୀଙ୍କ ସଂଖ୍ୟା ବୃଦ୍ଧି କରାଯାଇଛି। ତେଣୁ, ଭଡ଼ା ରାଜସ୍ୱ ନେଟୱାର୍କ ଏବଂ କର୍ମଚାରୀଙ୍କ ଉପରେ ଖର୍ଚ୍ଚ କରାଯିବ।
ରେଳବାଇ ଭଡ଼ା ବୃଦ୍ଧି ପାଇଁ ଅନେକ କାରଣ ଦର୍ଶାଇଛି। ରେଳବାଇ ଦାବି କରିଛି ଯେ ସେମାନେ ବର୍ଦ୍ଧିତ ଖର୍ଚ୍ଚକୁ ପୂରଣ କରିବା ପାଇଁ ମାଲ ପରିବହନ ବୃଦ୍ଧି କରୁଛନ୍ତି ଏବଂ ସୀମିତ ଭଡ଼ା ବୃଦ୍ଧି କରିଛନ୍ତି। ସୁରକ୍ଷା ପଦକ୍ଷେପଗୁଡ଼ିକ ରେଳ ସୁରକ୍ଷାରେ ଯଥେଷ୍ଟ ଉନ୍ନତି ଆଣିଛି, ଯାହା ଭାରତକୁ ବିଶ୍ୱର ଦ୍ୱିତୀୟ ବୃହତ୍ତମ ମାଲ ପରିବହନକାରୀ ରେଳ ନେଟୱାର୍କ କରିଛି। ପର୍ବ ଋତୁରେ ୧୨,୦୦୦ରୁ ଅଧିକ ଟ୍ରେନର ସଫଳ ପରିଚାଳନା ଉନ୍ନତ ଦକ୍ଷତାର ଏକ ଉଦାହରଣ। ସୂଚନାଯୋଗ୍ୟ, ଚଳିତ ବର୍ଷ ଜୁଲାଇ ୧ ତାରିଖରେ ରେଳବାଇ ଭଡ଼ା ସାମାନ୍ୟ ବୃଦ୍ଧି କରିଥିଲା। ସେତେବେଳେ ଏସି ଶ୍ରେଣୀ ପାଇଁ ପ୍ରତି କିଲୋମିଟରରେ ୨ ପଇସା ଏବଂ ଅଣ-ଏସି ମେଲ୍/ଏକ୍ସପ୍ରେସ୍ ଟ୍ରେନ୍ ପାଇଁ ପ୍ରତି କିଲୋମିଟରରେ ୧ ପଇସା ଭଡ଼ା ବୃଦ୍ଧି ହୋଇଥିଲା। ୫୦୦ କିଲୋମିଟର ପର୍ଯ୍ୟନ୍ତ ଯାତ୍ରା ପାଇଁ କୌଣସି ବୃଦ୍ଧି ହୋଇନଥିଲା। ଏହି ବୃଦ୍ଧି ୫୦୦ କିଲୋମିଟରରୁ ଅଧିକ ଯାତ୍ରା ପାଇଁ ପ୍ରଯୁଜ୍ୟ ଥିଲା।
