ଉତ୍ତର ପ୍ରଦେ: ଉତ୍ତର ପ୍ରଦେଶର ମୈନପୁରୀ ଜିଲ୍ଲାର ବେୱାର ଥାନା ଅଞ୍ଚଳରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ଏହି ଦୁର୍ଘଟଣାରେ ବାଇକ ଆରୋହୀ ଦୁଇ ଭାଇଙ୍କର ମୃତ୍ୟୁ ଘଟିଛି। ମୃତକ ଦୁଇ ଭାଇ ଏଟା ଜିଲ୍ଲାର ଦାଦୁପୁର ଅସଗରପୁର ଗାଁର ବାସିନ୍ଦା ଅଭୟ ପ୍ରତାପ (୨୫) ଏବଂ ଗୌରବ ଓରଫ ଜାନୁ (୨୫) ବୋଲି ଚିହ୍ନଟ କରାଯାଇଛି। ସୂଚନା ଅନୁସାରେ, ଦୁଇ ଯୁବକ କିଶାନିରେ ଏକ ବିବାହ ଉତ୍ସବରେ ଯୋଗ ଦେବାକୁ ଯାଇଥିଲେ। ବିବାହ ଉତ୍ସବ ସରିବା ପରେ ସୋମବାର ଦିନ ବାଇକ ଯୋଗେ ଦୁଇ ଭାଇ ଘରକୁ ଫେରୁଥିଲେ। ସେହି ସମୟରେ ବେୱାର ପୋଲିସ ଷ୍ଟେସନ ଅଞ୍ଚଳର ନାଗଲା କେହରି ଗାଁ ନିକଟରେ ଏକ ଅଜଣା ଗାଡି ତାଙ୍କ ବାଇକକୁ ଜୋରରେ ଧକ୍କା ଦେଇଥିଲା।
ଧକ୍କା ଏତେ ଜୋର ଥିଲା ଯେ ଅଭୟ ପ୍ରତାପଙ୍କ ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା। ଦୁର୍ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ପୋଲିସ ଘଟଣାସ୍ଥଳରେ ପହଞ୍ଚିଥିଲେ। ଗୁରୁତର ଆହତ ଗୌରବଙ୍କୁ ତୁରନ୍ତ ଆମ୍ବୁଲାନ୍ସ ଯୋଗେ ଜିଲ୍ଲା ହସ୍ପିଟାଲକୁ ନିଆଯାଇଥିଲା। ସେଠାରୁ ତାଙ୍କୁ ଉନ୍ନତ ଚିକିତ୍ସା ପାଇଁ ଆଗ୍ରାର ମେଡିକାଲ କଲେଜକୁ ପଠାଯାଇଥିଲା, କିନ୍ତୁ ଆଗ୍ରା ନେବା ବାଟରେ ଗୌରବଙ୍କର ମଧ୍ୟ ମୃତ୍ୟୁ ହୋଇଥିଲା। ପୋଷ୍ଟମର୍ଟମ ପରେ ଉଭୟ ମୃତଦେହକୁ ସେମାନଙ୍କ ପରିବାରକୁ ହସ୍ତାନ୍ତର କରାଯାଇଛି। ପୋଲିସ ଏବେ ଏହି ଘଟଣାରେ ଅଜଣା ଗାଡି ନାଁରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
